Die Evangelium van Mattheus.

Die I. Capittel.

I.) Die Geslagt-Register van Christus, 1-17. II.) Sie Ontvangnis van die heilig Geest, sie Naemen, en Geboorte van Jomfrouw Maria. 18-25.

Die Familie-Buk van Jesus Christus, die ha wees David sie Soon, die ha wees Abraham sie Soon. 2.Abraham ha teel Isaac; Isaac ha teel Jacob; maer Jacob ha teel Juda en sie Bruders. 3.Maer Juda ha teel Phares en Zara van Thamar; maer Phares ha teel Esrom; maer Esrom ha teel Aram. 4.Maer Aram ha teel Aminadab; maer Aminadab ha teel Naasson; maer Naasson ha teel Salmon. 5.Maer Salmon ha teel Booz van Rachab; maer Booz ha teel Obed van Ruth; maer Obed ha teel Jessai. 6.Maer Jessai ha teel Kooning David; maer Kooning David ha teel Salomon van Uria sie Vrow. 7.Maer Salomon ha teel Rhoboam; maer Rhoboam ha teel Abia; maer Abia ha teel Asa. 8.Maer Asa ha teel Josaphat; maer Josaphat ha teel Joram; maer Joram ha teel Ozias. 9.Maer Ozias ha teel Joatham; maer Joatham ha teel Achas; maer Achas ha teel Ezechias. 10.Maer Ezechias ha teel Manasse; maer Manasse ha teel Amon; maer Amon ha teel Josias. 11.Maer Josias ha teel

Jechonias en sie Bruders, omtrent na die Tid van die Gevangnis van Babylon. 12.Maer aster die Gevangnis van Babylon Jechonias ha teel Salathiel; maer Salathiel ha teel Zorobabel. 13.Maer Zorobabel ha teel Abiud; maer Abiud ha teel Eliachim; maer Eliachim ha teel Azor. 14.Maer Azor ha teel Zadoch; maer Zadoch ha teel Achim; maer Achim ha teel Eliud. 15.Maer Eliud ha teel Eleazar; maer Eleazar ha teel Matthan; maer Matthan ha teel Jacob. 16.Maer Jacob ha teel Joseph, die Man van Maria; van hem Jesus bin gebooren, die wordt genaemt Christus. 17.Daerom almael die Leden van Abraham tee na David bin veertien Leden; en van David tee na die Gevangnis van Babylon bin veertien Leden; en van die Gevangnis van Babylon tee na Christus bin veertien Leden. 18.II) Maer die Geboorte van Jesus Christus ha wees soo: dietit sie Muder Maria ha wees beloovt mit Joseph, eer sellie ha kom malkander, hem ha wordt bevonden for wees swanger van die heilig Geest. 19.Maer sie Man Joseph, die ha wees regtveerdig, en no ha wil maek hem Skaem ha wil skej van hem, sonder Volk sal weet die. 20.Maer dietit hem ha denk soo, kik een Engel van die Heer ha verskien voor hem na binne een Droom, en ha seg: Joseph, David Soon! no bang for neem ju Vrow Maria; want wat ka ontvang na binne hem, bin van die heilig Geest. 21.Maer hem sal baer een Soon, en ju sal ruep sie Naem Jesus; want hem sal verlos sie Volk van sender Sonden. 22.Maer al dat ka gebeer, dat die sal kom vervylt, wat die Heer ka seg door die Propheet, die seg: 23.Kik een Meissje sal kom mit Kind, en sal baer een Soon, en sellie sal ruep sie Naem Emanuel, die bin, na ons Tael: Godt mit ons. 24.Maer dietit Joseph ha hoppo yt van sie Slaep, hem ha due als die Heer sie Engel ha ka belast hem; en hem ha neem sie Vrow. 25.En hem no ha beken hem, tee hem ha ka baer sie eerst-gebooren Soon, en hem ha ruep sie Naem Jesus.

Die II. Capittel.

I.) Die Wiesen bid Christus an, 1-12. II.) Joseph vlygt na Egipten mit Maria en die Kind, 13-15. III.) Herodes lastaen maek doot die Bethlehemitis Kinders, 16-18. IV.) Jesus kom na Nazareth, 19-23.

Maer dietit Jesus ha wees gebooren na binne Bethlehem in Judea, na die Tid van Kooning Herodes, kik Wiesen van Oost ka kom na Jerusalem, en ha seg: 2.Waer hem bin, die bin gebooren die Kooning van die Jodden? want ons ka kik sie Ster in die Oost, en ons ka kom for bid hem an. 3.Maer dietit Kooning Herodes ha hoor dat, hem ha verskrik, en al Jerusalem mit hem. 4.En aster hem ha ka vergaeder die hoog Priesters en Skriftgeleerden van die Volk, hem ha vraeg sender, waer Christus sal wordt gebooren. 5.Maer sellie ka seg na hem: na binne Bethlehem in Judea; want soo die Propheet ka skriev: 6.En ju Bethlehem in Juda Land, levendag ju bin die kleinste tyssen die Vorsten van Juda; want van ju sal kom een Voorst, die sal vuet mie Volk Israel. 7.Soo Herodes ha ruep die Wiesen sutje, en ha vraeg gu hart van sender, wattit sellie ha ka kik die Ster. 8.En hem ha stier sender na Bethlehem, en ha seg : jellie reis na daesoo, en vraeg gu hart van die Kind; en als jellie ka vind die, kom seg dat na mie, dat mie kan kom ookal, en bid hem an. 9.Maer aster sellie ha ka hoor die Kooning, sellie ha loop wej; en kik die Ster, die sellie ha ka kik in die Oost, ha loop voor sender, tee die ka kom, en ka staen na boven over, waer die Kind ha wees. 10.Maer dietit sellie ka kik die Ster, sellie ha kom over blie. 11.En sellie ha loop na binne na die Hus, en ha vind die Kind, en sie Muder Maria, en sellie ha val na die Grond, en ha bid an die Kind, en ha open sender kostbar Gut, en ha offer Geskenk na hem, Goud, en Wierook, en Myrrha. 12.En dietit Godt ka waerskow sender na binne een Droom, dat sellie no ha sal draej weeran na Herodes, sellie

ha loop na een ander Pad na sender Land. 13.II.) Maer aster sellie ha ka loop wej, kik die Engel van die Heer ha openbaer sie selv voor Joseph na binne een Droom, en ha seg: hoppo, en neem die Kind mit sie Muder, en vlygt na Egipten, en bliev daesoo tee mie seg na ju; want Herodes sal suek die Kind, for maek hem doot. 14.Maer hem ha hoppo, ha neem die Kind en sie Muder na Donker, en ha vlygt na Egipten. 15.En hem ha bliev daesoo tee Herodes ha ka doot; dat die ha sal vervylt, wat die Heer ha ka seg door die Propheet, die seg: mie ka ruep mie Soon van Egipten. 16.III.) Dietit Herodes ha kik nu, dat die Wiesen ha ka bedrieg hem, hem ha kom gu qvaed; en ha stier yt, en ha lastaen maek doot almael Kinders, die ha wees na binne Bethlehem, en na al die Land daesoo, van twee Jaer oud en daeronder, aster die Tid hem ha ka ondersuek die van die Wiesen. 17.Dan die ka vervylt, wat die Propheet Jeremias ka seg, die seg: 18.Een Stem ka hoor na binne Rama, Kries, Skreew, en gu Hyelen: Rachel kries voor sie Kinders, en no wil wees getroost, voordiemaek sellie no bin. 19.IV.) Maer dietit Herodes ha ka sterv, kik dan die Engel van die Heer ha openbaer sie selv voor Joseph na binne een Droom in Egipten, en ha seg: 20.Hoppo, neem die Kind mit sie Muder, en loop heen na die Land van Israel; want sellie ka doot, die ka suek die Leven van die Kind. 21.Maer hem ha hoppo, ha neem die Kind, en sie Muder, en ha kom na die Land van Israel. 22.Maer dietit hem ka hoor, dat Archelaus ha wees Kooning in Judea, na Plek van sie Vaeder Herodes, hem ha bang vor kom daesoo; maer Godt ha waerskow hem na binne een Droom, en hem ka loop na een Plek van die Land Galilea. 23.En hem ka kom, en ka woon na binne een Stad, die hiet Nazareth; dat die sal kom vervylt, wat die Propheeten ka seg, dat sie Naem sal wordt genaemt Nazareus.

