6. Wat sult ghij doen ten eersten vermakene tot hooftwonden ?

Ick soude besien oft daer ware een simpele wonde alleene int vlees die geen wike1 van doene2 hadde. Soo soudic daer op leggen naden ouden meesters werck alleene, genet int witte vanden eije, waert inden somer. Maer inden winter, soo soudic die dodre ende twitte te gader slaen, maer naden niewe meesters werck alleene, genet in warmen wijne.

Maer die nieuwe practijke gaet al voort in die heelinge der wonden. Eerst dat haer aff geschoren ende wel al warm3 ende latent alsoo liggen totten derden dage. Maer ware die wonde diepe gesteken totten beene, soo soude men daer eene wiecke in steken, ende waer seer wijde open van vallene oft van frutsuringe van plompen dingen, soo soudic eene wike daer in leggen.