91. Wat suldij doen als dat kanebeen oft die vorke vander borst is gebroken?

Dat salmen besoeken oft dat een stic is onder dat ander gedoken. Ist niet gedoken, soo ist lichtelijc werc ende men heelet als een ander broke. Maer men effense alsmen best mach metten vingere ende metten duijme induwende, ende den erm op doen heffen, ist dat hij vuyt waert gebogen is, ende daer op leggen plaestren van warke ende witte vanden eije, ende daer inne die medicijne1 consolidatijff die voirseit is ende daer leg2 op een spalke in een cruijs aldus + ende cusseneelen ende een pelu van cleedren onder die oxele ende weder om die schouderen ende bindent met langen scrooden in een cruijs onder doxele ende weder omme de schouderen.