Die 3. Capittel.

I.) Johannes preek, doop en Vermaen, 1-12. II.) Johannes doop Jesus. 13-17.

Maer na die selve Tid Johannes die Dooper ka kom, die ha preek na die Wusteine van Judea, en ha seg: 2.Bekeer jender; want die Hemelrik ka kom diestebie. 3.Want hem bin die, van die Propheet Jesaias ka spreek van, en seg: die bin sie Stem, die ruep na binne die Wusteine: berej die Weg van die Heer, maek sie Paden regt. 4.Maer die selve Johannes sie Kleed ha wees van Cameel-Haer, en hem ha hab een Leer-Band ront sie Heep; maer sie Jeet ha wees Springhaenen, en wild Honing. 5.Soo Jerusalem ha loop yt na hem, en die heel Judea, en al die Land, die leg rontom Jordan. 6.En hem ha doop sender na binne Jordan, en sellie ha beken sender Sonden. 7.Maer dietit hem ha kik, dat veele Phariseewen en Saduseewen ha kom na sie Doop, hem ha seg na sender: jellie Adder Kinders! wie ka leer jender for vlygt van die Toorn, die sal kom? 8.Daerom draeg Vrygten, die behoor na die Bekeering. 9.En no denk, dat jellie ha wil seg bie jender selv; ons hab Abraham voor ons Vaeder; want mie seg na jender; dat Godt kan wek op Abraham Kinders van deese Steenen. 10.Maer die Biel leg klaer ookal na die Wortel van die Boomen; daerom elk Boom, die no draeg gueje Vrygt, sal wordt afgekapt, en gegoojt na binne die Vier. 11.Mie doop jender wel mit Water tot Bekeering; maer hem, die kom aster mie, bin meer magtig, als mie, en mie no bin waerdig for draeg sie Skuen, hem sal doop jender mit die heilig Geest en mit Vier. 12.Sie Koorn-Skop bin na sie Hand, en hem sal veeg die Vluer van sie Koorn-Hus, en hem sal bring teesaemen sie Koorn na binne die Koorn-Hus; maer die Skel hem sal verbrand mit Vier, die no sal yt levendag. 13.II.) Soo Jesus ha kom van Galilea na Jordan na Johannes, for wordt gedoopt van hem. 14.Maer Johannes ha weiger

die gu, en ha seg: mie hab noodig, for ju sal doop mie, en ju kom na mie? 15.Maer Jesus ha antwoordt, en ha seg na hem: lastaen die nu soo; want die behoor ons for volkom al Geregtigheid. Soo Johannes ha laet die tu. 16.En dietit Jesus ha wees gedoopt, hem ha loop yt anstonds van die water; en kik, die Hemlen ha open voor hem, en hem ha kik die Geest van Godt kom na molee als een Diefje, en ha kom over hem. 17.En kik, een Stem van die Hemel ha seg: Dees bin mie lieve Soon, na die mie hab groot Behaeg.

Die 4. Capittel.

I.) Die Dievel versuek Christus, 1-11. II.) Christus loop wej van Judea, en woon na Capernaum, 12-16. III.) Hem preek, 17. ruep vier Apostlen, 18-22. IV.) leer en genees, 23-25.

Soo die Geest ha bring Jesus na binne die Wusteine, dat die Dievel sal versuek hem. 2.En dietit hem ha ka vast veertig Dagen en veertig Nagts, hem na kom hongrig. 3.En die Versuker ha loop na hem, en ha seg: als ju bin Godt sie Soon, soo seg, dat deese Steenen draej Brood. 4.Maer hem ha antwoordt, en ha seg: die ka skriev: die Mens no leev van Brood alleen, maer van elk Woord, die loop yt Godt sie Mond. 5.Soo die Dievel ha neem hem mit sie na die heilig Stad, en ha set hem na bobo die Top van die Tempel, en ha seg na hem: 6.Als ju bin Godt sie Soon, soo gooj ju selv hiersoo na molee, want die ka skriev: Hem sal giev sie Englen Beveel van ju, dat sellie sal draeg ju na Handen, dat ju no sal stoot ju Vut na niet een Steen. 7.Soo Jesus ha seg na hem: die ka skriev ookal: ju no sal versuek die Heer ju Godt. 8.Weeran die Dievel ha neem hem mit sie na bobo een gu hoog Berg, en ha wies hem almael die Kooningriken van die Weereld mit sender Heerligheid en ha seg na hem: 9.Al dat mie wil giev na ju, als ju wil val neer, en bid mie an. 10.Soo Jesus ha seg na hem: skeer wej Satan! Want die ka skriev: ju sal bid an

die Heer ju Godt, en dien hem alleen. 11.Soo die Dievel ha lastaen hem; en kik, die Englen ha kom, en ha dien hem. 12.II.) Maer dietit Jesus ha ka hoor, dat sellie ka leever Johannes over na binne Gevangnis, hem ha loop wej na die Land van Galilea. 13.En dietit hem ha ka loop wej van Nazareth, hem ha kom en ha woon na Capernaum, die leg bie die See, na binne die Land-deel van Zabulon en Nephthalim: 14.Dat die sal kom vervylt, wat die Propheet Jesaias ka seg, dietit hem seg: 15.Die Land van Zabulon en Nephthalim bie die See Pad na deese Sie van Jordan, die bin Galilea van die Heidens; 16.Die Volk, die ka sit na binne Dysternis, ka sien een groot Ligt, en een Ligt ka hoppo voor sender, die ka sit na die Land en Shadyw van die Dood. 17.III.) Van dietit Jesus ha begin for preek, en for seg: bekeer jender, want die Hemelriek ka kom diestebie. 18.Maer dietit Jesus ha loop na die See van Galilea, hem ha kik twee Bruders, Simon, mit die Naem Petrus, en Andreas sie Bruder, die ha gooj sender Net na binne die See; want sellie ha wees Vissermans; 19.En hem ha seg na sender: volg mie, mie sal maek jender Vissermans van Mensen. 20.Maer sellie ha lastaen sender Net anstonds, en ha volg hem. 21.En dietit hem ha loop voort van daesoo, hem ha kik twee ander Bruders, Jacobus, die Soon van Zebedeus, en Johannes sie Bruder na binne die Skip met sender Vaeder Zebedeus, dat sellie ha lap sender Net; en hem ha ruep sender. 22.Maer sellie anstonds ha verlaet die Skip, en sender Vaeder, en ha volg hem. 23.IV.) En Jesus ha loop ront die geheel Galilea, ha leer na binne sender Skolen, en ha preek die Evangelium van die Rik, en ha genees al Siekte, en al Swakheid onder die Volk. 24.En sie Naem ha kom yt over al Syria: en sellie ha bring na hem sender almael, die ha wees siek van al sort Siekte en Plaegen, en die Beseten, en die Maensieken, en Lamen; en hem ha genees sender. 25.En veel Volk ha volg hem van Galilea, en Decapolis, en Jerusalem, en Judea, en van die ander Sie van Jordan.

