[p. 29]
Refereyn.
O Christe Jesu ons eenich versoendere
Door wiens genade wy sijn behouwen+
Ghy sijt ons middelaer en ons voldoendere+
Ons glorie ons salicheyt / al ons betrouwen+
Wy waren al te samen door den ouwen+
Adam ghevallen in svaders toren+
Brekende Gods ghebot door svyants toe stouwen+
Waer door wy in hem waren verloren+
Maer ghy nieuwen Adam onsondich gheboren+
Ghy hebt de doot / ende de helle verwonnen+
Door u stramen geheelt ons wonden versworen+
En hebt tegen den vyant den strijt begonnen+
Dragende op u cruys / met bloede beronnen+
Ons boosheyt die boven alle ponden // woch
Wy segghen / die u niet voldancken en connen
Lof soetste lam Gods / dat der werelt sonde / droech.+
Lof steen daer de Israelsche af droncken // mede
Drie werf met Moyses roede ghesmeten // claer+
Metalen serpent wiens aensien ontvoncken // dede+
Stervende menschen van serpenten gebeten // daer+
Lof Samaritaen wiens liefde ongemeten swaer
Den crancken gewonden niet en heeft gefaelt+
Van Priester en Levijt troosteloos vergeten // naer
Hierico zijnde uut Hierusalem ghedaelt
Hem siende half doot onder moordenaers verdwaelt
Wert ghy op hem met bermherticheyt beruert
Sijn wonden verbonden / op u beestken gehaelt
Hebt ghy hem in die herberge gheviert
Och ghy hebt onse salicheyt so wel besuert
Want u dierbaer bloet ons dootlicke wonden dwoech+
Lof soetste lam Gods dat der werelt sonden // droech.+
[p. 30]
Lof eeuwich woort dat vermoeyt verslaeft //seere+
Hongerich / dorstich liep / van lande te lande+
Opperste prister / die u selven gaeft // heere+
God vader / in een levende offerhande+
Lof roy koey diemen voor die sonde verbrande+
Met wiens bloet zijn wy alte samen bespringt+
Lof goede herder / wijs van verstande+
Die u schaepkens ter soeter weyen bringt
Lof Bisschop die in sancta sanctorum ghingt+
Niet met vreemden maer mit u eygen bloet crachtich
Lof soetste druyve die zijpende hingt+
Aen thout / ons maeckende uus wijns deelachtich
Levende fonteyne / die van dorst viel clachtich+
Lof hertoge / die de Moabsche honden // sloech+
Noch segge ich zijnde uus lijdens gedachtich+
Lof soetste lam Gods / dat der wereldt sonden // droech.+
Lof hemelsche blijschap / die menigen traen // heet+
Voor ons liet loopen over u soete wangen+
En int hoofken / soomen door Lucas vermaen // weet
Bloedich sweet sweete met anxste bevanghen
Als u minnende herte / niet om verbanghen
Tegen die bitter doot began te strijene
Hebbende naer onse salicheyt groot verlangen
Gaeft ghy u overe / den doot te lijene
Om ons vander eeuwiger doot te vrijene
Laet ghy u onrechtelijck ter doot verwijsen
Ghy wout bedroeft sijn / om ons te verblijdene
Ghy hebt honger gheleden om ons te spijsen
Met uwer glorien ghy sijt te prijsen
Want alle Propheten claerlijck oorconden / vroech
Dat ghy sout lijden / sterven ende verrijsen
Lof soetste lam Gods dat der werelt sonden // droech.
[p. 31]
Victorieus David die met vijf steenen // root
Goliaths verwont zijnde uut liefden verweckt
Dat aen u vanden hoofde tot die teenen // bloot
Gheen lidt en bleef ten was mit bloede bedeckt
Lof wijngaert wiens rancken uut waren ghereckt
So datmen alle u beenen tellen // mochte
Lof onnoosel lammeken puer onbevleckt
Wiens dierbaer bloet ons uuter hellen // cochte
Lof die ons salicheyt sonder uutstellen // wrochte
Inden tijt vanden vader gheordineert
Over den helschen Leeu / die ons te quellen / sochte
O Leeu van Juda / hebdij ghetriumpheert
En den stercken ghewapenden ghespolieert
Diet al in zijnen roofnest tot dien stonden // joech
Elck mach wel seggen die dit contempleert
Lof soetste lam Gods / dat der werelt sonden // droech.
PRINCE
Lof triumphant Prince / lof leytsman / lof wech goet
Lof priester die geoffert tonser baten // hebt
Naer dordinantie van Melchisedech // vroet
Wijn en broodt / dwelck ghy ons tot voetsel gelaten hebt
Lof Capiteyn trou / die uut caritaten heel
In een knechts habijt / u willen vercleen
Om te verlossen u ondersaten // hebt
U gheenen arbeyt ofte pijn laten verleen
Lof schepper van Israel lof uutvercoren steen
Vanden menschen veracht / maer by God verheven
Die de twee mueren des tempels voechde in een
Lof licht der werelt / lof waerheyt / lof leven
Die vry hebt gemaeckt / ons ballingen verdreven
Dit merckende mijn herte int doorgronden // laech
Lof die totter doot ons trouwe zijt bleven
Lof soetste lam Gods / dat der werelt sonden // droech
