[LXXIII] REFREYN  WAT baet nv tsien van mijnen ooghen  oft hem daenschouwen niet en greyt;  vs. 2    wat baet svolcx schoon woorden toghen,  en al haer spreken mi dunct misseyt; 5  wat baet mi veel spijsen voren gheleyt  daer kele noch tonge smake in en heeft,  wat baet mi der werelt vrolicheyt  ende mi tgebruyc gheen blijdtschap en gheeft.  voorwaer dus is met mi gheleeft, 10  al wat ic sie dat is mi cleene  bi v, daer al mijnen troost aencleeft,  want ghi sijt al die weerelt alleene.

vs. 2  greyt: behaagt; vgl. Vs. 29 en LXXIV, 35.

[p. 134]        Wat baet mi vriendelicheyt der menschen  ende niemant so vriendelic en is als ghi; 15  wat baet mi svolcx ionste oft wenschen  ende dijn ionste mi alderbequaemste sy;  [f. 100 r°] wat baet dat yemant wilde deelen mi  sijn siele, sijn eere, met lijue, met goede,  ende mi bequamer is verre en by 20  dminste dropelken van uwen bloede.  ghetrouwelic dus is mi te moede,  lief alderliefste, so lief noyt gheene,  bi v so blijft mijnder sielen hoede  want ghi sijt alle die weerelt alleene.    25      Dat ghi die werelt alleene sijt  daer stelt mijn herte redene naer,  en seyt dat ghi naer appetijt  sijt een spieghel van vrouwen claer.  ghi greyt mijn herte so wel voorwaer 30  dat ic so lieuen nye en ghewan  ende ooc so sueten, dats openbaer,  dat ic mi niet versaden en can.  bi desen so mach ic wel segghen dan:  al niet bi v, hoe suet hoe reene; 35  vruecht bouen vruechden mijn herte v yan,  want ghi sijt al die werelt alleene. [sluitstuk]    [f. 100 v°] Prince      Princesse, al tgeluyt van menschen tongen  is mi cleenen troost in mijnen weene  bi v, tis verloren gheseyt oft ghesongen, 40  want ghi sijt alle die werelt alleene. [houtsnede]