Die 5. Capittel.

I.) Jesus leer na bobo die Berg, welk Mensen bin saelig, 1-12. II.) van gueje Werken en die Wet, 13-20. III.) leg van die veifde Gebod yt, 21-26. IV.) van die Sesde 27-32. V.) van die tweede 33-37. VI.) weeran van die veifde, 38-48.

Maer diedit Jesus ha kik die Volk, hem ha loop na bobo een Berg; en aster hem ha ka sit neer, sie Disciplen ha loop na hem: 2.En hem ha open sie Mond, ha leer sender, en ha seg: 3.Saelig bin die geestlig Povers; want die Kooningrik van die Hemel bin van sender. 4.Saelig sellie bin, die treer; want sellie sal wordt vertroost. 5.Saelig bin die Sagtmuedigen; want sellie sal erv die Aerde. 6.Saelig sellie bin, die honger en dorst nae Geregtigheid; want sellie sal kom vesaedigt. 7.Saelig bin die Barmhertigen; want sellie sal vind Barmhertigheid. 8.Saelig bin die Skoon van Harten; want sellie sal kik Godt. 9.Saelig bin die Vreedsamen; want sellie sal hiet Kinders van Godt. 10.Saelig sellie bin, die sellie vervolg voor die wille van Geregtigheid; want die Hemelrik bin van sender. 11.Saelig jellie bin, als sellie bespot en vervolg jender, en praet allerlej Qwaet tegen jender om die wille van mie, en lieg. 12.Wees blie en verheeg jender, want jender Loon sal wees mussie na binne die Hemel; want soo sellie ka vervolg die Propheeten, die ha wees voor jender. 13.II.) Jellie bin die Sout van die Aerde; maer als die Sout verloor sie Kragt, mit wat ons sal sout? die no deeg voor niet een gut meer, als for gooj die Wej, en Volk sal trap na bobo die. 14.Jellie bin die Ligt van die Weereld; die Stad, die leg na bobo een Berg no kan for wees onsienlig. 15.Volk no steek op een Keers ookal, en set die na onder een Skepel, maer na binne een Kandelaer; soo die giev Ligt voor sender almael, die bin na binne die Hus.

16.Lastaen jender Ligt skien soo voor die Mensen, dat sellie kik jender gueje Werken, en pries jender Vaeder, die bin na binne die Hemel. 17.Jellie no mut denk, dat mie ka kom for los die Wet, en die Propheeten; mie no ka kom for los, maer for volkom. 18.Want, waerwaer mie seg na jender: tee die Hemel en die Aerde vergaen, niet die kleinste Letter ookal, of Stippeltje van die Wet sal vergaen, eer almael die gut ka gebeer. 19.Daerom, die die los een van deese kleinste Geboden, en leer die Volk soo, hem sal wordt genaemt die kleinste na die Hemelrik; maer die die due en leer dat, sal wordt genaemt groot na binne die Hemelrik. 20.Want mie seg na jender: als jender Geregtigheid no kom meer beeter, als die van die Skriftgeleerden en Phariseewen, jellie no sal kom na binne die Hemelrik levendag. 21.III.) Jellie ka hoor, dat die ha wordt gesegd na die Ouden; ju no sal maek doot, maer die maek doot, sal wees skyldig voor die Regt. 22.Maer mie seg na jender, dat elk een, die bin qvaed na sie Bruder voor soosoo, sal wees skyldig voor die Regt; maer die seg na sie Bruder: Raka! sal wees skyldig voor die Raed; maer die seg: ju Sot; sal wees skyldig na die Vier van die Hel. 23.Daerom, als ju offer ju Gaev na bobo die Altar, en denk op daer, dat ju Bruder hab een gut tegen ju, 24.Soo lastaen ju Gaev bliev voor die Altar, en loop heen for maek Maet mit ju Bruder eerst, en kom asteran en offer ju Gaev. 25.Wees gewillig for maek op gaw mit ju Tegenpartie, soolang ju bin mit hem na die Pad nogal; dat ju Tegenpartie no sal leever ju over na die Regter, en die Regter sal leever ju over na die Dienaer, en sellie sal gooj ju na binne die Gevangnis. 26.Waerwaer mie seg na ju: ju no sal kom yt van daesoo, eer ju ka betael die leste Penning. 27.IV.) Jellie ka hoor, dat die ka seg na die Ouden: ju no sal huer. 28.Maer mie seg na jender, dat elk een, die kik na een Vrow, for begeer hem, ka huer skoon mit hem na binne sie Hart. 29.Maer, als soo bin, dat ju regter Oog erger ju, trek die yt, en gooj die van ju; die bin meer dienlig voor ju, dat een van ju Leden vergaen, als dat sellie sal gooj ju heel Likam na binne die Hel.

30. En als ju regter Hand erger ju, kap die af, en gooj die van ju; want die bin meer nyttig voor ju, dat een van ju Leden vergaen, als dat sellie sal gooj ju heel Likam na binne die Hel. 31.Maer die ka seg, dat die skej van sie Vrow, sal giev een Skei Brief na hem. 32.Maer mie seg na jender: die skei van sie Vrow, sonder voor Huer Skyld, hem due, dat hem bedriev Huer; en die trow een, die ka skej, hem huer ookal. 33.V.) Jellie ka hoor verder, dat die ka seg na die Ouden: ju no sal sweer vals, maer ju sal how die Heer ju Eed. 34.Maer mie seg na jender, dat jellie geheel niet sal sweer, no bie die Hemel, diemaek die bin die Stuel van Godt, 35.Nog bie die Aerde, diemaek die bin sie Vut-Bank; nog bie Jerusalem, diemaek die bin die groot Kooning sie Stad. 36.Ju no sal sweer bie ju kop ookal; die maek ju no kan maek een Haer wit of swart. 37.Maer jellie Woord sal wees Ja, Ja, Neen, Neen; maer wat bin boven die, bin van die Boose. 38.VI.) Jellie ka hoor, dat die ka seg: Oog voor Oog! en Tand voor Tand! 39.Maer mie seg na jender, dat jellie no mut staen tegen die boose; maer, als een giev ju een Slaeg na ju regter kaek, draej die ander na hem ookal. 40.En als een Volk wil regt mit ju, en neem ju Rok, lastaen hem how ju Mantel ookal. 41.En, als een Volk wil dwing ju for loop een Miel, loop twee mit hem. 42.Giev na hem, die bid ju; en no draei ju af van hem, die wil leen van ju. 43.Jellie ka hoor, dat die ka seg: ju sal hab ju Naeste lief, en haet ju Vieand. 44.Maer mie seg na jender: hab jender Vieanden lief, segen sender, die Vluek jender, due gued na sender, die haet jender, en bid voor sender, die due jender Skaede, en verfolg jender. 45.Dat jellie sal wordt Kinders van jender Vaeder, die bin na binne die Hemel, want hem lastaen sie Son hoppo over die qwaeje en gueje, en hem lastaen sie Reegen val over die regtveerdigen en onregtveerdigen. 46.Want als jellie hab sender lief, die hab jender lief, wat Loon jellie krieg daen? Die Tollenars ook no due soo? 47.En als jellie gruet jender Bruders alleen, wat jellie hab

dan voor Overvlued? Die Tollenars ook no due soo? 48.Daerom jellie sal wees volkomen, glik jender Vaeder, die bin na binne die Hemel, bin volkom.

