Hoe Florendos aenquam op de Frontieren van Macedonien, alwaer hy seer grooten wonderbaerlicken rouwe bedreef, om dat hy Griane niet en hadde moghen met nemen, gelijck als syn voornemen geweest was.

Het viij. Capittel.

Florendos ende Frene ghecomen synde, daer henluyden haer ander volck verbeydende was, reysden voorts in alle diligence (vreesende gevolcht te worden) so dat sy in weynich dagen quamen op de Frontieren van Macedonien, ende om dat den Prince dochte niet te connen leven sonder dicwils te hooren nieuwe tijdinghe van syn alderliefste, nam voor hem te blijven in d'aldereerste stadt van synen lande, ende aldaer te verbeyden synen Schiltknecht, die hy na Constantinopolen ghesonden hadde, gelijc ghy gehoort hebt, die veel eer wederom tot synen Meester keerden, dan hy gehoopt hadde, om het weynich verbeyden dat hy in des Keysers Hoff gedaen hadde, want so geringe hy daer quam, verstonde hy hoe dat Griane gevangen ende Tarisius noch inden leven was, het welcke Florendos verstaende, meynden te sterven van ongeneuchte, soo om het quade tractement van syn vriendinne, als oock om gefailgeert te hebben te dooden den gheenen door den doot vanden welcken hy wederom hoopten te gewinnen syn verlies, ende van alle den dach en woude hy noch eten oft drincken, maer sloot hem alleene in syn Camer, ende om so veel te bequamer te mogen doen syn beclachte leyde hy hem opt bedde, maer Frene die hem niet veel uyt het gesicht verlore (vreesende dat hy door mismoede hem selven tleven benemen soude) dede so vele dat hy middelen vonde, om inde Camer te comen, dewijle hy syn clachte doende was, seggende: Eylaci me vrouwe, moet ick so ongheluckich syn, dat ghy om mijnent wille lijdt gevanckenisse ende torment, sonder het verdient te hebben, wat voldoeninge sal u oyt mogen doen uwen Florendos, om te mogen beteren dit ongelijc, deur het welcke ghy hem so sterc aen u verbindt, wanneer hebt ghy aen hem verdient, alsoo ghetracteert te worden, om zijn oorsake? Voorwaer, indien u verdriet hem conde voeghen met het mijne tot uwer ontlastinge, ic soude my achten te zijne den aldergeluckichsten verdriet lijdende mensch, die oyt geweest is, maer t'gaet al tegen mij-

nen wille, t'gaet my al contrarie, de Doot selve vlucht van my, maer ic sweer by God seyde hy, wtten bedde springende datse ickse teghen haren danck sal vast houden ende Frene siende dat hy in onsinnicheyt begonste te geraken, ginck tot hem, hem byde hant nemende, ende vragende wat dat hy hadde. Ic heb seyde hy, so groot lijden, dat het my verdriet te leven, ghy hebt voor waer reden seyde Frene met hem spottende, indient is om de gevanckenisse van Griane, en ist niet beter datse aldaer is, dan inde macht van Tarisius? gemerct, dat hare gevanckenisse niet langhe en mach dueren, maer indien sy ghehoudt ware, daer van en ware gheen eynde te verwachten, daerom hebt goede hope, ende doet desen dach afveerdigen eenen anderen Schiltknecht, die welcke in alle neersticheyt reyse na Thracien, om u nieuwe tijdinge te brengen wat daer na geschiet sal mogen zijn, ende dat hy middel vinde, indient mogelijck is, om Griane deur Cardin te doen verstaen, dat hy om die oorsake daer is. Desen raet vont Florendos goet, soo dat hy op de selfste ure den last gaf een van zijne Edelluyden, die welcke in grooter diligentie volbrocht het Ghebodt van synen meyster, want door een goede Fortuyne quam hy aldaer op de selfste tijdt dat Griane voor haer genomen hadde des volgenden daechs hare Vrouwen te spreecken van tgene haer geliefde, ende hy en hiel niet op van soecken, tot der tijt toe dat hy Cardin gevonden hadde, die hy vertelde alle t'ghene hem Florendos belast hadde, oock mede zijn groote verdriet, twelck hem daghelicx quellende was, hem seer affectieuselicken biddende, dat hem so veel geliefden te doen, dat Griane daer van de waerheyt quame te weten, ooc mede dat hy daer was, om dicwils na hare saken te vernemen, ende die synen meyster te laten weten. Cardin wesende versekert vande blijdtschap die de Princesse ontfanghen soude door de nieuwe tijdinghe van Florendos ginck syn Suster vinden, die hy verclaerden alle dat hy gehoort hadde, ende sy sulcx wel verstaen hebbende, ginck het terstont Griane vertrecken, so dat de oude vrouwe diese in bewaernisse hadde daer over quaet vermoeden creech, ende om dat sy Florendos van te voren beminde, het vuyr albereets ontfengt was, maer alsnu ontstack, in sulcker cracht, so dat sy wel vastelick in haer selven besloot, haer liever in stucken te laten houwen, als oyt yemant anders voor haren Heer ende man te nemen als hem, ende dochte hem te schrijven eenen brief, so om hem te vertroosten, als oock te geven goede hope, maer en wiste niet hoesy sulcx wel soude te wege brengen, ghemerckt sy gheen Inct noch Pappier en hadde, ende dat het verboden was, haer tselve te geuen, ymmers sy praeten so schoon met Tolomestre, hare Wacht-vrouwe (veynsende te willen schrijven een cleyn briefken aen haren Vader) so datse vercreech tgene sy begeerden, ende haer op een plaetse alleen vertreckende, schreef eerst den Brief aen den Keyser, ende daer nae aen Florendos byde welcke sy hem biddende was, hem so seer niet te willen quellen, door dien dat de saken hem niet geheelicken en

voechden nae syn fantasie, want met de hulpe van Godt, het eynde haer soude syn also genoechelick als haer het beginsel moeyelick ende teghenspoedich viel en dat sy haren doot wtgestelt hadde, t'selve was alleene geschiet, om hem syn leven te bewaren. Deze twe brieven geschreven en toegesloten zijnde riepse de oude Vrouwe tot haer, ende gaf haer den brief die aenden Keyser hielde haer biddende datse dien hem geliefden te brengen, so dat sy daer door middel vercreech om te mogen spreken na hare geliefte met Lerine, suster van Cardin haer bevelende te gaen vinden den Schiltknecht van Florendos, op dat hy wederom keerden na syn meyster, met hem nemende haren brief, t'welc hy also dede, comende in weynich dagen daer na ter plaetse daer hy den Prince vont, die welcke ontfangende den brief van Griane, was so blijde alst mogelick is, hem niet latende genoegen die hondert mael te lesen ende te cussen in eenen dach, segghende: Och wel geluckigen brief, die geschreven is met die hant vande excellenste Princesse die huydensdaechs op geheel aertrijc is voorwaer ter liefde van haer sal ic u bewaren, ende in sulcker eeren houden, als het welcke daer van my meerder blijtschap aen gecomen is, als ic oyt gehat hebbe.