Van den strijt, de vvelcken geschieden voor de stadt van Constantinopolen, tusschen den volcke vanden Keyser, ende van Gamezio.

Het iij. Capittel.

Desen Heyrleger wert terstont vernomen vande wacht vande Stadt, waeromme den allarme soo groot worde, datter veele liepen om te beschermen de have die de Moren meynden te overweldighen, daerentusschen Caniam, Tarisius, ende de andere principale Ridders, heur bereyden, ende deden alle neersticheydt om te vergaderen Crijchsvolck ende Soldaten, ende in een cleyne tijdt vondense haer in alsulcken merckelicken getal, datse in slachordeninghe wt de stadt toghen, ende te hulpe quamen d'eerste, die vande Mooren al verre verdreven waren vande Waterkant, ende als Florendos (die achter gebleven was) deur de stadt reet, om d'anderen t'achterhalen, worde hy Griane ghewaer, liggende in een Vensteren vant Palleys, siende seer droeffelick nade have, waer deur hem t'herte verheven worde, seggende in hem selfst: Ic sweer by Godt, dat ick huyden sal sterven, oft ick sal u doen vergeten een deel der oorsaken van u deyrnisse, dit seggende gaf zijn Peert de sporen, ende sonder langhe te rijden (wesende inden Velde) viel met een geweldige crachte op de vyanden, die groote macht aenwenden, om te comen wt heure Schepen, maer de verwerringe geschieden in sulcker manieren, datter menige, so van d'een als d'andere sijde, hare daghen een eynde namen, principalick vande Christenen, want den Prince Gamezio (gheacht zijnde een vande beste Ridders van Asien) dede sulcke feyten van Wapenen, dat het wonder was, ende niet teghenstaende de defensie van die van Constantinopelen, hy quam opt Landt met een

groot ghetal van synen volcke, doen begonsten de Christenen achterwaerts te wijcken, ende bykans den rugh te keeren, waerom dat de reste vande Mooren middel hadden te ghenaken, ende alle sonder tegenstoot te Lande te komen, twelck den Keyser siende, die ghebleven was om de Stadt te bewaren, worde seer droevich, vreesende de misordeninghe van synen volcke, maer Florendos ende Caniam hielden haer alsoo, dat deur haren middel, wederom alle heur volke versaemden, ende de vyanden verboden voort te varen, aldaer toonden hem Tarisius stout ende vroom, beproevende deur alle middelen hem ghelijck te maken de vromicheyt van Florendos die welcke desen dagh wonder bedreven hadde, ende also dese drie te samen doordringende van rye tot rye, slaende ter aerden alle de gene die haer ontmoeten. Gamezio tselve vernemende, meynden van gramschap te rasen, end om hem te wreecken, voechden hem by Tarisius, die welcke hy gaff een alsulcken slagh met zijn sweert opt hooft, hem ter neder werpende, alsoo verbaest, dat hy hem lichtelick doot gheslagen soude hebben, ten ware gheweest Florendos die hem overquam, die welcke siende den More verheffen in syn Steghelreepen, om also meerder crachte te nemen, om hem te quetsen, stack hem zijn Sweert van achteren int Fondement, tot aent ghevest toe, also hy doot ter aerden viel. Doen vergaderden sy d'een teghen d'ander in sulcken grooten ghetal, dat vanden geheelen dach den strijdt, noch so geweldich niet geweest en was, maer het volck van Gamezio, siende heur Hooft verloren te hebben, verlooren oock den moet ende couragie, vluchtende met vollen loope in hare Schepen, ende ten ware geweest den Duysteren nacht, diese te gheringhe overviel, daer en souder niet een afghecomen hebben, oft sy en souden dootgeslagen oft ghevangen genomen hebben geworden, hoewel datter een groot deel van haerluyden passeerden de scherpte des Sweerts, d'anderen metter haest begroeven haer in die golven der zee, ende de reste salveerden haer des nachts al vluchtende. Ende alsoo keerden weder bet Volck vanden Keyser, hopende des anderen daeghs noch beter te doen, maer de Mooren wisten haer daer voor wel te wachten, want soo haest als haer Vyanden heur gelaten hadden, gingen sy met soo grooten haest t'Schepe, als sy ymmermeer conden, ende wat redenen oft vermaningen eenighe van haerluyden int particulier deden, datmen veel eer behoorden te sterven, als de stadt onghewonnen te laten, ende haren Coninck te wreecken, niettemin, de Schipluyden togen de Seylen op, ende richten haren wech na den Soudaen, den welcken, nae datse aenghecomen waren, te kennen gaven heure quade fortuyne, ende hoe het alles vergaen was, oock den doot van synen Sone Gamezio, waeromme het weynich scheelden dat hy hem selven niet en misdede, maer hy was soo oudt ende afgaende, dattet hem onmoghelick soude syn gheweest, selver in persoone hem te gaen wreecken, waeromme dat hy dede gelofte, ende swoer, dat hy zijn anderde sone, so gheringhe als hy gecomen was ten

