[p. 129]
+ heeft tonser spoedt
een zuene ghebaerst bouen Natuere
dhemelssche duere // Men open ziet+
Zou brynght / ons vruecht / voor eeuvvich verdriet
5
Des vaders woordt es neder ghedaelt
in maria zyn dienstmaeght* Cleene
en vleesch gheworden daer onghefaelt
goddelick duerstraelt
ghenaemt iesus van Nasareene
10
dinghel ghemeene // hem alsoo hiet+
Duer hem / es gheel onsen paeys gheschiet
Dheere die alle dynck heeft vuldaen
heeft / een nieu dynck om troost ontfanghen
ons inder eerden gheschepen zaen
15
Een vrauvvelick graen+
die heeft een man in huer omvanghen
onse bedwanghen // hij breken Liet+
Zou brynght ons vruecht / voor eeuvvich verdriet
Dhemels en Constent begrypen daer
20
dat maria begreep eendrachtich
vvant in huer maegdelick buucxken vruchtbaer
drough zou voorwaer
van hemel eerde god almachtich
menssche warachtich // Te minder niet+
25
duer hem / es gheel onsen troost gheschiet
Der gramschaps kynderen waeren wy al
ballynghen huten hemel tsaemen
zuchtende inne der traenen dal
duer ons mesval
30
maer maria vry los van blaemen
tot onser vraemen // dits claer bediet+
zou brynght ons vruecht / Voor eeuvvich verdriet
Huut hu zal huutghaen staetter gheseyt
die heere zal in israel vvesen+
+ en vanden daeghe der eeuvvicheyt
met Magesteyt
wordt zyn huutghanck / schoon maeght ghepresen
vvy zyn ghenesen // Den Vyandt vliedt+
5
Duer hem es gheel onsen paeys gheschiet
[p. 130]
Iesus Christus ghebenedydt
huut een Liefmoedich vierich blaecken+
die es ghecommen om ons proffyt
en wan den strydt
10
omme den zondaers zaelich maecken
lof zonder slaecken // zyn moeder biedt+
Zou brynght ons paeys / voor eeuwich verdriet
Te Bethleem Als een huus des broods
ons zaelich voedsel was gheboren
15
die doolden inne die schaeuvve des doods
zynde vul noods
Te zouckene heeft hy vercoren
Duer hem es gheel onsen paeys gheschiet
20
Princesselicke Reyn moeder goet
gheel zuuer maghet hooghst verheuen
die den godszuene hebt vpghevoedt
moederlick vroedt
end hem oetmoedich by ghebleuen
25
Om ons troost gheuen // hu Consent Riedt+
Ghy brynght ons vruecht / voor eeuwich verdriet /
