[p. 80] Een gheestelyck liedeken, op die wyse No me digays, mal ay Madre.  Myn ziele leeft nu in vreuchden,  Inwendich in Godt gerust,  Schickt u tot allen deuchden,  U begherten met liefden blust.      Syt altyt op u hoede  Wat ghij peyst oft doet,  Neempt alle dingen int goede,  Met patientie in goeden moet.      Die Godt den Heere soeken,  Veel lydens es hen bereyt,  In alle plaetsen en hoecken  Sal tegen hen worden gheseyt.      Is Godt uwen waromme,  U saeken sullen wel gaen,  Maer soeckt ghij u selven alomme,  Ten sal niet langhe staen.      Wilt u hertte stellen  Op Godt gebenedyt,  Met de werelt en wilt u niet quellen,  Zy vergaet al metter tyt.      Gheen meerder rust op aerden  De mensche vinden en sal,  Dan luttel onderwints aenveirden,  En houden vrede overal.      Al compter somtijts schade,  Het moet gheleden zyn,  Godt sal vroech en spaede  Den vergelder zyn.