[Meester Foreest van Rabaten, ende Giotten Schilder...]

Meester Foreest van Rabaten, ende Giotten Schilder, t'samen van Mugnello keerende, beschampen d'een d'anders mismaecktheyt. Daer men by zien can hoe eener die op een ander wat segghen wil, sy selven eerst wel doormercken moet.

MEester Foreest, ende Giotto hadden in Mugnello hare Hoeven, ende Meester Foreest de sijne wesende gaen bezien, in die tijden des Somers datter Vacantien int Hof zijn, ende op een quaet huerpeerdeken mogelijc keerende, heeft hy den voorseyden Giotto gevonden, die oock op de sijne gheweest zijnde nae Florencien keerde. Dewelcke noch te peerde, noch int habijt niet veel beeters als hy ghestelt weesende als twee bedaechde luyden, d'een d'ander gheselschap houdende, ende properlijcxkens aenrijdende, ist gheschiet als wy dickwils inden Somer zien ghebeuren, dat heur eenen schielijcken reeghen overvallen heeft, den welcken sy soo haest als sy conden, int huys van eenen Landtman hun beyden bekent, ontweken zijn, dan na een wijle tijdts den reghen gheen ghelaet thoonende van op te willen houden, ende dese binnen Florencen willende wesen, hebben sy van den Lantman twee oude mantels van dees graeuwe saergien, ende twee hoeden al cael van outheydt, om dat hyer geen beter en hadde, ontleendt, ende hebben hun op de wech begheven. Nu wat voort gereden zijnde, ende hun selven daer naer becladt ende beslijckt ziende, door het spritselen dat de peerden al gaende veroorsaecken een dinghen dat niet ghewoon is den mensche eerlijcker te maecken, het weer wat opgeclaerdt, soo datse wat t'saemen begonden te couten. Dan Meester Foreest al rijdende ende hoorende Giotto die een man seer wel ter taelen was, heeft hy hem aengezien, ende vanden hoofde totten voeten toe door-keecken. Ende ziende dat hy soo vuyl ende soo leelijck was, sonder op hemselven te letten wie hy was, begonde hy te lacchen, ende te seggen: Giotte meynt ghy dat een vreemdelinck die u noydt ghezien en hadde, so hy te deser uren voor u quame, gelooven soude dat ghy den besten Schilder vander Wereldt waerdt, als ghy zijt? Wien Giotte eensgancx gheantwoort heeft: Mijn Heere ick dencke dat hy het ghelooven soude dat ghy maer uwen A. B. C. en wist. Het welcke meester Foreest hoorende, bekende hy sijn misverstant, ende hy bevant hem selven met sulcken Munte mede betaeldt te wesen, als hy sijne waere vercocht hadde.