[p. 34] Een schoon gheestelyck liedeken, op den toon O Heer wanneer sal comen: &c.  Boven alle saecken  Bid ick u Heer gebenedijt,  Wilt in mij u wooninge maeken,  Besidt mijn herteken tot alder tijt,  Compt daerin sonder respijt,  Van alle sonden my bevrijt,  Helpt mij strijden mijnen strijdt.     Wilt mijn ziel maeken reyne,  Ende suyveren mijnen gront,  Ghij zijt die levende fonteyne,  Die gheneest datter is ghewont.  Haest u Heere compt toch terstont,  Stelt uwen lof in mijnen mont,  Ende maeckt mijn ziele ghesont.     Met vierigen verlangen  Laet mij Heer u houden vast,  Als ick u sal ontfangen,  Want ghij zijt den liefsten gast,  Helpt my dragen mijnen last,  Myn herteken is op u ghepast,  Inde werelt en is geen rast.     Ick ben een vat vol sonden,  Myn ghebreken zyn u bekint,  Zuyvert my door u vyff wonden,  Blyft my Heer altyt omtrint,  Mijn ziele die is tot u gesint,  Want ghy zyt den besten vrint,  Die al weet wat dat my dient.    [p. 35]    Myn lieveken sal ick zoecken,  Daer ick hem vinden mach,  In sermoonen en goede boecken  Spreeckt hy my allen dach,  Heymelyck sonder ghesach  Sal hy verhooren myn gheclach,  Die myn lyden beteren mach.     Heer Jesus lief verheven  Verlicht myn herte swaer,  Wilt my u gracie geven  By u te comen daer  Alle dingen sal wesen claer  Sonder droefheyt, pyn oft vaer,  Daer haect myn ziele naer.