Refereyn*
Doe god end als menssche quam mensschen verblyden
25
Een vanden Pharizeeusen badt hem tdien tyden+
als dat hy met hem zoude commen Eten
dus in gheghaen zynde / naer lucas belyden
heeft Christus an des Pharizeeus tafel ghezeten
+ Ende ziet / Een vrauwe / (huer onverweten)
wesende Een zondaresse dier stede
dit verstaende / quam viereghelick onghemeten
en ghetooght heeft vulmaecte oetmoedeghe zede
5
vvant een vat vul aelbaestren brochte zou mede
ghevult met goeder zaluen / niet om verzoeten
staende achter by zyn voeten met weerdichede
met huer traenen beghonnen heeft wasschen zyn voeten
[p. 99]
end vp datse mochte huer goetwillicheyt boeten
10
metten haere huers hoofts Christus voeten ghedrooght
oock gheCust en ghezalft / met een eerlick groeten
ende neerstich vp huer knyekens daer toe ghepooght
Een vroom sterck ghelooue heeft zou wel ghetooght
elcken zondaere wesende Een speghel schoone
15
christus dit hebbende voorzienich gheOoght
heeft huer naer huer wercken ghegheuen te Loone
en sprack totter vrauwe / hy god in persoone
ghezeghelde woorden daer zo menich naer haect
Ghaet in vreden / hu ghelooue heeft hu zalich ghemaect /
20
Maer den pharizeeus ziende een dusdanich exploot
de ghuene die christum hadde tzynent ghenoodt
in hem zeluen / Es dus een zegghen gheschiet
Waert dat dese waere / Een prophete groot
hy zou zeker wel weten het Rechte bediet
25
Ia / en wat dat voor een wyf waere / of niet
die hem Raect / want zes zondaresse mespresen
Iesus hem andwoordende / zeyde Symon ziet
ick hebbe wat / dat ick hu wil zegghende wesen
vvel zeght meester / zeydhy / Christus sprack ten desen
30
Van een Rentmeester waerer twee schuldenaeren
deene schuldich in vyfhondert pennynghen gheResen
en die ander maer vichtich zoo int verghaeren
maer als zy niet machtich betaelynghe waeren
Bee ghescholden heeft ze quycte / Ter laetster myte
35
nv zeght my / welck van desen in tschults bezwaeren
Bemint hem meerst / met viereghen Apetyte /
+ Symon sprack / dien hy meerst heeft ghescholden quyte
bemindt hem meerst / dats een puer claer voortstel
doe christus hem voughende Te gheenen Respyte
sprack gherynghe / ghy hebt Rechte gheoordeelt en wel
5
maer totter vrauwe sprack hy troostbarich snel
daer huer ziele goet voetsels heeft huut ghesmaect
Ghaet in vreden hu ghelooue heeft hu zalich ghemaect /
Totter vrauwe zynde christus ghekeert ten anschauwe
van symon / zey tot hem / ziet ghy wel dees vrauwe
10
ick bem ghecommen in hu huus / maer ghy
ghaeft tot mynen voeten gheen watre / vp trauwe
maer dese heeft ghewasschen de voeten van my
met huer traenen / en ghedrooght metten haere der by
niet een Cussynghe en heb ick van hu ghecreghen
15
maer zou hier ghecommen zonder vphouden vry
es / om cussen mynder voeten ghewillich bedeghen
[p. 100]
myn hooft te zaluene waert ghij niet gheneghen
maer dese heeft ghezalft myn voeten int Leuen
daeromme Symon in dese eerdsche weghen
20
zegh ick hu / huer worden veel zonden vergheuen
want zou vele bemindt heeft warachtich ghebleuen
maer wien lettel vergheuen wordt / teeneghen stonden
die bemindt lettel / dies christus ditte beseuen
sprack tot haer / hu worden vergheuen veel zonden
25
die daer aten beghonsten in huer herten gronden
zegghen / Wie es ditte die in zulck bestieren
de zonden vergheeft / maer zylieden en vonden
van christo gheen andwoorde in gheender manieren
dan alleene totter vrauvve / doe spraecke hanthieren
30
zegghende alsvooren / God diet mueghende spraect
Ghaet in vreden / hu ghelooue heeft hu zalich ghemaect /
Princesselicke
Vrauvve spyts elcken kettere
al en vyndtmen hu name niet naer de Lettere
35
des helich Euangelion warachtich bequame
+ gheen / dan helighe doctueren bescryfuent nettere
dat maria magdalena was huwe name
ghecoren mePatronesse Eerzame
Als eenne van tbroederschap der drie zanttinnen
5
ghehouden binnen brugghe Tes openbaer faeme
By een partye die Rhetorycke beminnen
die deuotelick bidden met herte met zinnen
gode voor ons / om zalicheyt / tbidden niet slaect
dat wy oock die troostbaereghe woordekens winnen
10
Ghaet in vreden hu ghelooue heeft hu zalich ghemaect /
