[p. 223]
Refereyn.
Wilt nu ontwecken doorluchtige sinnen
Door Smeys beginnen / set druck besijen
Reyn geestelijcke blijschap / schept nu van binnen
Herte / leden vinnen // wilt trueren af snijen
Aensiende de creatueren wilt belijen
Met soeten loone / de Godlijcke macht
Vanden schepper / en wilt u in hem verblijen
Van wien alle ding heeft sijn wesen verpacht
Het veldeken groene / nu tonswaert lacht
Daer menigherhande vruchten in groeyen
De cruyden medicinael sijn nu gheacht
De boomen verblijden / ons duer haer dracht
Van gruenen looverkens die lustelick bloeyen
Deerde wert vruchtbaer door sdaus bespoeyen
De voghelkens singen diveersch van strepen
Dit merckende wilt u te segghen moeyen
Och hoe schoon moet hy sijn diet al heeft geschepen.
De bloemkens die de winter heeft doen duyken46
Hen lustich ontpluyken // nu seer eedelijck
Groen taxkens springen / uut dorre struyken
Willen wy gebruyken / de vruchten vredelijck
Laet ons doch loven want tis wel redelijck
Hem die alleene / den wasdom / mach gheven
Wanneer ghy tgroene velt sijt betredelijck
En u daer duer comt vreucht int herte gedreven
Denckt hoe schoone hy moet zijn int eeuwich leven
Die de werelt so lustelijck can verchieren
Laet u herte altijt wilt ghy niet sneven
Duer de creatueren in God sijn verheven
Siet ghy fraey menschen / oft lustelijcke dieren
Voghelen inde locht visschen inde Revieren
Op eerde / reyn bloemkens onvernepen
Segt en loeft hem die tonswaert is so goedertieren
Och hoe schoon moet hy zijn diet al heeft gescepen.
[p. 224]
Wanneer ghy int velt gaet u verluchten
Om wat ghenuchten // te scheppen in desen
Denct om dLant hier boven vol soeter vruchten
Daert sonder suchten // altijt somer sal wesen
Gaet metter begeerten / daer bloemkens lesen
En metter herten maect daer u woone
Peyst hoe schoone hy daer is weerdich ghepresen
Die hier de bloemkens can cleeden soe schoone
Soe dat noyt Keyser in sinen throone
En was ghecleet met sulcken coluere
Verhuecht inden geest niemant en croone
Singt den heere nu lof sancg met blijden thoone
Want den Rijm is wech den sneeu is duere
Den Mey staet lustelijck in sinen fluere
Wert erghens in tgroene ghesonghen ghepepen
Denct verblijt daer duere / u natuere
Och hoe schoon moet hy zijn diet al heeft geschepen.
Siet ghy Zonne en Mane claer van ghestichte
Ende de sterren dichte // aenden hemel staen
Ten zijn maer stralen / vanden eeuwigen lichte
Dus wilt u ghesichte // int hoochste slaen
Peyst om dlicht daer dese / haer licht af ontfaen
Wiens godlijcke cracht schijnt inder zonnen stralen
Die alle groeysel doet uuter eerden gaen
En met bloemkens becleet / bergen ende dalen
Soe dat geen schilder en sou connen gemalen
Soe schoonen coleur / oft soe menigerhande
Dus redelijcke menschen / hoort mijn verhalen
Soect inde creatueren / wilt ghy niet dwalen
Den Schepper / met uwen relijcken verstande
Want siet ghy yet schoons / te water te lande
Tmach by de schoonheyt / des Scheppers lutter drepen
Dus segt oft denct uuter liefften brande
Och hoe schoon moet hy zijn diet al heeft geschepen.
[p. 225]
Prince.
Princen en Princessen leeck en clerck // dan
Legt vry gemerck // aen // dees eertsche dinghen
Maer verblijt int werck niet ghy en prijst den werckman
Die in swerelts perc // can // de boomen doen bringen
Diveersche vruchten / de vogelkens doet singhen
Elck naer zijn natuerken / verscheyden gheluyt
En alle bloemkens gheeft sonderlinghen
Rueck en coluer / ende oock alle fruyt
Sonderlinghen smaeck / en sonderling virtuyt
Den soeten cruyden tonser consolatien
Merckt oock hoe dat uuter eerden ruyt
Coren terwe tot onsen voetsele spruyt
Uut een greynken veel greynkens by zijnder gratien
Is dees heere niet wonderlijc / van regnatien
Wiens Godlijcke macht noyt en was begrepen
Dus denct somtijts / in uwer contemplatien
Och hoe schoon moet hy zijn diet al heeft gescepen.
Meer suers dan soets.
46In de marge staat een letter ‘h’ of ‘ss’(?).
