[p. 228]
Refereyn.
O Bermhertige God wat sals ghewerden?
Ghelijck een Schip is in grooter sorghen
In die wilde zee
So sijn wy menschen / duer Adam overtreden
In duysent vreesen / avont / en morghen
Al omme is ons wee
Waer wy ons keeren / int dnauwe oft int bree
Tis al teghen wint wat helpt ons roeyen
Des wy ons moeyen
Te roepen tot u met goeden beschee
Staet op heere / weest ons te helpen ree
Rasch wilt u spoeyen
Laet u ons te helpen / niet vernoeyen
Want ons scheepken helt aen alle zijen
Veel baren der tentatien / daer op vloeyen
Den mast des gheloofs wilt faelgeren by tijen
Wy blijven schipbrokich verwonnen in tstrijen
Eest dat ghy ons laet op ons selven staen
Dus roepen wy tot u om ons verblijen
Heere comt ons te helpen oft wy vergaen.
Waer sullen wy ons wenden arm broosche formen
Van allen canten met duysent periculen
Werden wy bestooten
De ketters die Petrus scheepken bestormen
Schieten op ons tegen sgheloofs articulen
Veel vierighe clooten
Wier kercken ghevallen in schuyten in booten
Hebben si ons bedriechlijck beleghen
Op alle weghen
Men derf niet biechten seggen sDuyvels genooten
Vasten oft vieren cleyn metten grooten
Is hier toe ghenegen
Wy luysteren hier na elck wil wellust pleghen
Edel onedel weerlijck en gheestelijck
Ons vleesch begheerlijckheyt / strijt ons ooc teghen
Die den relijcken geest / wil maken beestelijck
De verleyers comen ons ane feestelijck
Ghelooft alleene Christus heeft voldaen
Och wie sal weerstaen / desen storm tempeestelijck
Heere comt ons te helpen / oft wy vergaen.
[p. 229]
Wy waren algheerne in die havene
Daer wy thuys hooren / maer contrarie winden
Ons dat beletten
Hoe wijs ons pijnen met onsen slavene
En cunnen wy den rechten wech niet ghevinden
Want duysent netten
Werden ons ghespreydt wie sal ons ontsetten
Want vele stercke subtijle vyanden
Waken tonser schanden
De machtige weeldighe groote cadetten
Willen ons verdrucken / en heel verpletten
In steden in landen
De vyant die ons wilt trecken in zijn banden
Loop rondtomme / uut zijnde om ons betrapen
Als een brieschende leeu bloetgierich van tanden
Om te verslindene ons aermer schapen
En daer hy niet comen en mach sendt hy zijn knapen
Dus en weten wy waer de handen aen slaen
Staet op gheringe en wildt niet slapen
Heere compt ons te helpen oft wy vergaen.
Noch vloyen op ons / veel contrarie stroomen
Dan compt den wint van quaden exempele
Ruysschen en tieren
Die ons leeren / ons quaey begeerten thoomen
Prelaten precaers dienaers van Gods tempele
Heeren en princhieren
Onstichten ons weder in veel manieren
Door haer schandaloos leven tzijn stercke baren
Die ons beswaren
Hoe selen wy blinde / den ruymen wech vieren
Als de siende die ons scheepken souden stieren
Die selve in varen
Oock is de werelt / met haerder booser scharen
Teghen ons ghewapent met grooten ghecriele
O heere wilt u hantwerck bewaren
Uut allen periculen / verlost / ons ziele
Datse den storm der tentatien niet en verniele
Ons scheepken zeylde / inden gront zeer saen
Waert dat u handt niet oppe en hiele
Heere compt ons te helpen oft wy vergaen.
[p. 230]
PRINCE.
Prince die over al hebt dominatie
Ghebiet de winden en zy werden stille
Duer u godlijcke macht
En sterckt ons soo door u moghende gratie
Dat wy ons scheepken stieren / naer uwen wille
Met duechden bevracht
Aensiet ons roeyen in dmiddel der nacht
Slaet op ons nederwaert uuten hooghen
U minlijcke / ooghen
Want al ons cracht // is haest tondergebracht
Stildt de golven ons roepen niet en veracht
Uut vaderlijc medooghen
Onder den boom des cruycen wy ons booghen
Den Ancker onser hopen wy versincken
Inde zee uus lijdens wildt u ons verthooghen
Compt in ons scheepken / oft wy verdrincken
Segt betroudt / ick bent laet u stemme clincken
Wandelt op de Zee / en zy werdt effen en plaen
Wy segghen / als wy op ons perijckel dincken
Heere compt ons te helpen / oft wy vergaen.
Meer suers dan soets.