bequame Ouderdom om Wapenen te voeren, soude seynden, met sulcken Heyrcracht, dat hy den Keyser ende syn Keyserrijck soude te niete doen ende onder brengen, ende daerentusschen sondt hy het rantsoen, van die gevangen ghenomen waren. Maer om wederom te keeren tot Caniam ende de anderen diese verslagen hadden, alsoo haest sy wederom inde stadt gecomen waren, den Keyser die albereets verstaen hadde den dienst die hem dien dach van Florendos geschiet was, gebootschapt wordende dat hy ghewondt was op verscheyden plaetsen en woude niet consenteren dat hy elders soude afsitten als in zijn Palleys, op dat syn Barbiers ende Meysters hem soo veel te beter visiteerden ende genasen, also dat hy gheleyt worde in eene vande schoonste Camers, alwaer de Keyserinne ende Griane hem oock terstonts quamen visiteren, daer haer vertelt worde door Caniam, dat sonder de hulpe van Florendos, Gamezio Tarisius doot gheslaghen soude hebben, maer seyde hy, den Heyden isser aende pan blijven hangen, ende ic heb hem gesien in mijn presentie den lesten sucht geven, alsoo dat ons de victorie is ghebleven, de welcke te voren twijffelachtich was. Terwijle dat Caniam was in dese coutinge, sloech Griane altijdts haer oogen op Florendos, ende sy twee te samen contenteerden deur t'ghesichte heur gequelde herten, soo manierlicken nochtans, dattet niemant en merckten, ende om dat den Chirurgijnen goet dochte datmen hem liet rusten, een yegelijck seyde hem goeden nacht, ende vertoogen haer tot des anderen daechs smorgens dat Caniam gebode dat een yegelic sich ghereet maeckte, om te gaen sien, wat hare vyanden souden mogen bedrijven maer de gene die des nachts de Wacht ghehouden hadden, quamen hem bootschappen, dat (nae haer vermoeden) sy t'zeyl gegaen waren, ende de Have verlaten hadden, ende also wast gheschiet, om welcke oorsaken, den Keyser Godt grootelick lovende, reysden wt Constantinopelen, om te gaen sien t'ghetal der dooden, waer onder men oock vonde Gamezio, diemen lichtelic kende, om die rijcke wapenen wilde die hy aen hadde, die Caniam gheboodt Florendos te brenghen, als hebbende oorsaecke gheweest, van so heerlicke victorie, desghelijcx ooc den Keyser selfs om hem dancbaer te syn, presenteerdense hem so gheringhe als hy weder inde stadt gecomen was, seggende, mijn Neve, ick heb vernomen dat door u vromicheyt ende cloecmoedicheyt, mijn vyanden t'quaetste deel ghehadt hebben, waeromme dat niet voorby gaen sal eenen dach mijns levens, oft ghy sult my altoos bevinden u te syn een goede Mage, ende altijt geduerende vrient, ende dat in sulcker voeghen, dat ghy my niet en soudt moghen eysschen, t'welck ick u niet en soude vergunnen, indient in mijn macht waer, Florendos bedanckten hem seer ootmoedelicken van alsoo groote eere, als hy hem bewees, hopende, nade luydinghe van syn woorden, lichtelick te vercrijgen daer hy na haecten, twelck was de schoone Griane, die hem alle daghe quam visiteren, mette Keyserinne, ende door dien middel haerder bey-

der liefde haer voedende ende vermeerderende van dage te dage, twelc ooc mede een groot middel was, dat Florendos in weynich daghen wederom vercreech, de volcomen genesinge van zyne wonden, ende metten Keyser hielde de Propoosten, also ghy hier na verstaen sult.