[p. 231]
Refereyn.
O Verdrietelijcke werelt vol dolueren
In u is bedroch liegen lortsen en sueren
Een Christen hert / soude billicx schueren
Duer tgroot mishagen
Siende dabuysen die nu ghebueren
Want daghelicx comender nieuwe errueren
De hoofden zijn cranck des de leden trueren
By nachten by dagen
Naer svleesch wellusticheyt / de menschen jaghen
Sijnde hooveerdich ghierich oncuysch int plegen
Ter onduecht ghenegen
En die sorge voor de sielen souden dragen
Die sietmen ooc dwelck meest is om beclagen
In Gods dienst vertraghen
Wandelende sonder vaer Balaams wegen
Tgheloove werdt gepreeckt de wercken verswegen
Christus heeft voldaen men derf biechten oft schreyen
Ick segghe al eest den sulcken teghen
Als de siende dolen wie sal de blinde leyen?
De siende zijn Predicanten en propheten
Gheleerde die op Moyses stoel sijn gheseten
Dien te gronderen / der schriftueren secreten
Meest is bevolen
Als dese / haer eygen salicheyt vergeten
En niet en beleven / dat si weten
Derven si hen blinde / te leyen vermeten
Die selve dolen
Gaende in taveernen en in dobbelscholen
Devangelie tracteren hier ende daer
Aen Bachus outaer
Clappende als exteren inde gaeyolen
Nader lien mont hoe sijt lappen en folen
In verborghen holen
Dat si niet en derven seggen / in dopenbaer
Daer de tafel ghedeckt is gaen si gheerne naer
Ydelheyt hanteren / me dansen en reyen
Ick dencke als ick dit hoore want tvalt my swaer
Als de siende dolen / wie sal de blinde leyen?
[p. 232]
Hoe souden de blinde / den rechten wech gegaen?
Als haer leyers dolen die hen sweechs verstaen
Al doen si hen somtijts / eenich goet vermaen
Men achtet voor cluchten
Als si selve de hant / niet me ane / en slaen
Met haer wercken / tegen haer leeren wert gedaen
Saeyense / Gods woort / het costelijck graen
Ten doet gheen vruchte
Hoe sullen de leecke / voor gods oordeel duchten?
Als de gheleerde / hen talder wellust gheven
En in sonden sneven
Als de werelt soecken dier schijnen uut vluchten
Wat baet dat si in steden en ghehuchten
Met grooten gheruchten
Als Engels preken / als Duyvels leven
Hoe sou hooveerdije werden verdreven
Als si diese laken / daer niet af en scheyen
Als de siende dolen wie sal de blinde leyen?
Dlicht is nu duysterheyt / dus is dlant vol blinden
En waer salmen oprechte / leyers vinden
Want wy siender vele dies hen onderwinden
Loopen inde grachten
Met open oogen oft si God niet en kinden
Duer den ruymen wech die ter hellen sal inden
Eest wonder dat wolven schaepkens verslinden
Alse blinde wachten
Die de schapen minnen niet dan om de vachten
Dat si souden voeden wert van hen gheschoren
Die loopen verloren
Souden si soecken by dagen by nachten
Maer dats een vanden minsten ghedachten
Maer daerse op achten
Is om te vegarene groote tresooren
Als verleyers / leyers zijn / en wolven pastooren
Die niet haer schaepkens / maer hen selven weyen
So mach ick wel seggen so ick seyde voren
Als de siende dolen / wie sal de blinde leyen?
[p. 233]
Hoe souden zy een ghemeynte wel regeren
Die haer eyghen leven / qualijck reguleren
Door haer conversatie schandalizeren
Donnoosel wichten
Sullen zy andere leeren abstineren
Die Dagelijcx selve / brassen en hoveren
Droncken drincken slampampen vreucht hanteren
Met Venus nichten
Neen haer wercken bederven dat haer woorden stichten
Sy mueghen hem als een clocke verslijten
Maer tsal weynich profiten
Als dooghe schemelt wie sal dlichaem lichten
Hoe sullen die blinde weerstaen / svyants schichten
Als de siende zwichten
Inden strijdt / en laten hen in dasschen smijten
En verwinnen / van haer quade appetijten
Blijvende in sonden verhert / als keyen
Noch blijve ick by dmijne al macht sulcken spijten
Als de siende dolen wie sal de blinde leyen.
PRINCE.
Prince denckt niet dat ick hier mede wil raeyen
Datmen de overheyt sal versmaeyen
Maer ick segghe uut Petro wildt ghy God paeyen
Weest u Prelaten
Onderdanich den goeyen / en oock den quaeyen
Leeft ghy wel wat sal u haer quaet leven schaeyen
Al eest dat zy sware / lasten laeyen
Op haer ondersaten
Die zy selfs niet en rueren zijnt crancke vaten
En wildt haer leven niet soo nauwe bespien
Maer u selven besien
Om dat svolcks boosheyt / groot is / boven / maten
Comen quaey oversten van God verwaten
In alle staten
Want de rechtveerdighe heere / laet dat gheschien
Om tquaet te straffen vanden ghemeynen lien
Nochtans si seer sware / tormenten verbeyen
Die selve niet en doen dat si andere ghebien
Als de siende dolen wie sal de blinde leyen.