Die 6. Capittel.

I.) Jesus praet van Almisse, 1-4. II.) van die Gebed, 5-15 III.) van Vasten, 16-18. IV.) for hoop op Skat na binne die Hemel, 19-23. V.) no for dien Mammon, 24-34.

Pas op jender Almis, dat jellie no due die voor die Mensen, for wordt angesiet van sender; onoso jellie ho hab Loon bie jender Vaeder, die bin na binne die Hemel. 2.Nu dietit ju giev Almis, ju no sal lastaen blaes na Trompet voor ju, als die Hyklars due na binne die Skolen, en op die Straeten, dat sellie kan hab Eer van die Mensen; waerwaer mie seg na jender; Sellie hab sender Loon wej. 3.Maer, als ju giev Almis, no lastaen ju slinker Hand weet, wat ju regter Hand due; 4.Dat ju Almis kan wees verborgen: en ju Vaeder, die kik na verborgen, sal betael ju openbar. 5.II.) En, als ju bid, ju no sal wees als die Hyklars, die staen gern for bid na binne die Skolen, en na die Huken van die Straeten, dat Volk kan sien sender an: waerwaer mie seg na jender, dat sellie hab sender Loon wej. 6.Maer, dietit ju bid, loop na binne ju Kamer, tue ju Door, en bid na ju Vaeder, die bin in Verborgen; en ju Vaeder, die kik in Verborgen, sal betael ju openbar. 7.Maer, als jellie bid, jellie no sal gebryk iedel woorden, als die Heidens; want sellie denk, dat sellie sal wordt verhoort, als sellie gebryk veele woorden. 8.Daerom jellie no mut maek jender selv glik mit sender; want jender Vaeder weet, wat jellie mankeer, eer jellie bid hem. 9.Daerom jellie sal bid soo: Ons Vaeder, ju die bin na binne die Hemel! ju Naem wordt geheiligt. 10.Ju Kooningrik kom; ju Wil geskiedt na Aerde, glik als na binne die Hemel; 11.Giev ons van dag ons daglig Brood;

12.En vergeev ons ons Skyld, soo glik ons vergeev ons Skyldenars; 13.En no lej ons na binne Versuking; maer verlos ons van die Qwaet; want van ju bin die Kooningrik, en die Kragt, en die Heerligheid tee na die Ewigheid. Amen. 14.Want als jellie vergeev die Mensen sender Val, jender Vaeder sal vergeev jender ookal jender Val. 15.Maer, als jellie no vergeev die Mensen sender Val, jender Vaeder no sal vergeev jender ookal jender Val. 16.III.) Maer, als jellie vast, jellie no sal kik sier, glik als die Hyklars; want sellie verdraej sender Angesigt, for Volk kan kik, dat sellie vast; waerwaer mie seg na jender, dat sellie hab sender Loon wej. 17.Maer, dietit ju vast, salv ju kop, en was ju Angesigt; 18.Dat die Mensen no sal kik ju vast, maer ju Vaeder, die bin in Verborgen; en ju Vaeder, die kik in Verborgen, sal betael ju openbar. 19.IV.) Jellie no sal hoop op Skat na bobo die Aerde, waer die Mot en Rust bederv, en waer Dieven brek door, en steel die: 20.Maer hoop op voor jender een Skat na binne die Hemel, waer Mot en Rust no kan bederv die, en waer Dieven no kan brek door, en steel die. 21.Want, waer jender Skat bin, daer jender Hart sal wees ookal. 22.Die Oog bin die Ligt van die Likam; daerom, als ju Oog bin eenvoudig, soo ju geheel Likam sal wordt Ligt; 23.Maer, als ju Oog bin boos, ju geheel Likam sal wees donker: daerom, als die Ligt, die bin na binne ju, bin Dysternis, hu groot die Donker sal kom dan? 24.V.) Niemand kan for dien twee Heeren; want hem sal haet die een, en hab die ander lief, of hem sal bliev na die een, en veragt die ander: Jellie no kan dien Godt en Mammon. 25.Daerom mie seg na jender: no sorg voor jender Leven, wat jender sal jeet, en wat jellie sal drink; ook niet voor jender Likam, wat jellie sal due an. Da als die Leven no bin meer als die Jeet, en die Likam meer als die Kleeren? 26.Kik na die Voglen van die Hemel, sender no saej, sender no maej, en sender no bring tee saemen na Koornhusen, en jender hemels Vaeder vuet sender; jellie no bin veel meer als sender? 27.Maer wie van jender kan maek sie selv een El meer

lang, maskee hem bin verleegen voor die? 28.En, wat maek jellie sorg voor die Kleeren? kik na die Lilien op die Veld, husoo sender gruej, sender no werk, en sender no spin. 29.Maer mie seg na jender, dat Salomon selv in al sie Heerligheid no ha ka kleedt glik als een van sender. 30.Als Godt dan kleedt die Gras soo na die Veld, die staen van Dag, en sellie gooj die na die Oven morgen, hem no sal kleedt jender veel meer, jellie kleingloovigen? 31.Daerom jellie no sal sorg, en seg: wat ons sal jeet? of: wat ons sal drink? of mit wat ons sal kleedt ons? 32.Want na al dat die Heidens suek. Die maek jender hemels Vaeder weet, dat jellie hab almael die gut noodig. 33.Maer suek eerst die Kooningrik van Godt, en sie Geregtigheid, en almael die gut sal wordt jender tugelegt: 34.Daerom, no wees verlegen voor die ander Morgen; want die Dag Morgen sal sorg voor sie selv, die bin gnug, dat elk Dag hab sie eigen Plaeg selv.

Die 7. Capittel.

I.) Christus praet van oordel, en for vind Vout bie ander, 1-6. II.) for bid, 7-11. van die Hoofd-Sum van die Wet, 12. III.) van die nauwe Poort, 13-14. IV.) van valse Propheeten en Hyklars, 15-23. V.) eindig sie Predikasje, 24-29.

No oordeel, dat jellie no sal wordt geoordeelt; diemaek mit die oordeel, jellie oordeel, jellie sal wordt geoordeelt: 2.En mit die Maet jellie meet, sellie sal meet na jender weeran. 3.Maer husoo ju kik die Splinter na binne die Oog van ju Bruder, maer ju no kik die Balk, die bin na binne ju eigen Oog? 4.Of hu ju derv for seg na ju Bruder: wag! mie sal trek die Splinter yt van ju Oog; en kik, die hab een Balk na binne in Oog? 5.Ju Hyklar! trek eerst die balk yt van ju Oog, en kik dan, dat ju kan neem die Splinter yt van ju Bruder sie Oog. 6.No giev die heilig gut na die Honden; en no gooj jender Perlen voor die Verkens; dat sender no sal trap die mit

