[p. 114]
[Refereyn.]
KInderen van Eva / laet staen u suchten
De fonteyne der genaden / springt overvloedich
Tduyfken compt inde Arcke / de Rave moet vluchten
Segt der dochter van Syon / en wilt niet duchten
Siet u Coninck compt u seer saechtmoedich
Ontfangt den jonghen Bruydegom bloedich
Dochters van Hierusalem / cierlick hem tegen // gaet
Siet Coninck Salomonem / seer voorspoedich
En merct hoe Assverus / uut minnen gloedich
Tot Hester der slechter deernen gheneghen // staet
Soecket kint / niet nae Herodis pleghen // quaet
Maer ghelijck de Coninghen / ghy sullet vinden
Te Bethleem / is Abrahams / wel bedeghen // saet
Int Cribbeken / opt hoy / daer ist gheleghen // jaet
Voor de beesten / die haren schepper kinden
O minnende bruyt soect ghy uwen gheminden
Hy compt als de hinden // opte bergen ghesprongen
Singt den nieuwen Coninc / nieu lof / met nieuwen tongen
Siet een nieu wondere / isser ghebuert
Een maecht heeft eenen man omvanghen
Ghedragen en gebaert / den hemel is gheschuert
De verlosser is gedaelt / dus niet meer en truert
Nu is gheboet / der ouder Vaders verlanghen
Een vrouwe heeft vertreden / thooft vander slangen
Verblijt u al tsamen / ghy Jootsche natie
Mardocheus is verheven / Aman ghehangen
Assverus ghebodt / niet om verstranghen
Is weer roepen / Hester heeft vercreghen gratie
O Israelijten / maect nu jubilatie
Uut den handen van Pharao / zijt ghy verlost
God wil metten mensch hebben conversatie
De Vader is versoent / hy sent salutatie
Der maghet van Nazareth / Gabriel is de post
Compt ter bruyloft / die ligghen in sonden vermost
Sorcht niet voor den cost // compt of ghy wert gedwongen
Singt den nieuwen coninc / nieu lof / met nieuwen tongen.
[p. 115]
Loeft den cleynen David / die tgevecht // wan
Teghen den grooten Goliath jonck van daghen
De heere heeft den rock / van zijnen knecht // an
De Coninck der Coningen is nu een slecht / man
Die de werelt draecht / die wert ghedraghen
Salomon heeft in Raab ghecreghen behagen
En Moyses heeft de moorinne ghetrout
O volck van Bethulia / laet staen u claghen
Judith / heeft Holophernem verslaghen
Wy zijn verlost niet door silver oft goudt
Maer met des lammekens bloet / dat acht dagen oudt
Quam bloedich besneden / in zijns moeders ermen
Weenende van pijnen // met ledekens coudt
Die alle creatueren / int wesen houdt
Moeten nu de stomme / beesten verwermen
O Christen menschen laet u des ontfermen
Met nieuwen termen / soo dengelen songhen
Singt den nieuwen Coninc nieu lof / met nieuwen tongen
Laet nu den gheest nae Bethleem vlieghen
Siet hoe deeuwighe blijschap / daer leyt en weent
Als een ander jonck wichtken / inder wieghen
Op dat hy des vyants waen / soude doen lieghen
Heeft hen dalmachtighe / dus seere vercleent
Een mensche als wy / ghevleescht / en ghebeent
Heden besneden / een kint van eender weken
O eewige godheyt / wat is dat ghy meent
Dat ghy u metter menscheyt / dus hebt vereent
Willens aennemende menschelijcke ghebreken
Al light ghy ootmoedich int cribbeken ghesteken
Nochtans buyghen voor u / de hemelsche Vorsten
Al leyt deeuwige wijsheyt / sonder spreken
Stil swijgende / zijn wercken ootmoedicheyt preken
Die al de werelt spijst // moet hongheren en dorsten
Der Enghelen broot / aldersaechts van corsten
Hangt aender maghet borsten // vaste ghedrongen
Singt den nieuwen Coninc / nieu lof / met nieuwen tongen
[p. 116]
Die den Hemel / met sinen lichte vervult
Coempt int duyster dal / der tranen hier beneden
Den ouden Adam wert door dwijf verdult
En den nieuwen Adam / aenveert de schult
Om de rechtveerdicheyt te stellen te vreden
Roept uute nieu mare / in allen steden
Den ballinghen is nu / haer lant ghegeven
De Sonne gaet oppe / den nacht / is leden
Int lant van beloeften / is Israel ghetreden
Maer Pharao / is inde Roy zee ghebleven
Die eerde is boven / den hemel verheven
Denghelen eeren / de menschelijcke natuere
Hester is ghetrout / vast hy is verdreven
De hemelsche weert / daer Denghelen voor beven
Is nu een gast / te Bethleem / inde schuere
Deeuwighe God / is werden / smenschen ghebuere
Verblijt met uwen bruere // die haer handen wrongen
Singt den nieuwen Coninc / nieu lof / met nieuwen tongen
PRINCE.
Besiet uwen Coninc / een onbederflijck // Prince
Om onsen wille / een kencht gheacht
Nu is deeuwich woort / gewerden sterflijc // minsche
Altijt eere / hem // elck erflijck // winsche
Vriendelijck heeft hy ons salicheyt ghewracht
Een nieu licht is ghesien / van die saten inder nacht
Nieu blijschap condicht ons / denghelsche schare
Tis ons ghegheven / dat langhe is verwacht
Vernieut inden geest / die in sonden licht versmacht
Reynicht den ouden deessem / metten nieuwen jare
Als Saba / brengt Salomon / dierbaer ware
Al is de Godheyt met snooden doecxkens gedeckt
Nochtans zijn ooghen / sien alle dinck int clare
Niemant en vreese / God is smenschen care
Alle die slapen / werden nu ontweckt
Vernieut inden geest / den ouden mensch uut trect
Wert nieu deech onbevlect // out metten jongen
Singt den nieuwen Coninc / nieu lof / met nieuwen tongen
[p. 117]
CONCLUSIE.
| ARtificiael | Subtijle | Abele gheesten |
| Naer conste | Natuerlijck | Noch therte haect |
| Neempt danclijck | Jonste bringt | Nu vruecht ter feesten |
| Aenmerckende | Jugeert wel | Al den sin wel smaect |
| Besiet den keest31 | Binnen / ick | Begeert eer ghijt laect |
| Ingenieuse | Aerdighe | Jonstige sinnen |
| Ick bidde u | Neerstelijck | Is hier iet misraect |
| Noteert dat | Notabele | Nu laet jonste kinnen |
| Schout nijt | Altijt / uut | Soeter minnen. |
