[p. 127]
REFEREYN.
O Dochter van Israel / die ghedwaelt // zijt
Uuten rechten wech / door u onbekentheyt
Wilt weder keeren // ghy
Die uut Jerausalem in Jericho gedaelt // zijt
Dijnen Bruydegom versmaet / door u verblintheyt
Met oneeren // by
Inder minnaers gheweest / hoort den roep des heeren // vry
Keert weder / van u alderquaetste ghedachten
Wilt ghy u sonden daghelijcx vermeeren / tfy
Gaet uut dlant der Caldeen / wilter niet vernachten
God die heere seyt / met grooter clachten
Eenen uutvercoren wijngaert / heb ick u gheplant
Om dat ick goey vruchten / van u sou pachten
Maer niet dan suer druyven comen my ter hant
O ghevanghen dochter / keert weder in u lant
U Bruydegom triumphant u in staden // staet
Vry hebt gheenen vaet
Laet u oude weghen en sondighe paden // quaet
Met dit nieuwe Jaer.
Keert totten heere / want tis nootsakelijck
Door scherpe wegen / wilt den ruymer // laten
Gaet door den enghen // nu
Tbeginsel is swaer / maer dende vermakelijck
Wilt alle oude quade costuymen // haten
En wilt ontspringhen // nu
Uut den slaep der sonden / smaect geestelijcke dingen // nu
Tempt u quaey begeerten / door svleesch castydinge
Vanden wercken des vleesch / wilt ooc bedwingen // u
Als gulsicheit / dronckenschap / twist / haet / en strijdinge
Achterclap vloecken / en vermaledijdinghe
Gheen logene en gae uut uwen monde / oock
Van alderley oncuysheyt / doet vermijdinghe
Werpt alle geveynstheyt / uut uwen gronde // oock
Dloon der sonden is de doot / schout de sonde //oock
Nu is open die duere / der ghenaden // gaet
Neempt den tijt wel waer
Laet u oude wegen en sondighe paden // quaet
Met dit nieuwe Jaer.
[p. 128]
Gheen bedroch en wilt met uwen naesten // plegen
Wilt voor u eenen nieuwen acker // bouwen
Saeyt opte doornen // niet
Keert totten vader / hy loopt met haesten // tegen
Sober zijnde int ghebet wilt u wacker houwen
Metten vercoornen // vliet
Hooverdicheyt / steeckt niet op u hoornen // yet
Doetmen u spijt / lijdet met saechten moede doch
Wacht u met woorden / yemant / te vertoornen // siet
U vyant waeckt / zijt op u hoede toch
Ghy en hebt gheenen strijdt met vleesch oft bloedt // noch
Metter werelt alleen / ooc metten boosen geest
U conversatie maect by de goede // och
Voor tgheselschap vanden godloosen // vreest
In Gods dienst zijt vlijtich tallen poosen // meest
Uut doornen roosen leest / wilt niet versmaden // raet
Stille oft openbaer
Laet u oude wegen en sondige paden quaet
Met dit nieu Jaer.
Wilt uut dmiddel van Babylonien // scheyen
Denckt hoe diere Christus wou u ziele // coopen
Weechtse niet lichte // maer
Laet u tot gheen Ketters Seremonien // leyen
Wilt in Gods huys / uut swerelts gecriele // loopen
Stiert u gesichte // naer
Na thoochste Jerusalem / tgoddelijc gestichte // daer
De heere elcken sal na zijn wercken loonen
Tzijn Paulus woorden van gewichte // swaer
Siet toe laet u van leecken / oft clercken // hoonen
God sal alleene den vroomen stercken // croonen
Die totter doot / blijven in volherdicheyt
Wilt u kinderen der heyliger kercken // toonen
Wert niet beweecht / door nieuwe lichtveerdicheyt
O Christen menschen / aenmerckt u weerdicheyt
Met berou / voor u borst / sonder versaden // staet
Sucht en schreyt een paer
Laet u oude wegen en sondige paden // quaet
Met dit nieuwe Jaer.
[p. 129]
Wilt metten ongheloovighen gheen jock // trecken
Versmaet de werelt leert haer wellusten // sterven
Met grooter vlijt // haken
Naer deeuwighe vruecht / wilt uut Adams rock // trecken
Doet Christum ane ghy sult veel rusten // erven
U sal jolijt // naken
Hoe soet de Heere is wilt met appetijt // smaken
De quade ghedachten die u van binnen // quellen
Werpt van u gheringe / wiltse u quijt // maken
Laet nae gheen schandelijck gewin / u sinnen // hellen
Als die ghene die haer gelt op winnen // stellen
Ghiericheyt als Paulus seyt / dienst der afgoden // is
Wilt uwen Broer met bermhertigen vinnen // tellen
U gelt / woecker int ou testament den Joden // is
En oock int nieuwe den Christenen verboden // is
Sondich ghewin comt der zielen tot schaden / jaet
Dickwils hier / en hier naer
Laet u oude wegen en sondige paden // quaet
Met dit nieuwe Jaer.
PRINCE.
Prince laet God den heere / in u herte // leven
Alle eertsche dingen sullen bitter wesen
Toch hem alleene // mint
En hy sal u boete in u smerte // gheven
Rustelijck uwer zielen besitter // wesen
En hijse reene // vint
Gaet haestelick te Bethleem soeckt het cleene // kint
U siele en lijf in sijnen handen // set
Innichlijck hem suchtkens met geweene // sint
Loopt tot hem en vliet uuter vyanden // net
Hem u selven offert teender offerhanden // vet
En geeft so grooten heere gheen slechte // gaven
Leert den vyant weerstaen / die op u zijn tanden / wet
Men siet hem zijn dienaers met suer gerechten // laven
Vrije kinderen wilt niet meer als knechten // slaven
Soect Christus bloet zijdy met sonden beladen // baet
U siele wert / claer
Laet u oude wegen en sondige paden // quaet
Met dit nieuwe Jaer.
