[p. 67]
[Refereyn.]
Alder excellentste wijste goetgrondichste
Die Gods mogende hant oyt schiep op eerde
Ay lacen hoe soude ick alder sondichste
U derren loven schoonste soetmondichste
Vreese trect my af / aenmerckende u weerde
Maer want ick uuter herten oyt begeerde
U lof te vermeeren / nae mijn uuterste macht
Doer hope dat ic dwerck noch aenveerde
Verwerft my doch gratie / dat ict volheerde
Ick betrouwe in u hulpe / niet in mijn cracht
O vrouwe daer deeuwighe vruecht door lacht
En de helse door weent / om de glorie
Die de mensche heeft vercregen / door u soete dracht
Salich is den buyck die u heeft voortgebracht
Die inder eeuwicheyt in Gods consistorie
Waert voorsien om te wesen soons cyborie
Dwelck oock gheschiede / ten bequamen tijde
Lof Tempel die dopperste / Bisschop wijde.
Lof tempel vanden wijsten werckman alleene
Ghetimmert / te rechte ghecompareert
By Salomons tempel / van Marmoren sterne
Van buyten ghemaect / en van binnen reene
Metten goude der liefden / wel ghestoffeert
Lof Tempel op eenen vasten steen ghefundeert
Lof sancta sanctorum / lof heylighe stede
Daer de Arcke Gods in was gelogeert
Lof gouden outaer wel geordineert
Daer dopperste priester / offerhande op dede
Lof stoel der genaden / die ons verwerft vrede
Daer Cherubins vlogels / over waren gerect
Beseliels Arcke seer suyver van snede
Lof purpuren gardijne waer dat oock mede
Het heylich der heylighen wert bedect
Lof sanctuarie / met Cedren ghestrect
U segghende ter eeren / ick dit belijde
Lof Tempel die dopperste / Bisschop wijde.
[p. 68]
Lof Tempel in thoochste Jerusalem ghestaen
Weerdiger dan Salomons Tempel gebleken
Want dien hebben de heydenen te niet gedaen
Maria uwen Tempel / en is noyt vergaen
Sijnde met salvingen sheylichs geests bestreken
Lof Tempel op wiens outaer onbesweken
Men sonder ophouden vier moest stoken
Waer af dat Wieroock wert ontsteken
En costelijck cruyt / uuter Apoteken
Dwelck de Coninck heeft in zijn ruste gheroken
Lof Tempel vanden Propheten / voorsproken
Lof schatcamer waer inne tonser leeren
Het wetboeck bewaert wert / sonder croken
Lof gulden panne daermen inne sach koken
Dedelste coexken / dwelck / den Heere der Heeren
Gheoffert wert/ o vrouwe tot uwer eeren
Roepe ick noch eens met herten blijde
Lof Tempel die dopperste / Bisschop wijde.
Lof costelijck ghesticht / seer wel bewaert
Met stercke poorten / ende hooghe mueren
Daer de ooghen des heeren / op sien ongespaert
En de heerlijckheyt Gods / in is gheopenbaert
Ghelijck in Salomons Tempel / in figueren
Maer u glorie / sal eewelijck dueren
O maechdelijck Tempel al omme beset
Met stercken doorwachters die schilden vueren
Dat geen vyanden u aen en moghen rueren
Lof Tempel van Antiocho noyt besmet
Lof Tempel waer inne stonden nae de wet
Thien gouden candelaers / met haren lichte
Dat zijn u thien duechden / ons lichtende net
Lof Ezechiels poorte / lof weerdich wincket
Oostwaert staende / ghesloten dichte
Aensiende u weerde reyn Davids nichte
Ick my te segghen niet en vermijde
Lof Tempel die dopperste / Bisschop wi[j]de.
[p. 69]
De wijsheyt heeft haer selven een huys geschepen
Dat zijt ghy Maria inder eewicheyt voorsien
Dat ghy in uwen Tempel / sout onvernepen
Sluyten dien de hemelen noyt en begrepen
Tis recht dat wy eertwormen u eere bien
O ons hope / ons leven / o Tempel tot wien
Ons toevlucht / is in alle tribulatie
Plaecht God de werelt / om de sonden die gheschien
Met oorloghe / dier tijt / en wy mits dien
U Tempel versoecken door contemplatie
En bidden God door u / ghy crijcht ons gratie
Coninginne des hemels / Vrouwe der vrouwen
Ist dat ons bestrijdt / des vyants tentatie
Ja soe seere dat ons naect desperatie
Vlien wy tot desen Tempel met vol betrouwen
En bidden God door u wy zijn behouwen
Segghende hoe seere / die vyant benijde
Lof Tempel die dopperste / Bisschop wijde.
Al is God de Heere / oock op ons ghestoort
Door onse misdaet / o vrouwe gheduchtich
Roepen wy om hulpe / tot u rechtevoort
Ghy bidt God voor ons / en u bede wert verhoort
Sijn wy belast beswaert / sieck oft suchtich
Oft worden wy voor ons vyanden vluchtich
Oft sluyt God den hemel door ons sondich sneven
Bidden wy tot u / o Tempel doorluchtich
Wy werden ghesont / het eertrijck wert vuchtich
Door reghen / op dattet ons voetsel mach geven
En alle ons vyanden / werden verdreven
Want u kint en mach nae schriftuerlijck betuygen
U geen dinck weygheren / o Tempel verheven
Daer de helsche geesten / uut vreesen voor beven
En de engelen uut liefden de knien voor buygen
O maechdelijcke moeder die Christus wou suygen
Wy kinderen van Eva roepen te strijde
Lof Tempel die dopperste / Bisschop wijde.
[p. 70]
Lof die alle staten / geeft goet exempel
Door u reyn suyver stichtighe manieren
Ghy zijt heel schoone sonder vlecke / oft rempel
Dies dagelijcx voor u weerdighen Gods tempel
Staen meer dan ses duysent officieren
Ja de vierentwintich ouders metten vier dieren
Loven u naest Gods / door u kints bevelen
Worpen si haer croonen / vrouwe goedertieren
Voor uwen stoel / u oock feestelijck vieren
Veel duysent sangers die met luyder kelen
U lof sanck singhen / de Herpspeelders spelen
Tot uwen love / dalder soetste musijcke
En al themelsche heyr / niet om verelen
Loeft u ende eewelijck loven selen
Soe lange als God is int hemelsche rijcke
Dus roep ick oock arm mensch / gemaect van slijcke
Tot u o hoochste ghebenedijde
Lof Tempel die dopperste / Bisschop wijde.
PRINCE.
Lof Princelijck hof / Coninclijcke camere
Daer de prince der princen / uut den throone
In daelde / vindende gheen stadt bequamere
Onder de vrouwen noyt aengenamere
God den Vadere / dan ghy alderschoonste schoone
Dies deeuwich woort / in u weerdighe persoone
Vleesch wert / van u alderpuerste bloet
Dus ist recht dat ick u int herte croone
En dat ic mijn jonste int werck oock thoone
Want door u / tot ons vloeyt / der genaden vloet
Ghy hebt God ghetoghen door u ootmoet
Dat hy niet langher en wilde / beyen
Mensche te worden / o Abigail vroet
Ick bidde u my voor Davids Toren behoet
En als mijn siele naer van hier moet scheyen
Soe wiltse door uwe bystant gheleyen
Dat tsweert der rechtveerdicheyt haer niet en snijde
Lof Tempel die dopperste / Bisschop wijde.
