[p. 193]
Refereyn.
O Vader van alle redelijcke gheesten
Moghende schepper / van alle creaturen
Enghelen / menschen / voghelen / dieren / beesten
Al dat hem op dlant / oft in zeer mach rueren
Heeft van u dwesen / maer door dminlijc berueren
Hebt ghy den mensch ghemaect / uus beelts gelicke
Al hadt hy u veracht / door zijn quade cueren
Ghy quaemt als mensch / de doot besueren
Om den mensch te openen / zijns vaders rijcke
Dit denckende / bidde ick / arm mensch van slijcke
Die my grootelijck hebbe / teghen u ontgaen
Merct in my u beelde / op dat aen my blijcke
U groote ghenade / slaet my geen swijcke
Laet u bitter doot voor mijn sonden staen
Als ghy de hant hebt / gheheven om slaen
Laet vallen de roeye / uut uwer ghenaden
Al heb ick u veracht en den vyant ontfaen
Heere en wilt u beelde doch niet versmaden.
Sout ghy u schaepken dat ghy hebt ghesocht
Met soe grooten arbeyt / laten gaen verloren
Het ghene dat ghy soe diere hebt ghecocht
En u selven voor hebt / ghegheven te voren
Sout ghy dat vernielen in uwen toren?
En eeuwelijck verwerpen van uwen aenschijne?
Neen heere ghy hebt my te sere vercoren
Want ghy zijt voor my een mensch gheboren
En hebt voldaen voor alle de pijne
Die ick verdient hebbe / dus stelle ick mijne
Hope in u dat ghy my sult vergheven
Mijn misdaet / en my ontfermen ten fijne
U dierbaer bloet / is mijn medecijne
U lijden mijn blijschap / u doot mijn leven
Dus wil ic met betrouwen vast aen u cleven
Al vinde ick my met sonden beladen
Ic segge want u genade gaet boven schreven
Heere en wilt u hantwerck / doch niet versmaden.
[p. 194]
Heere ben ick niet dmaecsel uwer handen?
Dus thoont aen my u vaderlijcke trouwe
Ben ick gheloopen den vyant in zijn tanden?
Nae u ghebodt niet gheleeft als ick souwe
Lijdt met mijnder crancheyt / want ic wel wouwe
Al ben ick quaet / dat ick waer betere
Ick schaem my als ic mijn sonden aenschouwe
Och hoe ickse bedecke berghe oft vouwe
Ick weet wel ghy zijt mijnder wercken metere
Sijnse in hoecxkens geschiet / jae noch secretere
Want u oogen / diepste der herten doorgronden
Waer blijve ick dan arme sondighe sletere
Ick bidde u Heere ontbint de vetere
Daer ick door / mijn boosheyt mede ben ghebonden
Ick werp my gheheel / in u bloedighe wonden
Te min can my de vyant / gheschaden
Al wert luttel Olijen in mijn Lamken vonden
Heere en wilt u hantwerck / doch niet versmaden.
Prince boven alle princen van machte
Voor uwen dingstoel ick neder kniele
Volcomen remis / ick van u verwachte
Al eest dat ick vol sonden criele
Weert dat ick inden gront der hellen viele
Dit ken ick Heere / maer ick heb gheappelleert
Voor den throon der genaden / dus verlost mijn siele
Uuten stricke / eerse de vyant verniele
Die nae mijn verdoemenisse seer laboreert
Mijn eyghen conscientie my accuseert
Dus en can ick nergens inne ghehopen
Dan in u ghenade / die verre triumpheert
Boven mijn sonden / dus heere my salveert
In u minnende herte / dat elcken staet open
Die willen waer nemen u vaderlijcke nopen
En doen en laten / nae u Godlijcke raden
Al is doude slange in mijn herte ghecropen
Heere en wilt u hantwerck / doch niet versmaden.
