[p. 56] Een geestelijck liedeken opden toon: Era di maygio, &c.  Heere myn ziele dorst naer u,  Gheeft mij u selven bid ick nu,  Want mij en can vermaeken  Gheen aertsche saeken.      U aenschijn is zeer gratieux  Ende u woorden amoureux,  De menschen moeten u minnen  Die u kinnen.      Mijn herte gheeft soo menigen sucht,  Ick slaen mijn oogen inder lucht  Al tot mijn lief daer boven  Die d Ingelen loven.      Ick sal hem soeken nacht en dach,  Oft ick Jhesus ergens vinden mach  In straeten ende wijcken  Sonder beswijcken.      Ic hebbe vonden die mijn ziel bemint  Tot hem is myn herte ghesint,  Gheen creature en can my helpen,  Myn liefde stelpen.      O ziele ghy stryt soo menigen stryt,  Naermaels suldi zyn verblyt,  Inden hemel suldi blincken,  Wilt hierom dincken.      Edel ziel hebt goeden moet,  Tes liefde die u trueren doet,  Godts soeticheyt zuldi smaken,  Ende naer hem haecken.      Sy sullen van Godt zyn versaet,  Die de werelt hebben versmaet,  Ende die haer boose treken  Zyn affgheweken. [p. 57]        Myn herte es van liefden gewont,  Heer Jesus maect myn ziele ghesont,  Wilt altyt by my wesen,  Ick sal genesen.      Die dit Liedeken heeft ghedicht,  Bidt Godt dat zy mach zyn verlicht  In haeren gheest van binnen  Om Godt te kinnen.