sender Vutten, en draej, en verskeer jender. 7.II.) Bid, en jellie sal krieg; suek, en jellie sal vind; klop, en die sal open voor jender. 8.Diemaek, hem, die bid, krieg, en hem, die suek, vind, en voor hem, die klop, sal wordt open gemaekt. 9.Of wie van jender, als sie Soon bid hem voor Brood, sal giev na hem een Steen? 10.En als hem bid hem voor een Vis, sal giev na hem een Slang? 11.Als jellie dan, die bin boos, weet for giev gueje Gaeven na jender Kinders, hu veel meer jender Vaeder, die bin na binne die Hemlen, sal giev gueje Gaeven na sender, die bid hem? 12.Daerom, al wat jellie wil, dat die Mensen sal due na jender, jellie due dat na sender ookal; want soo die Wet en die Propheeten bin. 13.III.) Loop na binne door die nauwe Poort; voordiemaek die Poort bin wied, en Pad bin breed, die bring na die Verdumnis, en sellie bin veele, die loop na binne door die. 14.Voordiemaek die Poort bin nauw, en die Pad bin smal, die bring na die Leven, en sellie bin weinig, die vind die. 15.IV.) Maer neem jender in agt voor die valse Propheeten, die kom na jender in Skaeps Kleeren, maer inwendig sellie bin verskeerend Wolven. 16.Van sender Vrygten jellie sal ken sender; Volk kan pik Drief van Steekel, of Vigie van Distel? 17.Soo elk gued Boom draeg gueje Vrygten, maer een verrot Boom draeg qwaeje Vrugten. 18.Een gued Boom no kan draeg qwaeje Vrygten, en een verrot Boom no kan draeg gueje Vrygten. 19.Elk Boom, die no draeg gueje Vrygt, sal kap af, en gooj na binne die Vier. 20.Daerom jellie sal ken sender na sender Vrygten. 21.Niet elk een, die seg na mie: Heere! Heere! sal kom na binne die Hemelrik; maer hem, die due die wil van mie Vaeder, die bin na binne die Hemel. 22.Na die Dag veele sal seg na mie: Heere! Heere! ons no ka propheteer in ju Naem? en ons no ka driev yt Dievlen in ju Naem? en ons no ka due mussie kragtig Werken in ju Naem? 23.En dan mie wil beken voor sender: Mie no ka ken jender levendag; skeer van mie, jellie, die due onregt! 24.V.) Daerom, hem, die hoor deese mie Woord, en due

aster die, mie wil verglik hem mit een verstandig Man, die ka bow sie Hus na bobo een Klip. 25.En dietit die Stort-Reegen, en die Water-Stroomen ha kom, en die groot Wind ha waej, en ha stoot an tegen die selve Hus, die no ha val; voordiemaek die ka bevestig na bobo een Klip. 26.En elk een, die hoor deese mie Woord, en no due aster die, hem bin glik een sot Man, die ka bow sie Hus na bobo Sand. 27.En dietit die stort Reegen, en die Water Stroomen ha kom, en die groot Wind ha waej, en ha stoot an tegen die selve Hus, die ha val, en sie Val ha wees groot. 28.En die ka gebeer, dietit Jesus ha ka maek Einde na deese Reden, die Volk ha verwonder sender gu over sie Leer. 29.Diemaek hem ha leer sender, als een, die ha hab Magt, en no soo als die Skrift-geleerden.

Die 8. Capittel.

I.) Christus genees een Lazares Siek, 1-4. II.) Die Knegt van die Hoofdman, 5-13. III.) Die Skoon-Muder van Petrus, en ander, 14-17. IV.) spreek van sie Naevolging, 18-22. V.) stil die Wind en die See, 23-27. VI.) skeer Dievlen yt, en laet sender die tu, for vaer na binne die Verkens, 28-34.

Maer dietit Jesus ha loop neer van die Berg, veele Volk ka volg aster hem. 2.En kik een Lazares Siek ha kom, ha bid hem an, en ha seg: Heere, als ju wil, ju kan genees mie. 3.En Jesus ha streek yt sie Hand, ha ruer hem an, en ha seg: mie wil; kom rein! en anstonds hem ka kom rein van sie Lazares Siekte. 4.En Jesus ha seg na hem: kik tu, dat ju no seg die na niet een Volk; maer loop heen, wies ju selv na die Priester, en offer die Gaev, die Moses ka belast tot een Getiegnis over sender. 5.II.) Maer dietit Jesus ha loop na binne Capernaum, een Hoofdman ha kom na hem, en ha bid hem, en ha seg: 6.Heere! mie Knegt leg na hus lam heel, en lie mussie Pien. 7.En Jesus ha seg na hem: mie wil kom, en genees hem. 8.Maer die Hoofdman ha antwordt en ha seg: Heere, mie no bin waerdig, dat ju sal

loop na binne onder mie Dak; maer seg een Woord alleen, dan mie Knegt sal kom gesond. 9.Want mie bin ook een Mens, die bin onder die Magt, en hab Soldaeten onder mie selv: en als mie seg na die een: loop! soo hem loop; en na die ander: kom! soo hem kom; en na mie Knegt: due dat! soo hem due die. 10.Maer dietit Jesus ha hoor dat, hem ha verwonder sie selv, en ha seg na sender, die ha volg: waerwaer mie seg na jender: mie no ka vind soo groot Gloof na binne Israel selv. 11.Maer mie seg na jender: veele sal kom van Oost en van West, en sal sit na Taefel mit Abraham, Isaac en Jacob na binne die Hemelrik. 12.Maer die Kinders van die Rik, sellie sal gooj sender na die byttenste Dysternis; daer sal wees Kries en Knersing van Tanden. 13.En Jesus ha seg na die Hoofdman; loop heen, en die geskiedt ju, soo als ju ka gloov! en sie Knegt ha kom gesond na die selve yer. 14.III.) En Jesus ha kom na binne die Hus van Petrus, en ha kik die Muder van sie Vrow ha leg, en ha hab die Koors. 15.En hem ha vas hem na sie Hand, en die Koors ha lastaen hem, en hem ha hoppo en ha dien sender. 16.Maer dietit Avond ha kom, sellie ha bring veele Beseten na hem; en hem ha driev die Geesten yt mit een Woord, en ha genees sender almael, die ha wees siek: 17.Dat die ha sal kom volkom, wat die Propheet Jesaias ka seg, die seg: Hem ka neem ons Swakheiden, en ha draeg ons Siekten. 18.IV.) Maer dietit Jesus ha kik mussie Volk ront sie, hem ha seg na sender, for vaer over na die ander Sie. 19.En een Skriftgeleerd ha kom, en ha seg na hem: Meester, mie wil volg ju, waer ju loop. 20.En Jesus ha seg na hem: Die Vossen hab sender Hol, en die Voglen hab sender Nest; maer die Mens sie Soon no hab, na waer hem kan for leg sie Kop. 21.Maer een ander van sie Disciplen ha seg na hem: Heere, lastaen mie loop heen eerst, en graev mie Vaeder. 22.Maer Jesus ha seg na hem: ju volg mie, en lastaen die Dooje graev sender Dooje. 23.V.) En hem ha loop na binne na die Skip, en sie Disciplen ha volg hem. 24.En kik, een groot Wind ha hoppo na die See, soo dat

