Refereyn.
EEn groot verwonderen mi den sin duerteest // heeft
Siende menich manlijc herte dwelc nu bevreest // sneeft
Uut Petrus scheepken allendich gevallen // nu
In welcke cloec roeyende u vrouwelijc gheest // leeft
Ja en tot roeyen eenen anderen den keest // gheeft
Vliende onder tsoete de bitterheyt der gallen // schu
Maer de heylighe geest heeft willen bewallen // u
Worwulfven die als schaepkens gheabitueert // gaen
De welc hudensdaechs doen berghen en dallen // gru
Die niet aenmercken hoe haer vruchten verkeerdt // staen
O gestadige vrouwe weerdich gheeerdt // graen
[p. 173]
Wildt u niet belghen het slechte verthooghen // ach
Mijns letters dus boudelijc tot u ghekeerdt // saen
Die ick int leven / noyt met ooghen // sach
Maer uwen gheest nemmermeer verdroogen // mach
In my duer u wercken die connen dolver // staken
Meer suers dan soets / sal noch tsoete voor tsuer smaken
Heft op dynen voys van berespen / en swicht // niet
Verheft u lampe maeckt datmen u licht // siet
Op dat sy dy volgen / die verduystert doolen // bloot
Want de heere vercoren heeft een aerm slicht // riet
Om hem te straffene die tfortsich ghevicht // biet
Vreest niet sijn hulpe heeft hy u bevolen // bloot
Dijn wercken ontsteken als vierighe colen // root
Den leesere die es bi smesleedens ghewroech // coudt
Ghy muecht genesen die de viant verhoolen // schoot
[p. 174]
Eest dat ghy voortgaende u hant aenden ploech // hout
Al sijt ghy arbeydende inden wijngaert vroech // bout
Ic hoop gy int loonen selt van murmureren // swygen
En soo int vier genoech voldoet // tgoudt
Selt ghy arbeydende / den loon dijns heren // crijgen
Ghy weet ons leven es sonder cesseren // wygen
Studeert / scrijft dicht / wilt gheen getruer // maken
Meer suers dan soets sal noch tsoete voor tsuer // smaken
Ach vrouken gestadich schimp oft verwijt // acht
Veracht hu de weerelt inden heere verblijt // lacht
Sijnen troost sal hu uut allen weenen // lichten
Straft en berispt derrueren tgemeen profijt // wacht
Want ghy Judith gheheel op desen tijt // slacht
Jegens Holofernem sietmen u alleene // vichten
Wy sijn al rethorisiens in ghemeene // dichten
[p. 175]
Maer wien hoortmen dan hu / opten dwasen ketter // kiven
Hu fundament cont ghy wel opten steene // stichten
Verweckende gheestich die doot byde letter // blyven
Naectelijc sietmen u tegen den lavetter // scrijven
Die vreesende de lucht nu in secrete // preeckt
Daer laet hy sijn kettynich etter // dryven
Waer by hy schalkelijc des onnosels vlete // breect
Houdt procediere / jeghens sijn onwete // spreect
Al doedt u noch wat tgroote labuer // waken
Meer suers dan soets sal noch tsoete voor tsuer // smaken
Princesse alder Rethorisienen // vrouwe
Recht eest dat wy u dienen // nouwe
Want onder constenaers sydy een robyne // fier
Ic natuerlijc in dijns weerde verconbienen // flouwe
Want wanneer ic dijn constige ingienen // schouwe
[p. 176]
Soo vindt ic u dienst maecht van Kateryne // schier
Want qua ketters weerstaet / gy met cleender pine // hier
Die hopic ter lieften viere ghy bringhen // muecht
Soo de oratuers duer haer met claren aenschyne tvier
Aenveerden waer by sy god nu singhen // vruecht
Dat ghy alomme altijt muecht volstringen // duecht
Dat jonne u god mijn uutghetelde // roose
Om dat ghy inghelijc muecht omringhen // juecht
Wanneer sal luyden de laeste ghestelde // poose
Neempt danckelijc van u onbekende geldeloose
Al moet u duer mijn ruytheyt cleyn becuer // naken
Meer suers dan soets / sal noch tsoete voor tsuer // smaken
¶ Eerbare bemindt gheleerde suver juecht
Ontfaetet danckelijck by uwer duecht
