[p. 89]
REFEREYN
AL de werelt is benaut / elck claecht en kermt
En niemant te vergeefs / want wy hebbens noot
Tis al verdriet dat ons om dooren swermpt
Deen is onterft / dander berooft verermpt
Sulck lantman diet wel hadde / moet nu bidden broot
Menich rentier hevet scaers / dien eens overschoot
De Coopman en mach vry varen oft vlieten
By fauten van peyse / des theel landt is bloot
Van neeringen / dwelc dambachslien oock genieten
Tis nu eenen tijt wel om verdrieten
Noyt sghelijcx beleeft / ghehoort oft ghesien
Tschijnt God wil zijn gramschap heel over ons gieten
Dit segghen wy wel maer wijtent desen en dien
En niemant en denct / tis mijn schult messchien
Want wy niet en kennen / ons sonden swaer
Op dat wy die kennende // te bet mochten vlien
Heere verleent ons kennisse dit nieuwe jaer.
Door ons onbekentheyt ghelijck de domme
Ghevoelende dat wy werden ghesmeten
Claghen wy wel / maer seggen niet waeromme
Wy laten den rechten wech / en gaen de cromme
Dolen als blinden die den wech wel weten
De voetstappen Christi zijn heel vergheten
Die hy ons heeft ghewesen en selfs getreden
Om dat hy heeft ghevast / willen wy wel eten
Ja gulsichlic / met nootdruft niet te vreden
Christus was suyver wy misbruycken ons leden
In oncuysheyt wy den Turcken te boven gaen
Christus heeft ghearbeyt / ghewaect ghebeden
Wy wanen met weelden / den hemel ontfaen
Wy willen niet doen / om dat Christus heeft voldaen
Wy roepen al Gods woort / maer wie leefter naer?
En noch meynen wy met Gode / al effen staen
Heere verleent ons kennisse / dit nieuwe Jaer.
[p. 90]
Wy allendighe menschen totter doot gewont
Soecken gheenen raet / niet willende genesen // zijn
Want wy laten ons duncken wy zijn ghesont
Als wy tgeloove / al hebben inden mont
Willen wy als Christen menschen ghepresen // zijn
En als Turcken leven / onder schijn van desen // zijn
Veel wolven comen in schapen cleeren
Die niet Christen nae dwerc / maer alleen nae dwesen // zijn
Wantse met scriftueren / scriftuere verkeeren
Sprekende vanden geest / vleeschlijcheyt leeren
Niet alleene / in Duytschlandt / te Rye te Revele
Maer al die werelt dore // vrouwen en heeren
Verblinden / met haren stinckenden nevele
Ghelijck de Sodomijten / die in pec in zwevele
Versoncken / soe sondicht elck sonder vaer
Ghiericheyt oncuysheyt is tghemeyn evele
Heere verleent ons kennisse / dit nieuwe jaer.
Wy en minnen noch God / oft onsen naesten
En tis al van liefden dat wy spreken
Ons voeten / om bloet / te storten haesten
Ghelijck Turckijen wert kerstenrijck ten laesten
Gaen wy dus voort in ons quade treken
Sien wy kercken afworpen / kloosters aensteken
Wy hebben ghenuchte in sulcken abuys
Der ouders devotie heeft anders ghebleken
Diet hebben gesticht / dat wy nu breken
En noch willen wy goey Christenen zijn quansuys
Vontmen gheen kercken / oft cloosters / beelden oft cruys
Papen oft monicken / twaer wel ons gerief
Maer dat hoeren en boeven / ongeloovich ghespuys
Int schoonste vander stadt woont / dat is ons lief
Noch en vinden wy gheen faute / in onsen brief
Eest wonder al plaecht ons God / neent voorwaer
Dus seg ick sorgende voor meerder grief
Heere verleent ons kennisse / dit nieuwe jaer.
[p. 91]
Waert dat wy kenden in wat grooter sorghe
Wy leven / en dat wy sagen / met vlaghen
Dat Christus siet / wy souden avont en morghen
Schreyen / maer tis onsen ooghen verborghen
Hoe swaerlijc dat God noch ons sonden sal plagen
Ick sorghe wy zijn nu inde laeste daghen
Die Paulus voorsach in zijnen tijen
Tvolck is stout / hooveerdich / int spreken int dragen
Verweckende hem leeraers nae haer behaghen
Oprechte leeringhe / en moghen zy niet lijen
Papen en Monicken hatende / als prijen
Principalijck meest / die de sonden laken
Sijnde onsuyver bedriechlijck / vol ketterijen
Moedich als leeuwen / bloetgierich als draken
Tis al goet goedt / daermen aen can geraken
Al waert oock ghenomen / van Gods outaer
Maer dat wy ons oude boosheyt moghen staken
Heere verleent ons kennisse / dit nieuwe jaer.
Heere door u gheesselen / tonsen profijte.
Wilt warachtige kennisse in ons sinden
Dat wy ons sonden kennende met vlijte
Die mogen haten / en ons maken quijte
Ons leven beterende / ghenade vinden
Waert dat wy de leelijckheyt der sonden kinden
Wy souden ons schamen / voor uwen aenschijne
Te dencken / dat wy te doene onderwinden
O eewige claerheyt / verlicht ons blinden
Dat wy ons crancheyt kennen / elck de zijne
En ons selven kennende / een broosche mijne
Ons fenijnige tonghe / moghen verteren
Want voorwaer tis al verloren pijne
Dat wy van malkanderen / clappen en cleteren
Beterde elck een hooft soe sout al beteren
Wy segghen wel God plaecht ons ay lacen maer
En dencken niet dat wy zijn sondige sleteren
Heere verleent ons kennisse dit nieuwe jaer.
[p. 92]
PRINCE.
Soect kindeken Jesu ons zijnde ghegheven
Teenen versoender / middelaer / en advocaet
Soon Gods eewich met God vader verheven
Licht der werelt / de wech / de waerheyt en dleven
U bermhertighe ooghen / nederwaert slaet
En ontfermt u over den Christenen staet
De geestelijcke Prelaten / wilt eerst verlichten
Verleent den Princen u vreese / en wijsen raet
Verdrijft uuter ghemeynten / discoort en haet
Sterct de Predicanten die u woort uut richten
Beschaemt de ketters / die de waerheyt bevichten
Bidt voor alle sondaers / int ghemeene
Den vader / op dat zijn gramschap mach swichten
Soet kindeken Jesus van Nazareene
Voor ons heden / besneden / in u leden / cleene
Laet ons juecht vernieuwen / gelijck den ouden aer
Noch roepen wy tot u in dit dal van weene
Heere verleent ons kennisse / dit nieuwe jaer.