die groot Baeren ha tue die Skip; maer hem ha slaep. 25.En sie Disciplen ha loop na hem, ha maek hem wakker, en ha seg: Heere, help ons! ons vergaen. 26.En hem ha seg na sender: jellie kleingloovigen, watmaek jellie bang soo? Soo hem ha hoppo, en ha dreig die Weer en die See; en die ha kom heel stil. 27.Maer die Volk ha verwonder sender, en ha seg: wat Man hem bin, dat die Weer en die See hoor hem? 28.VI.) En dietit hem ha ka kom na die ander Sie na die Land van die Gergeseners, twee Beseten ha kom tegen hem, die ha kom yt van die Graven van die Dooje, en ha wees gu stout, soo dat niet een Volk ha derv passeer na die selve Pad. 29.En kik, sellie ha ruep, en ha seg: Jesus, ju Godts Soon, wat ons hab for due mit ju? ju ka kom for pien ons eer die Tid? 30.Maer ver van sender ha wees een groot Trop Verkens na die Weide. 31.Soo die Dievlen ha bid hem, en ha seg: als ju wil driev ons yt, lastaen ons vaer na binne na die Verkens. 32.En hem ha seg na sender: vaer! soo sender ha vaer yt, en ha vaer na binne die Verkens; en kik die heel Trop Verkens ha stort sender selv gaugau van die Bergje na binne die See, en ha versiep na binne die Water. 33.Maer die Herders ha vlygt wej; en sellie ha loop heen na binne die Stad, en ha seg die almael, en husoo die ha loop mit die Beseten. 34.En kik die heel Stad ha loop yt, for tegen Jesus; en dietit sellie ha kik hem, sellie ha bid hem, for loop wei van sender Land.

Die 9. Capittel.

I.) Christus genees een Lam, 1-8. II.) ruep Mattheus, en verantwoordt sie selv en sie Disciplen, 9-17. III.) genees een Vrow, die ha hab Blud-Loop, en wek op die Dogter van Jairus, 18-26. IV.) genees twee Blinden, 27-31. V.) en een Beset, 32-34. VI.) jammer die Volk, 35-38.

En Jesus ha loop na binne die Skip, en ha vaer over, en ha kom na sie stad. 2.En kik, sellie ha bring na hem een, die ha wees lam heel-heel, hem ha leg na bobo

een Bedde; en dietit Jesus ha kik sender Gloof, hem ha seg na die lam Man: Soon! hab gueje Mud, ju Sonde bin vergeven. 3.En kik Partie van die Skriftgeleerden ha seg bie sender selv: deese laster Godt. 4.En dietit Jesus ha kik sender Gedagten, hem ha seg: watmaek jellie denk soo qwaet na binne jender Hart? 5.Want wat bin meer ligt for seg: ju Sonde bin vergeven? of for seg; hoppo, en wandel? 6.Maer dat jellie sal weet, dat die Mens sie Soon hab Magt na die Aerde, for vergeev die Sonden; soo hem ha seg na die Lam: hoppo, neem ju Bedde mit, en loop na ju Hus. 7.En hem ha hoppo, en ha loop na sie Hus. 8.Maer dietit die Volk ha kik dat, sellie ha wonder, en ha pries Godt, die ha ka giev soo een Magt na die Mensen. 9.II). En dietit Jesus ha loop voort van daesoo, hem ha kik een Mens, die ha sit na die Tolhus, sie Naem ha wees Mattheus, en hem ha seg na hem: volg mie; en hem ha hoppo, en ha volg hem. 10.En die ha gebeer, dietit hem ha sit na Tafel na binne die Hus, kik, veele Tollenars en Sondars ha kom, en ha sit na Tafel mit Jesus en sie Disciplen. 11.En dietit die Phariseewen ha kik dat, sellie ha seg na sie Disciplen: watmaek jender Meester jeet mit die Tollenars en Sondars? 12.Maer dietit Jesus ka hoor dat, hem ha seg na sender; Die gesond no hab die Barbier noodig, maer sellie, die bin siek. 13.Maer loop heen, en leer, wat die bin: Mie wil Barmhertigheid, en no Offer; want mie no ka kom for ruep die Regtveerdigen, maer die Sondars tot Bekeering. 14.Soo die Disciplen van Johannes ha kom na hem, en ha seg: watmaek ons en die Phariseeuwen vast soo mussie, maer ju Disciplen no vast? 15.En Jesus ha seg na sender: die Brylloft Volk kan for wees bedruevt, soolang die Brydgom bin mit sender? maer die Tid sal kom, als sellie neem die Brydgom wej van sender, dan sellie sal vast. 16.Maer niemand lap een oud Kleed mit een Stik nyw Laken; want die Stik sal skeer yt van die Kleed, en die Gad sal kom meer groot. 17.Volk ookal no due nyw wien na oud Leer-Flessis, onoso die Flessis breek, en die wien stort, en die Flessis bederv;

maer Volk due nyw wien na binne nyw Leer-Flessis, en dan altwee ka bewaer. 18.III.) Dietit hem ha seg dat na sender, kik, een Overst ha kom, ha val neer voor hem en ha seg: Mie Dogter ka doot nunu; maer kom, en leg ju Hand na bobo hem, soo hem sal kom levendig. 19.En Jesus ha hoppo, en ha volg hem, en sie Disciplen ookal. 20.En kik een Vrow, die ha hab Blud-loop na twaelf Jaer, ha loop aster na hem, en ha raek na die Soom van sie Kleed. 21.Want hem ha seg bie sie selv; als mie ha kan raek sie Kleed maer, mie sal kom gesond. 22.Soo Jesus ha keer sie om, en ha kik hem, en ha seg: Dogter! hab gueje Mud, ju Gloof ka help ju: en die Vrow ka kom gesond van die selve yer. 23.En dietit Jesus ka kom na binne die Hus van die Overste, en ha kik die Flöjters, en die Geraes van die Volk, hem ha seg na sender: 24.Loop wej! want die Meisje no ka doot, maer hem slaep; en sellie ha spot hem. 25.Maer, dietit die Volk ha ka jaeg wej, hem ha loop na binne, en ha vas die Meisje na sie Hand; soo hem ha hoppo. 26.En die Woord van die ha kom bekent na die heel Land. 27.IV.) En dietit Jesus ha loop voort van daer, twee Blinden ha volg hem, die ha ruep, en seg: Ach! ju Soon van David, hab jammer na ons! 28.En dietit hem ka kom na binne Hus, die Blinden ha loop na hem, en Jesus seg na sender: jellie gloov, dat mie kan due dat? sellie seg na hem: ja, Heere! 29.Soo hem ha raek na sender Oogen, en ha seg: die gebeer jender aster jender Gloof! 30.En sender Oogen ha kom open; en Jesus ha dreig sender gu hart, en ha seg: pas op, dat niemand no sal kom for weet die. 31.Maer sellie ha loop yt, en ha sprej die Woord van hem na die geheel Land. 32.V.) Maer dietit sellie ha ka loop yt, kik, sellie ha bring een Mens na hem, die ha wees dum en beset. 33.En dietit die Dievel ha ka driev yt, die dum Man ha praet, en die Volk ha verwonder sender, en ha seg: levendag soo gut ka wordt gesien na binne Israel. 34.Maer die Phariseewen ha seg: hem driev yt die Dievlen door die opperste Dievel. 35.VI.) En Jesus ha loop

om na almael die Plaesen en Dorpen, ha leer na binne sender Skolen, en ha preek die Evangelium van die Rik, en ha genees al Siekte, en al Swakheid onder die Volk. 36.En dietit hem ha kik die Volk, die ha jammer hem gu voor sender; diemaek sellie ha wees versmagt, en verstroojt, glik die Skaepen, die no hab geen Oppasser. 37.Soo hem ha seg na sie Disciplen: die Oogst bin wel groot, maer die Werk-Volk bin weinig. 38.Daerom jellie bid na die Heer van die Oogst, dat hem stier Werk-Volk na sie Oogst.

