[p. 136] Een schoon leysene om het kindeken Iesus te groeten, op den thoon van Het was een meysken ionck &c.  Ick wil inden geest naer Betleem gaen  Ende spreken dat zoete kindeken aen,  Met deser groeten tot alder tyt.      Ick groet u zoete kindeken schoone,  Ghy zyt ghecomen uut svaders troone  In Maria ghebenedyt.      Ick groet u lieffelyc kindeken cleyne  Geschapen van smaegdekens bloede reyne  Door die cracht des heylichs gheests.      Ick groet u kindeken inder crebben  Mocht ick u in myn herteken hebben,  Dat is de plaetse die ghij begeert.      Ick groete u zuyver kint ghepresen,  Die ons altsaemen hebt genesen  Doort storten van u heylich bloet.      Ick groet u kint vol caritaten,  Om u wil ick de werelt laeten,  En sterven alle sinnelycheyt.      Ick groet u kindeken cleyn besneden  Doet my myn hooverdije vertreden  Met een diepe ootmoedicheyt.      Ic groet u woort des Vaders verheven  Voor wiens maiesteyt dat dIngelen beven  En singen Sanctus tot alder tyt.      Ick groet u kindeken groot van machten,  Ghij hebt verwonnen des vijants crachten  Die doot, die helle, de werelt me.      Ick groet u kindeken ionc van dagen  Wilt uut mijnder herten iaegen  Alle dat u Heere mishaecht.     FI N I S .