61. Wat salmen doen als die wonde doirgaet ende dat etter valt op diafragma oft bloet ?

Ick sal pijnen vuijt te doene dat bloet, soo dattet geen etter en worde, met dat ic den pacient neder keere op die wonde, maer het quaet vuijt doene ende te gecrijgene. Ende dan soo moetmen die wonde wiken alsoo voirscreuen is ende die wike genet in olien van roosen al warm ende doderen van eijeren, ende dit daer op geleet tot die wonde wel draecht.

Ende dan soo leetmen daer op een mundificatijff ende tot elken vermaken salmen den pacient ouer die wonde seer schudden om dat etter vuyt te crijgene. Ende en machment aldus nijet gesuueren, soo worpic binnen een lauatorium, dats een wasschinge, met eenre ciringen oft met eenre spuijten, gemaect van honich van roosen, mirre, fenegrieck, van bloemen, van witten wijn ende water gesoden : dat worp ic daer in ende dan soo hutsic tlichaem, ende dan soo keer ic den pacient ouer die wonde, ende soo schuddic weder vuijte tot elcken vermaken.