[Lucelle, Tragi-comedie en prose françoise]

+A Monsievr Ani-bal de Saint Mesmyn

Seigneur du Brueil, la Cloye, du Gauguyer, & des Chappelles, & Gentilhomme de la Chambre de Monseigneur.

S'Il est ainsi, Monsieur, qu'en la Tragedie ou Comedie on s'efforce de representer les actions humaines au plus pres du naturel: il me semble sous vostre meilleur aduis, estre plus seant les faire reciter en prose qu'en vers: Parce que negotiant les vns auec les autres, l'on n'a pas accoûtumé de parler en rithme, encor moins les valets, chambrieres, & autres leurs semblables qui y sont souuent introduits, & d'ailleurs la dificulté du vers contraint quelquesfois de telle fa- [4] çon ceux qui n'ont la poesie de nature, & leur oste si bien la liberté du langage, & proprieté d'aucunes phrases, qu'ils sont contrains se retrancher en plusieurs bons discours, propres a expliquer l'effet & le sens de ce qu'ils ont enuie d'exprimer. Aquoy plusieurs des anciens Latins & modernes Italiens ayant égard ont mieux aimé se seruir de la prose, haussant & baissant leur stil, & amplifiant leurs discours selon la qualité, passion ou affection des personnages qu'ils representoyent en leurs comedies ou tragedies. Suyuant l'opinion desquels ie me suis auanturé de poursuyure ceste-cy à quelques heures de mon loisir, en laquelle i' ay pensé apres la vous auoir dediée de ma plus sincere affection, qu'y pourriez prendre quelque plaisir: d'autant qu'outre vostre vacation & exercice de Mars, auquel continuellement vous estes occupé pour le seruice du Roy & de la patrie, ie sçay par experience que vous [5] aymez parfaitement les bonnes lettres: ce qui fait tant reluire de vertus en vous que non seulement ceux qui ont cet heur de vous cognoistre, vous mettent au rang des premiers & plus valeureux de toute la Noblesse de ce Royaume: mais disent que telles perfections doyuent passer à vos neueux pour leur seruir d'exemplaire, imitant en cela la valeur de vos illustres parens & nobles ancestres, mesmement de vostre geniteur qui a si heureusement conduit les bandes Françoises estant colonnel d'vn regiment d'icelles, qu'à la fin auec honneur & toute loüange sa Majesté luy donna pour son merite le collier de son ordre. C'est ce qui m'a plus incité a le vous dedier, vous suppliant de la receuoir d'aussi bon coeur que ie suis & seray toute ma vie

Vostre bien humble & deuotionné seruiteur, L.I.

+Sonnet en faueur de l'Auteur.

Au mesme sieur, autre Sonnet.

+Qvatrain de P. de Ronsard.

Avtre de I. d'Avrat poete dv Roy.