[p. 259]
REFEREYN.
SErpenten / Aderen / Schorpioenen / Slanghen
Beeren / Wolven / stieren int wout ghevangen
Hongherich van caken
Wilde Eenhoornen / niet om verstrangen
Briesschende Leeuwen / die naer bloet verlanghen
Fenijnighe Draken
Dese schaden den mensch alsser by gheraken
Nochtans een dobbel tonge meer quaets can brouwen
Al zijn dees beesten schadelijck int genaken
Men machse schouwen
Een dobbel tonge / en is niet om betrouwen
Al waer si als Cicero / schoon van faconden
Int hemelrijck salse fenijn uutspouwen
En dootlijck wonden
Noyt beesten so wreet / op eerde ghevonden
Men machse vanghen / binden en versubtijlen
Diese vliet en worter niet af verslonden
Maer een dobbel tonge / over hondert mijlen
Mach den absenten quetsen / met haren pijlen
Dus segghe ic dwoort des Wijse mans altijt:
Een dobbel tonghe is vermaledijt.
Teghen een dobbel tonghe en is gheen boete53
Want bedriechlijck maeckt si haer woordekens soete
Theeft wel ghebleken
Aen Joab die Amase quam te ghemoete
Cussende hem biedende vrientlijcke groete
Heeft hy hem doorsteken
Dese willende oock zijnen broeder wreken
Aen Abner / doen hy hem daer minst voor wachte
Flatterende / met verraders treken
Hem ter doot oock brachte
De boose Alchimus desen oock slachte
Die swoer den Joden niet te wesen schadelijc
Die hy nochtans te vermoorden dachte
Seer versmadelijck
Triphons tonghe sprack oock ghenadelijck
Met Jonata gelovende peys en vrede
Den welcken hy dede vangen verradelijck
En naemaels met sijn sonen dooden mede
Een dobbel tonghe is scherp van snede
Seyt Davidt / als een sweert dat niemant en mijdt54
Een dobbel tonghe / is vermaledijt.
[p. 260]
Der gheesselen slach / can blau stramen verleenen
Maer der tonghen slach / die breeckt de beenen
Naer schriftuerlijck vermaen
Door sweerts isser veel bracht in sdoots vereenen
Nochtans de dobbel tonge / soude ick meenen
Heeft meer moorden ghedaen
Daer door zijn dorpen ende steden vergaen
Omgheworpen Casteelen sloten en mueren
Niemant so sterck diese can wederstaen
Oft daer voor ghedueren
Sy maeckt onvrede tusschen naeste ghebueren
Sy scheyt van malcanderen man en wijf
Een dobbel tonge / stelt een heel stadt in rueren
Door haer bedrijf
Sy is fenijnich infect ja so Corosijf
Dat si wonden slaet / die niet en ghenesen
Vader ende kint brengt sy in ghekijf
Dat noyt en was / oft nemmermeer sal wesen
Can sy versieren ende midts desen
Tusschen de vreedsamighe berockt si strijdt
Een dobbel tonge / is vermaledijt.
Een dobbel tonghe can de waerheyt verkeeren55
Schriftuere vervalschen dwalinge leeren
In Steden in landen
Discoort verwecken / Princen en Heeren
Sijnder door bedorven en vrouwen van eeren
Ghebracht in schanden
Van broeders en susters / maect si doot vyanden
Dat si malkanderen vervolghen en quellen
Leven en doot slaet inder tongen handen
De vyant vander hellen
En mocht niet meer quaets doen met sijnen gesellen
Dan een dobbel tonghe wie salse ontvlien
Al doetmen goet si salder quaet uut spellen
Door haer bespien
Al en canse de duecht diese siet gheschien
Niet heel missaken / si salse verminderen
Recht is si van God en allen Goeden lien
Verhaet gherekent onder svyants kinderen
Wie sal hem wachten voor dees valsche slinderen
Christus selve en wasser niet voor bevrijt
Een dobbel tonge is vermaledijt.
[p. 261]
Prince.
Een dobbel tonghe was sduyvels instrument
Waer door Adam ende Eva hem gaven consent
Gods ghebodt vergaten
Een dobbel tonghe tot clappene ghewent
Is een groote plaghe in een gheestelijck convent
Wantse dondersaten
Doet murmureren / teghen haer prelaten
Jae een heel ghemeynte / door haer overdraghen
Stelt si in twist die in charitaten
Te leven plaghen
Een dobbel tonghe / tis wel om beclaghen
Is als een slanghe / onder eenen hoop Alen
Waerse coemt / daer salse peys verjaghen
En liefde doen falen
Een dobbel tonghe / is vol loghentalen
Door haer gheveynsde flatterende practijcke
Doetse Princen Heeren / Wethouders dwalen
Datse vanden wech / der rechtveerdicheyt wijcken
Sy en spaert den armen / oft den rijcken
Maer elcken belaecht si door haet ende nijt
Een dobbel Tonghe / is vermaledijt.