Die 10. Capittel.

I.) Christus stier yt die twaelf Apostlen for preek en due Wonder-Werken, 1-15. II.) leer sender, dat sellie sal wees getrouw en bestandig na vervolging en die Dood, en no verlooken hem, 16-39. III.) beloov sender Gnade, die neem sender an, 40-42.

En Jesus ha ruep sie twaelf Disciplen na sie, en ha giev Magt na sender over die onrein Geesten, for driev sender yt, en for genees al sort Siekte en Swakheid. 2.Maer die Naemen van die twaelf Apostlen bin: die eerste Simon, die bin genaemt Petrus, en Andreas sie Bruder; Jacobus, die Soon van Zebedeus, en Johannes sie Bruder; 3.Philippus en Bartholomeus; Thomas en Mattheus, die Tollenar; Jacobus die Soon van Alpheus, en Lebbeus mit die Tunaem Thaddeus; 4.Simon Cananit, en Judas Iscariot, die ha verraedt hem. 5.Deese twaelf Jesus ha stier yt, ha belast sender en ha seg: no loop heen na die Pad van die Heidens, en no loop na binne die Stad van die Samaritaenen. 6.Maer loop liever heen na die verlooren Skaepen van die Hus van Israel. 7.Maer loop heen, preek en seg, dat die Hemelrik ka kom diestebie. 8.Genees die Sieken, reinig die Lazares-Sieken, wek op die Doojen, driev yt die Dievlen. Jellie ka ontfang die voor niemendal, jellie giev die voor niemendal weeran. 9.Jellie no sal hab Goud, no Silver, nog Koper na binne jender Beers;

10.Ook geen Sak voor die Reis, ook niet twee Rokken, ook niet Skuen, ook niet Stok; want een Werkman bin waerdig sie Jeet. 11.Maer na welk Stad of Dorp jellie kom na binne, ondersuek, als die hab een Volk daer, die bin die waerdig; en bliev daer tee jellie loop wej. 12.Maer, als jellie loop na binne een Hus, gruet die. 13.En als die Hus bin die waerdig, jender Vreede sal kom na bobo die; maer, als die no bin die waerdig, dan jender Vreede sal kom na jender weeran. 14.En als een Volk no wil ontfang jender, en no wil hoor jender Woorden, loop yt van die Hus of die Stad, skyd die Stof af van jender Vutten. 15.Waerwaer, mie seg na jender: die Land van Sodoma en Comorra sal hab die meer verdraeglig na die Dag van Oordeel, als die Stad. 16.II.) Kik, mie stier jender yt glik als Skaepen na middel van die Wolven; daerom wees voorsigtig, als die Slangen, en sonder Valsheid, als die Diefies. 17.Maer neem jender in agt voor die Mensen; want sellie sal leever jender over na die Raed, en sal geesel jender na binne sender Skolen. 18.En sellie sal bring jender voor die Vorsten en Kooningen voor die wille van mie, tot een Getiegnis over sender en die Heidens. 19.Maer, als sellie leever jender over, jellie no sorg, husoo af wat jellie sal praet; want die sal wordt gegeven na jender na die selve yer, wat jellie sal seg. 20.Want die no bin jellie, die spreek; maer die bin die Geest van jender Vaeder, die spreek door jender. 21.Maer die een Bruder sal leever die ander over na die Dood, en een Vaeder sie Kind; en die Kinders sal staen op tegen die Ouders, en maek sender doot. 22.En almael Volk sal haet jender voor die wille van mie Naem; maer die bliev bestandig tee na die Einde, hem sal kom salig. 23.Maer, als sellie vervolg jender na binne een Stad, vlygt na een ander; waerwaer mie seg na jender; jellie no sal due niet een guet na die Plaesen van Israel, eer die Mens sie Soon kom. 24.Die Jong no bin boven sie Meester, ook niet die Knegt boven sie Heer. 25.Die bin gnug voor die Jong, dat hem kom als sie Meester, en die Knegt, als sie Heer; als sellie ka ruep die

Hus-Vaeder Beelzebul, veel meer sellie sal ruep die Hus-Volk soo. 26.Daerom jellie no bang sender; want niet een gut ka verberg, die no sal kom openbaer, en niet een gut bin geheim, die no sal kom bekent. 27.Wat mie seg na jender na die Dysternis, jellie seg dat na die Ligt; en wat jellie hoor na binne die Oor, jellie preek die na bobo die Dak. 28.En no vrees voor sender, die kan maek die Likam doot, en no kan die Siel doot; maer vrees meer voor hem, die kan bederv Siel mit Likam na binne die Hel. 29.Sellie no verkoop twee klein Voglen voor een Penning? en niet een van sender val na die Grond sonder die Wil van jender Vaeder. 30.Maer almael die Haeren ookal na jender kop ka tel. 31.Daerom jellie no bang; jellie bin beeter, als mussie klein Voglen. 32.Daerom, die beken mie voor die Mensen, die mie wil beken voor mie hemelse Vaeder. 33.Maer die verlooken mie voor die Mensen, die mie wil verlooken voor mie hemelse Vaeder. 34.Jellie no sal denk, dat mie ka kom for stier Vreede, na die Aerde; mie no ka kom for stier Vreede, maer die Sweerd. 35.Diemaek mie ka kom for maek een Mens oneens mit sie Vaeder, en die Dogter mit sie Muder, en die Skoon-Dogter mit sie Skoon-Muder. 36.En die Mens sie Hus-Volk sal wees sie Vieanden. 37.Die wil sie Vaeder en Muder meer als mie, no bin mie waerdig; en die wil sie Soon of Dogter meer als mie, no bin mie waerdig. 38.En die no wil neem op sie Krus, en volg aster mie, no bin mie waerdig. 39.Die vindt sie Leven, sal verloor die; en die verloor sie Leven voor mie Skyld, sal vindt die. 40.III.) Die neem jender an, neem mie an; en die neem mie an, neem hem an, die ka stier mie. 41.Die neem an een Propheet na die Naem van een Propheet sal krieg een Propheet sie Loon; en die neem an een Regtveerdig, na die Naem van een Regtveerdig, sal krieg een Regtveerdig sie Loon. 42.En die giev na een van deese kleinste, maskee een Beeker koud Water for drink na die Naem van een Discipel, waerwaer mie seg na jender, levendag hem no sal verloor sie Loon.

Die 11. Capittel.

I.) Johannes stier twee Disciplen na Jesus, die bewies, dat hem bin die belofte Messias, 1-6. II.) Jesus praet van Johannes, 7-15. klaeg over die Hardheid van die Volk, 16-19. III.) ruep wee over eenige, 20-24. IV.) pries God, sie Wegen, 25-27. ruep na sie almael sender, die bin mue, 28-30.

