[p. 195]
Refereyn.
O Alderhoochst Godlijcke / Majesteyt
Heylighe dryvuldicheyt / ongheschepen
Ick kenne mijn schult / och noyt booser seyt
Hoe grootelijck heb ick / my teghen u misgrepen
Mijn edel siele / daer ghy onvernepen
U Godlijck beelde / in hadt gheprent
Die heb ick bevlect / met veel sondigher strepen
Jae u Godlijcke munte / nalijcx uut gheslepen
Door quaet ingheven / en mijn consent
Daer inne ontfaende / het helsche serpent
Dus ben ick vader / ick moet belijen
Van u vervrempt / der hellen ontrent
Seer miserabel / talder cranckheyt ghewent
Ghierich / gulsich / traech / vol hooveerdijen
O Medecijn ick roepe sonder vermijen
Wel wetende dat ghy zijt van natueren milt
Al ben ick vol gheestelijcker leprosijen
Heere ghy muecht my suyveren / eest dat ghy wilt.
Tghene dat ghy wilt doen / des hebt ghy macht
Want ghy Abrahams kinderen / cont maken van steenen
En alle siecken / die tot u werden ghebracht
Ghenaest / de cruepele deet springen op haer beenen
Die thien leprose / met eenen woorde const reenen
Suyvert oock mijn siele / die deerlijck is besmet
Door u godlijcke macht / die niet en mach vercleenen
In u staet mijn hope / in anders gheenen
Ick weet wel ick ben nae u Godlijcke wet
Weert om mijn onsuyverheyt / uut den volcke geset
Als een doot ledt / van uwen lichaem ghesneden
Want door mijn stinckende boosheyt wert belet
Dinvloeyen uwer gratien / in dit percket
Vindende my selven / uut ootmoedicheden
Stae ick van verre / met innigher beden
Roepende en werde ick niet ghestilt
Segghende met den leproos / mismaect van leden
Heere ghy muecht my suyveren / eest dat ghy wilt.
[p. 196]
Als ick aenmercke / mijn groote allendicheyt
Uut schaempten ben ick / als de verveerde
Ic en vinde niet dan smette / in mijn inwendicheyt
En mijn stinckende vleesch / noydt duecht en begeerde
Heere ick ben de vermaledijde eerde
Daer niet dan Dijstelen en doornen uut en gaen
Sout ghy my oordeelen / nae mijn weerde
Ghy sout metten rechtveerdighen sweerde
Siele ende lijf alle beyde verslaen
Siet my arme mismaeckte / doch voor u staen
Eest dat ghy wilt / ghy muecht my ghenesen
Segt ick wil / meest suyver / en het wert ghedaen
Op dat weercomende / met den Samaritaen
Ghy van my muecht werden / grootelijc gepresen
Suyvert eerst mijn siele / ende oock nae desen
Dwingt mijn vleesch / dwelc tegen den geest vercrilt
Al ben ick seer walghelijck / voor u Godlijck wesen
Heere ghy moecht my suyveren / eest dat ghy wilt
Met gevouden handen / met uutgherecten armen
Roepe ick luyde uut grooter nootsaken
O Jesu gebieder / wilt mijnder ontfermen
Ghy die van onsuyver / cont suyver maken
De quade begheerten / vierich in my blaken
Inden sloot der onreynicheyt versinckende
By my selven en can ick niet uutgheraken
Dit wetende / doet my nae hulpe haken
Tcleet dat ic int doopsel ontfinck / claer blinckende
Heb ick besmet / dus ben ick stinckende
Voor u heere / meer dan eenen dooden hont
Davids sone weest mijnder ghedenckende
Sijt my een dropken der ghenaden schenckende
Uut der levender fonteynen / sonder gront
Verlost my heere / eer my de helle verslont
Want al werde ic om mijn sonden gebraden gevilt
Ic en mach niet genesen / maer ist dat ghijt my jont
Heere ghy muecht my suyveren / eest dat ghy wilt.
[p. 197]
PRINCE.
Met gheboghen knien / ick voor u welve
Want ick vinde my selven / ick moet u clagen
Vol der onreynicheyt / ja donreynicheyt selve
Ben ick en gheweest hebbe / van kintschen daghen
Siende mijn onsuyverheyt crijghe ick mishaghen
Want ick my daer door vinde in Gods haet
Och heere hoe sal ick u gramschap verdragen
Ick kenne ick hebt verdient veel plaghen
Wetende uwen wille / bleef ick obstinaet
U godlijck saet en heeft in my niet ghevaet
Hoorende u woort / en heb ic niet onthouwen
Vallende bijden wech / eest vertreden jaet
In my steenighe eerde / u godlijck Prelaet
Eest verdort / vanden doorne liet ickt verdouwen
Maer al is mijn boosheyt weert om verspouwen
Ghy zijt mijn hope en eenen stercken schilt
Al is mijn siele eyschelijck int aenschouwen
Heere ghy moecht my suyveren / eest dat ghy wilt.
