TWEEDE BOEK.  Die ander boec hier beghint.  Die u sal maken bekent  Den anderen staet van den heren.  Hoe dat si in groter eeren, 5  Twee hondert ende veertich jaer,  Twe min, weet voerwaer,  Coninge saten geweldelike,  Somme keiseren des gelike,  Ende hoe dat si vielen weder 10  Bi verradenissen neder,  Ende der cronen worden quite,  Die si hielden dus met vlite.  Mar die minne in alre wise  Van Amelise ende Amise 15  Sal ic u vertrecken voren,  Om dat si eens deels behoren  Ter geesten, die hier volget na,  Alsoe als ict beste versta,  Hoe si hem onderminden 20  Ende hoe hoer saken einden.  Dit boeck houdt in, tsinen dele,  Drie ende tsestich capitele.