[p. 122] Een schoon leysen ende lof tot het kindeken Iesus, opden thoon van de Allemande, coler ne puis mon affaire, &c.  Lof kindeken Jesus myn uutvercoren,  Als desen nacht voor ons gheboren.  Sonder u wij waeren verloren,  En ghebleven in svijans macht.  Ghij hebt versoent des vaders toren  Daer de sonde ons hadde in gebracht.      Lof kindeken Jesus ionck van dagen  U alleene doet my behaegen,  Wilt uut mynder herten iaegen  Tgene dat u gracie in my belet.  Naer niemant anders en wil ick vraegen  Des werelts liefde de ziel besmet.      Lof kindeken Jesus teer en cleene,  Al zydi myn lieveken alleene,  Soo moet ick u troetelen int gemeene,  Want tot een yegelyck zydi bereyt  Voor de sondaers die hen schult beweenen  Ligdi in de cribbe en schreyt.      Loff kindeken JESUS vol caritaten  Om u wil ick de werelt laeten,  Ende alle sonden haeten  Die my daegelycx doen ghewelt.  U te beminnen sal myn ziele baeten,  Ick heb myn herteken op u gestelt.      Lof kindeken Jesus proper en schoone  Gecomen van boven uut shemels troone,  Compt binnen in myn herteken woonen  Want ghij zyt den liefsten gast.  Gheeft my u selven tot eenen loone,  Mijn ziele is Heere op u ghepast. [p. 123]        Lof kindeken Jesus vol van minnen,  Leert my myn ghebreken kinnen,  Dat ick die mach altyt verwinnen  Door u gracie in deser tyt,  Regeert myn herte en myn vijf sinnen,  Mijn heere, myn Godt gebenedyt.      Loff kindeken Jesus Heere der heeren  U ootmoedicheyt sal ons leeren,  Hoe dat wy ons moeten bekeeren,  Willen wy comen in hemelryc,  Als cleyne kinderen ons verneren  In simpelheden alle ghelyck.      Lof kindeken Jesus van groote weirden  Die ons arm menscheyt wilde aenveirden  Ende by ons comen op deser aerden,  Om ons te helpen uutter noot.  Wy willen u dancken als levende gaerden,  Ende dienen totter doot.      Loff kindeken Jesus Coninck verheven,  Den naem is u inden hemel gegeven,  Voor u Maiesteyt die Ingelen beven,  Ende singen Sanctus tot alder tyt.  Laet my u dienen alle myn leven,  Tot penitentie gheeft my respyt.      Lof kindeken Jesus groot van machten,  Stort in myn herteken goede gedachten  Dat ick u toecoomste mach verwachten  Hier beneden int aertsche dal.  Als ghy sult comen met uwe crachten  Oordeel geven overal.      Lof kindeken Jesus cleyn besneden  In u teere schamel leden,  Laet my den tyt hier soo besteden  Tot uwer eeren in swerelts pleyn.  Dat ick u mach offeren hier beneden  Een rouwich herte van sonden reyn. [p. 124]        Loff kindeken Jesus lief gepresen  U weelden zyn by ons te wesen  Alle myn sonden wilt genesen  O alder opperste medecyn.  Cureert myn wonden bid ick met desen  Doet my naer uwen wille zyn.