[p. 215]
Refereyn.
WIe leeft soo oudt / nu onder de lien // daer
Die binnen zijnen leven oyt sach geschien / claer
Soo veel wonders als wy sien / op desen dach
Wy swimmen int verdriet men weets ontvlien // waer
Want waermen compt men vint genoech van dien // maer
Hoe wel wy opten hals hebben den slach
Wie betert hem niemant elck doet soo hy plach
Jae hoe ouder hoe quader niet om vererghen
Werdet volck des elck hem wel vreesen mach
Voor noch meerder verdriet / want sonder verdrach
Wy gode / met onsen sonden terghen
Ghinck ghisteren qualijck / qualijcker salt mergen
Gaen want God de heere / is op ons verstoort
Waer selen wy ons voor zynen toren berghen
Hy roept ons tot beternissen / en niemant en hoort
Maer ghelijc de blinde gaen wy vast voort
Van deen sonde in dander recht oft wy waren // mal
Wat meyndij dat ons God / dus doende gesparen // sal.
Wat isser over vijfentwintich jaer herwaerts
Ongeloofs gesaeydt / Het schickt hem wel derwaerts
Dat wy tgeloove / heel sullen verlaten
Die Christelijck wilt leven / en weet hem werwaerts
Als nu te keeren wantmen schier nerwaerts
Puerlijc God en soeckt / tzy in wat staten
De heere sendt ons uut milder caritaten
Deen plage op dander om ons te treckene
Diertijt / oorloghe / groot / boven maten
Sterften / hooge vloeyen / ten mach al niet baten
Maer om Gods gramschap / meer te verweckene
Pijnen de menschen haer boosheyt te deckene
Metter evangelischer vrijheyt alleleens
Oft zy met gode / waenden te geckene
En zijn oordeel te ontvliene / maer seker neens
Pilatus en Herodes zijns nu eens
Om Christum te cruycen hoe salt noch varen // al
Wat meyndij dat ons God dus doende gesparen // sal?
[p. 216]
Met stercken steenen / die wy wel calcken // trouwen
Maken wy blochuyssen / wy doen balcken // houwen
Daer wy ons vesten / mede doen bewercken
Wy hebben ons oft wy God verschalcken // wouwen
Wiens ooghen claerder dan de valcken // schouwen
Met steenen van cloosters afgebroken kercken
Wanen wy ons steden te verstercken
Wacht dat wy ons ten ende / niet en vinden bedrogen
Die steden mochten verbidden / elck macht mercken
Wiltmen verdrijven in diveersche percken
Hier toe doen sommighe / haer vermoghen
Als God wilt plaghen is de wijsheyt vervloghen
Vander gheenen die regeren steden en landen
Metten aermen menschen heeftmen cleyn medogen
De vrienden doen hem schade / ghelijc de vyanden
Tsal den sommighen int oordeel / staen tot schanden
Datmen daerme berooft heeft van haren // stal
Wat meyndij dat ons God dus doende gesparen // sal?
Het menschelijc gheslachte is schier dommer // jaet
Dan de beesten want soo lang soo crommer // gaet
Elckerlijc recht / oft wy God verachten
Hy sendt ons oorloghe diertijt / en commer // quaet
Om ons te castijen / wy soecken ommer // raet
Tegen God te steken / met al onsen crachten
Wy mommen / wy bommen / by daghe by nachten
Wy hoveren boeleren / al waert al voor windt
Wacht dat wy Hierusalem niet en slachten
Dat ons destructie niet en compt eer wij wachten
Als de roye opten eers is screyet kindt
Tgeloeft hem te beteren wy zijn dwaser ghesindt
God slaet ons / en wy en hebben gheen ghevoelen
Maer werden zoo langer zoo meer verblindt
Wanen wy aldus / Gods gramschap / vercoelen
Wy mueghen vast graven / slaven / en woelen
Beteren wy ons niet ons naeckt soo zwaren // val
Wat meyndij dat ons God / dus doende / gesparen / sal?
[p. 217]
PRINCE.
Prince ons en mocht Franchoys Turc / oft Soudaen // letten
De Heere / soude ons vyanden saen // pletten
Ghelijck hy Sennachacheribs heyr de vernielen
Maer voorwaer wy moestent / al anders aensetten
Dbedde / als Davidt / met menighen traen netten
Ons sonden bekennen daer wy vol af crielen
Die belijden / in bitterheyt onser sielen
Om die te latene / een vast propoost // maken
God sou voor ons strijen / dat wy dit onthielen
Maer neen wy voor den afgod Mammon wy knielen
Tvier der oncuysheyt sietmen west / en oost blaken
Hooveerde / des levens / doet naden roost // haken
Van eertscher eeren in sonden verstijven // wy
Hoe sou ons Gods hulpe / en zijnen troost naken
Hoe hy ons vermaendt / quaet / zijn wy quaet blijven // wy
Tquaet / dencken quaet spreken quaet bedrijven // wy
Dus blijft ons duecht van jaren tot jaren // smal
Wat meyndij dat ons God dus doende / ghesparen // sal.
Meer suers dan soets.
