28. Waer aen suldij kennen oft dura mater gequetst is ?

Ic merke dat bij dat hij heuet groote seeringe int hooft ende taensichte root ende ontsteken om de leuende geesten dat daer loopen. Ende die oogen sijn blakende ende die tonge is ruwich om die corts. Ende quade verstandenissen ende gebrec des sins om die verstoringe1 des geestes ende brakinge des monts ende vele andere teekenen.