[p. 117] Een gheestelick liedeken, op den toon van het liedeken vande Stacade, die den prince van Parma dede maecken.  O Jesus lief gepresen  Mijns hertsen medecijn,  Wilt mijn arm ziel genesen  Sij leyt in grooter pijn,  Bij u soeckt zij te zijn  Gheen ander en can haer helpen,  Metten liefsten wille dijn,  Wilt mijn begeerte stelpen.     Ick bid u om ghenaede,  Gheen recht mij Heer en doet,  Al coom ick int leste spade,  Nochtans soo grijp ick moet,  Dat u ghenade soet  Mijn sonden sal bedecken,  En dat u dierbaer bloet  Sal wasschen mijn sondige vlecken,     Heere aenhoort myn clachten,  Mijn natuere valt mij rebel,  Ick soude mij gaerne wachten  Van des werelts valsch voorstel,  Den vijant doet mij gequel,  Hij loopt om mij te vinden,  Als eenen leeu zeer fel,  Soeckt hij mij te verslinden.     Wilt mij Heer suyver maeken  Van herten inden gront,  Laet mij u liefde smaeken,  Sij maeckt die ziele ghesont,  En zij doet het pont  Dwelck ghij hier hebt gegeven  Dobbel winnen terstont,  Ende naemaels deewich leven.    [p. 118]    In u Heere sal ick hopen  Ghy zijt dat opperste goet,  U gracie die staet open  Voor die penitencie doet,  En die hier met ootmoet  Hen sonden nu belijden,  Die sullen met voorspoet  Naermaels met u verblyden.     En wilt niet langer beyden,  Compt in mij Heer tes noot,  En wilt van my niet scheyden  In dure van mijnder doot,  Door u genaede groot  Ontfangt mij in uwen armen,  Al ben ick van deuchden bloot,  Wilt mijnder heer ontfermen.     A M E N .