[p. 165]
Refereyn.
O Alder onsalichste catijf der catijven
Door mijn valsch bedrijven / so sie ick blauwelijck
Tghetal mijnder sonden / waer sal ick blijven
Ten waer om scrijven / met pennen nauwelijc
Doe ick somtijts wat goets / dat doe ick flauwelijck
Seer schabauwelijck / Gods beelde mismake // ick
Al is god veel gracien / op my dauwelijck
Ick minne hem lauwelijck / maer vierich blake // ick
In eertssche liefde naer creatueren hake // ick
Heel nachten wake ick // en tis my cleyn zeer
Inder werelt dienst / maer in Gods dienst vake // ic
Penitentie lake // ic / ick ben te teer
Tot alder vleeschelijcheyt / neem ic haest mijnen keer
Tquaet lust my meer / dan tgoet by tijden
En oft ick morghen storve / ja tavondt / oft eer
Och Heere wilt met mijnder crancheyt lijden.
Naer Christum / een Christen mensche / heet // ick
En nochtans veet // ick / zijn godlijcke doctrijne
Dit overdenckende / van ancxste sweet // ic
Want seker weet / ick / dat ick ten fijne
Redene moet gheven / van alle divijne
Tsmaect my als vrijne // waken / vasten / en bede[n]
Een Christen mensch / hoort Christo gelijck te zijne
Maer met den schijne // ben ick te vreden
Tquaet hangt my ane / van boven / tot benenden+
Al mijn leden // zijn tot sonden gheneghen
Maeckt den geest een goet propoost als heden
Dats morghen vertreden // tvleesch is daer teghen
O God wilt / nae u rechtveerdich pleghen
Mijn misdaet niet wegen // al ben ic flau int strijden
En al heb ick dus langhe / in sonden ghelegen
Ooc Heere / wilt met mijnder crancheyt lijden.
[p. 166]
Op mijn eygen salicheyt ick luttel mercke
Is dlijf inde kercke // therte is daer buyten
Al hoor ick Gods woort / ick en stelts niet te wercke
Maer lacen ick hercke // meer nae sotte cluyten
Ick hoorde veel liever herpen / en luyten
Bommen en fluyten / oft een ander instrument
Dan tgodlijck woort / vol van virtuyten
Daermen wat nieus sal sluyten // ben ic geerne ontrent
Door quade coustuyme / ter onduecht ghewent
Seer diligent // int winnen / van eertsschen goede
Als de werelt tenteert / ick geef saen consent
Voor thelsch serpent // ben ic weynich op mijn hoede
Ic laet my verwinnen / van vleesche en bloede
Dus naect my de roede // wilt ghy my niet mijden
Hier omme / bid ick u noch / met ootmoede.
Och Heere / wilt / met mijnder crancheyt lijden.
Als ick achter / en vore / doorsie mijnen brief
Soe naect my groot grief // bysonderlinghen
Ick vinde / ick hebbe / my selven soo lief
Ick soecke mijn gherief // in allen dinghen
Ic en kan den Esel niet bedwingen
Hy wilt al springhen // contrarie den gheeste+
Al is den wille goet / tliecht aen tvolbringhen
Spelen en singhen // alomme inde feeste
Is svleesch begeerte / te leven als een beeste
En dalder meeste // dat my maect bange
Waer een ydelheyt wil pleghen / ben ick de tweeste
Dus ten helschen foreeste // gae ic mijn ghanghe
Oordeelt my God / nae zijn rechtveerdicheyt strange
Soe ontfanghe // ic loon / met den vermaledijden
Maer al heb ick den vyant gedient dus langhe
Och Heere wilt met mijnder crancheyt lijden.
[p. 167]
PRINCE.
Heerlijck regent / diet al hout / onder u bestier
Alder hoochste princier // ick kenne mijn ghebreken
Nijdich traech / ben ic / hooveerdich / en ghier
Noch gulsich ondier // vol vleesschelijcker treken
Als my yemant te cort doet / terstont aent / wreken
Ick en souts niet uutspreken // in seven daghen
Hoemenich goet ingeven en menich soet preken
Ick hebbe versteken // dit mach ick wel claghen
Al mach conscientie / oock met vlaghen
Inwendich knaghen // den rouwe is cleene
Al sie ick veel teeckenen / en vremde plaghen
Het duncken my saghen // ick en achtse geene
Van mijn vijf sinnen / en heb ick niet eene
Wel ghebruyct / ick meene // hoe sou ick verblijden
Als ick ten oordeel / moet comen alleene
Och Heere wilt met mijnder crancheyt lijden.
