[p. 95] Antwoorde opden selven thoon.  Laet myn ziele spreken nu,  Heere myn herte schinck ick u,  Van traenen myn oogen leken,  Aensiende myn sondige gebreken.      U gracie heere die in my wracht,  Heeft my tot kennissen ghebracht,  Daeromme wil ick u loven  Myn opperste lief daerboven.      Nu ick ghenaede hebbe ontfaen,  Doet my doch voort in deuchden gaen:  Ende wilt my gracie geven,  Om naer uwen wille te leven.      Ick wil u heere nu dancbaer wesen,  Dat ghij myn ziele hebt genesen  Door uwen crachtigen bloede  Neemptse in u behoede.      Int gheloove ende inden gheest  Wil ick u aenbidden aldermeest,  Ende luysteren met myn ooren  Om u Goddelyck woort te hooren.      Die dit Liedeken heeft ghemaeckt,  Haer selven heeft zy ierst gheraect,  Daernae al die dit lesen,  Elck wille zijn ghebreken ghenesen.