[p. 104]
[Refereyn.]
OM doude ghewoonte / te onderhoudene
Soe moet den geest nieuwe jonste baren
Dat de vrientschap niet en schijnt te vercouwene
Soe wensch ick mijnen vrienden / sonder beswaren
Peys en vre die denghelen met blijden maren
Den Herders vercondichden / met soeten sanghe+
Goetwillighe herten laet trueren varen
Hy is ons gheboren soe schriften verclaren+
Daer douders naer hadden gheroepen langhe
Sondighe mensche / zijt ghy van herten banghe
Siende conscientie belast van binnen+
Loopt naer tcribbeken metten ganghe+
Op dat elck volcomen troost / ontfanghe
Van onsen verlosser / mensch werden uut minnen
Wilt altesamen een nieu leven beginnen
En wilt afworpen dout sondich sneven+
Soe sult ghy metten nieuwen Coninc gewinnen
Een vrolijck nieu jaer / en een duechtlijck leven.
Weest dit nieu Jaer in duechden wackere+
En laet u oock gheenen arbeyt verdrieten
Trecket out oncruyt uut uwen Ackere+
Wilt donvruchtbaer / eerde met traenkens begieten
Soe mogender plantkens van duechden schieten
Wilt den tijt der ghenaden niet versuymen+
Wilt ghy der menscheyt Christi ghenieten
Want wat sout ons baten / dat wy Christen hieten
Als wy leefden naer der Heydenen costuymen+
Metten ouden aer laet vallen doude pluymen
En wilt aentrecken / een nieu habijt+
Doet Christum ane / wilt uut Adam ruymen
Den dach is oppe / wilt niet mee sluymen+
Met uus Heeren penninghen doet nu profijt
Graefse niet in deerde / oft u naect verwijt+
Want hy sal meer eysschen dan hy heeft ghegeven
Ghy sult vercrijgen / eest dat ghy u wel quijt
Een vrolijck nieu jaer / en een duechtlijck leven.
[p. 105]
Ghy en derft niet vreesen / leeft ghy duechdelijc+
Een vrolijck nieu Jaer ons sekerlijck naeckt
Een puer conscientie / is altijt vruechdelijck+
Daer een quade eewige bitterheyt smaeckt+
Van dooden levende door zijn incarnatie+
Op dat van ons sou werden versaeckt+
Alle doode wercken / weerdich ghelaeckt
En dat wy souden leven door zijn gratie
Als kinderen Gods eerlijck / in ons conversatie+
Hierom is Christus / een kindeken geboren
Dat hy ons soude door sijn visitatie+
Brenghen in deeuwighe jubilatie
Die wy door Adams misdaet / hadden verloren+
Tot levende steenen zijn wy vercoren
In Themels Jerusalem tzijne verheven+
Neemt uwen roep waer / ghy crijcht al voren+
Een salich nieu Jaer / een duechtlijck leven.
Hebt ghy in u lijden gheweest onverduldich
Versoent den heere / door patientie
Hebt ghy in eten in drincken overtuldich
Gheweest / boet datte door abstinentie
Hebt ghy te veel ghesproken / houdt silentie
Hebt ghy uwen naesten / door haet oft envije+
Sijn fame berooft / in sijn absentie
Wilt ghy u vernieuwen door penitentie
Doet hem restitutie / tis noch te tije
Hebt ghy door verwaende hooverdije
U selven ghepresen / ander menschen veracht
Verootmoedicht u / denct niemant / snooder dan ghije
Hebt ghy onsuyverheyt / oft boeverije
Metten wercken gedaen / oft metter herten gedacht
Castijt u vleesch so dat ghijts u voort wacht+
Tquaet meer te doene / dat ghy hebt bedreven
Bidt God dat hy u verleen / hy heeft de macht
Een vrolijck nieu Jaer / en een duechtlijc leven.
[p. 106]
Besnijdt u herte / dat uwen vyanden+
Gheen quaet en jonne / door nijdich bespien
Van quaden wercken bedwingt ooc u handen+
En u oogen / dat zy niet onbetamelijc en sien+
Snoert oock u tonghe / en wilt haer verbien
Te spreken daer yemant / door mocht werden onsticht+
Sluyt u ooren dat si niet en hooren van dien+
Daer de ziele door mocht worden gequest misschien
Door de vensteren comt menigen dootlijcken schicht+
Sijt ghy kinderen des daechs wandelt in dlicht
Dat God in u wercken wert geglorificeert+
Doet aen de wapenen Gods / dat ghy niet en swicht+
Inden strijt als u de vyant bevicht+
TVleesch u quelt en de werelt tenteert+
Met vreesen / en beven / niet en presumeert+
Werct u salicheyt / tstaet in Paulo gheschreven
Ghy sult verwerven / ist dat ghy u dus regeert
Een vrolijck nieu Jaer / en een duechtlijc leven.
PRINCE.
Begheert ghy te wesen sHemels besittere
Eert den nieuwen Coninck en dient hem geerne+
Rijst met duecht te doene / al duncket u bittere+
Naer de suer sloestere / volcht de soete keerne
Luystert naer Gods woort / pijnt dat niet tonbeerne
Merckt hoet de sonden laect / en duechden prijst
Vreest ghy te vallen / inde Helsche Caveerne
Dwoort Gods / is u een claer lanteerne+
Het warachtich licht / dat de dolende wijst
Sijt ghy uuten wech der salicheyt gebijst+
Wandelt naer Gods woort / tis den rechten regele+
Soeckt te Bethleem dbroot dat de siele spijst+
Al u smetten wascht af daer God af grijst+
Neempt Christus leven / tot eenen spegele+
Naer Gods geboden / elck zijn wercken pegele
Aldus sal u gheluck / en voorspoet aencleven
God sal u gheven dits eenen vasten zeghele
Een vrolijck nieu jaer / en een duechtlijck leven.
[p. 107]
| AErdige | Notabele | Natuerlijcke | Artisten // goet |
| Aensiet | Neerstelic | Neempt dit | Altsamen // waer |
| Al en eest | Niet constich | Nochtans | Abel Mercuristen vroet |
| Aenveert | Nu hier | Nieuwelijc so | Aengenaem // jaer. |
| Bidt | Jesum | Innichlijck | Nacht en dach | Seere // oock |
| Besluyt | Jesum | Int herte | Nu ghy en sult | Soe falen // niet |
| Begeert | Jesus | Jonste | Nuttelijck | Sijn eere // ooc |
| Besoect | Jesum | Int cribbeken | Naect | Sonder dralen // siet. |
+Luce
+Matth.
+Matt. 11
+Luce. 2.
+Ephe. 4.
+Galat. 6.
+Matt. 13.
+2 Cor 6
+Psa. 1
+Ephe.
+Rom. 1
+Luc. 19
+Pro. 10.
+Pro. 15.
+Esa. 66.
29verbeterd uit Thristus.
+Titum. 3.
+Ephe. 2.
+Hebre. 6
+1 Pet. 2.
+Titum. 2.
+Gene. 3.
+1. Pet. 1.
+Apo. 21.
+Ephe. 4
+Rom. 6.
+Collo. 3.
+Psa. 118.
+1 Pet. 3.
+Eccl. 28.
+Hiere. 9.
+Ephe. 5.
+Math. 5.
+Rom. 15.
+Galat. 5.
+Ephe. 5.
+Psa. 144.
+Galat. 6.
+Psal. 118.
+Sapi. 2.
+Psal. 110.
+Joan. 6.
+Ephe. 5.
+Matt. 28
