25. Wat salmen doen als die beenen vuyt sijn gedaen ?

Ic sal nemen saecht lijnwaet oft sijndael1 ende nettent naden ouden meesters in twee deel goeder olie van rosen ende een deel honich rosaet dat beijde wel gesuuert is ende dat wel geleet op dura mater ende die enden onder die canten gesteken vanden beene soo men alre saechste

mach. Ende vanden seluen soo giete1 ic die wonde vanden beene al vol, ende in die wonde vanden vleese soo legge ic wiken van olie van roosen ende doderen van eyeren te gader gemengt, ende op al dit soo legge ic een cleijn plaester genet int selue medicijn : dat dunct mij goet. Ende ic salue oijck die wonden met heeter olien van roosen omtrent.

Oft met desen defensiue aldus gemaect : olie rosaet ℥.ij. et s.2, bolus, armenicus, terra sigillata℥.s., ende wijn asijn, oftmen wille, .ʒ.ij., ende maect hier aff salue, ende daer ouergaende soo leg ic een plaester dat groot genoch is in wermen wijne genet. Ic binde dit wel daer op soo datter op blijue.