En die ka gebeer, dietit Jesus ha ka voleindig sie Beveel na sie Disciplen, hem ha loop voort van daesoo, for leer en preek na binne sender Steden. 2.Maer dietit Johannes ha ka hoor na binne die Gevangnis die Werken van Christus, hem ha stier twee van sie Disciplen, en ha lastaen seg na hem: 3.Ju bin die, die sal kom? of ons sal verwag een ander? 4.En Jesus ha antwoordt, en ha seg na sender: loop heen, en seg na Johannes die gut, jellie hoor en kik: 5.Die Blinden kik, die Kreepels loop, die Lazares Sieken kom rein, die Dooven hoor, die Doojen staen op, en Evangelium wordt gepreekt voor die Povers. 6.En saelig hem bin, die no erger sie selv na mie. 7.II.) Maer dietit sellie ha loop wei, Jesus ha begin for seg na die Volk van Johannes: wat jellie ka loop yt na die Wusteine for kik? een Ried, die Wind waej hieso en daeso? 8.Of wat jellie ka loop yt for kik? een Mens, die ka kleedt na sogt Kleeren? kik, sellie, die draeg sogt Kleeren, bin na binne die Husen van die Kooningen. 9.Of wat jellie ka loop yt for kik? een Propheet? ja mie seg na sender, veel meer ookal als een Propheet. 10.Want hem bin die, van die ka skriev: kik, mie stier mie Engel voor ju Angesigt, die sal berej ju Pad voor ju. 11.Waerwaer mie seg na jender: van sender, die bin gebooren van Vrow, niet een ka hoppo meer groot, als Johannes; maer hem, die bin meer klein na binne die Hemelrik, die meer groot als hem. 12.Maer van die Dag van Johannes die Dooper tee nu, die Hemelrik lie Geweld, en sellie, die due Geweld na die, hael die na sender. 13.Want almael die Pro-

pheeten en die wet ka propheteer tee na Johannes. 14.En, als jellie wil neem die an: hem bin Elias, die sal kom. 15.Die hab Oor for hoor, hem hoor! 16.Maer mit wie mie sal vergliek deese Geslagt? die bin glik die klein Kinders, die sit na die Markt, en ruep na sender Maeten, en seg: 17.Ons ka flöjt voor jender, en jellie no ha wil dans; ons ka sing Klag-Sing voor jender, en jellie no ha wil kries. 18.Want Johannes ka kom, hem no ha jeet, hem no ha drink; en sellie seg, hem hab die Dievel. 19.Die Mens sie Soon ka kom, hem jeet en drink; en sellie seg: kik, welk een Vraet en Dronkart die Mens bin, een Vriend van Tollenars en Sondars! en die Wiesheid ka maek regtveerdig van sie Kinders. 20.III.) Soo hem ha begin for skaem die Steden yt, na waer hem ha ka maek die meest van sie kragtig Werken, en dog sellie no ha wil bekeer nogal; 21.Wee ju Chorazin! wee ju Bethsaida! want, als soo kragtig Werken ha ka maek na binne Tyrus en Sidon, die ka maek na binne jender, sellie ha sal bekeer lang na binne Sak en Assesje. 22.Dog mie seg na jender: die sal loop meer verdraeglig mit Tyrus en Sidon na die Dag van die Oordeel, als mit jender. 23.En ju Capernaum, die ka verhoog tee na die Hemel! ju sal stoot neer tee na die Hel; want, als die kragtig Werken ha ka maek na binne Sodoma, die ka maek na binne ju, Sodoma sal ha staen tee nu. 24.Dog mie seg na jender: die sal loop mer verdraeglig mit die Land van Sodoma na die Dag van die Oordeel, als mit ju. 25.IV.) Na die selve Tid Jesus ha antwoordt, en ha seg: mie pries ju, Vaeder, Heer van Hemel en Aerde! dat ju ka verberg dat voor die Wiesen en Kluken, en ka openbaer die voor die onmondigen. 26.Ja Vaeder! want soo die bin behaeglig voor ju. 27.Almael gut mie Vaeder ka giev na mie; en niet een weet de Soon, meer als die Vaeder; en niet een weet die Vaeder meer als die Soon, en die, na die die Soon wil openbaer die. 28.Kom hiesoo na mie jellie almael, die werk, en bin mue! en mie sal verqwik jender. 29.Neem op mie Jok, en leer van mie, want mie bin sagtmudig en ootmudig van Hart; soo jellie sal vind Ryst voor jender Sielen. 30.Want mie Jok bin dienlig, en mie Last bin ligt.

Die 12. Capittel.

I.) Die Disciplen pik Tapusies na die Sabbath-Dag, 1-8. II.) Jesus genees een droog Hand, 9-14. III.) genees, bin ootmudig, 15-21. IV.) genees een Beset, sellie laster hem, en hem verantwoordt sie selv, praet van Sonde tegen die heilig Geest, 22-45. V.) leer, wie sie Muder bin, 46-50.

Na die selve Tid Jesus ha loop door die Koorn na een Sabbath-Dag; maer sie Disciplen ha honger, en sellie ha pik Tapusies for jeet. 2.Maer dietit die Phariseewen ha kik dat, sellie ha seg na hem: kik, ju Disciplen due dat, die no bin regt for due na die Sabbath-Dag. 3.Maer hem ha seg na sender: Jellie no ka lees, wat David ka due, dietit hem, en sellie, die ha wees mit hem, ha hab Honger; 4.Husoo hem ha loop na binne die Hus van Godt, en ha jeet die Toon Brooden, die hem no ha mut jeet, ook niet sellie, die ha wees mit hem, maer die Priesters alleen. 5.Of jellie no ka lees na binne die Wet, dat die Priesters ha ontheilig die Sabbath na binne die Tempel na die Sabbath, en dog bin onskyldig. 6.Maer mie seg na jender, dat hem bin hiesoo, die bin meer groot ookal, als die Tempel. 7.Maer, als jellie ha weet, wat dat bin: mie wil Barmhertigheid, en niet die Offer, soo jellie no ha ka verdum die onskyldigen. 8.Want die Mens sie Soon bin een Heer over die Sabbath ookal. 9.II.) En hem ka loop voort van daesoo, en ka kom na sender Skool. 10.En kik, die ha hab een Mens, die ha hab een dor Hand, en sellie ha vraeg hem, en ha seg: die bin regt for genees na een Sabbath-Dag? dat sellie ha kan beskyldig hem. 11.Maer hem ha seg na sender: wie van jender hab een Skaep, en als die val na binne een Pyt na een Sabbath-Dag, no vas hem, en ligt hem op? 12.Huveel beeter een Mens bin nu als een Skaep? daerom ons mut due gued na een Sabbath-Dag. 13.Soo hem ha seg na die Mens: strek yt ju Hand! en hem ha strek sie Hand yt, en

die ha kom gesond, glik die ander. 14.Maer die Phariseewen ha loop yt, en ha how Raed over hem, husoo sellie sal maek hem doot. 15.III.) Maer, dietit Jesus ka verneem dat, hem ha loop wej van daer; en veel Volk ha volg hem, en hem ha genees sender almael. 16.En hem ha dreig sender, dat sellie no ha sal maek hem openbaer. 17.Dat die ha sal kom volkom, wat ka seg door die Propheet Jesaias, die seg: 18.Kik mie Dienaer, die mie ka verkies, mie Geliefde, na die mie Siel hab groot Behaegen; mie wil leg mie Geest na bobo hem, en hem sal verkondig Oordeel na die Heidens. 19.Hem no sal kiev, ook niet ruep; en sellie no sal hoor sie Stem na die Straeten. 20.Hem no sal verbreek die Ried, die ka kraek, en hem no sal blys yt die rook wikkie; tee hem ka vuer yt die Oordeel na Overwinning. 21.En die Heidens sal hoop na sie Naem. 22.IV.) Soo sellie ha bring een Beset na hem, die ha wees blind en dom; en hem ha genees hem, soo dat die blind en dom ha kik en praet. 23.En al die Volk ka verskrik, en ha seg: da, als deese no bin die Soon van David? 24.Maer dietit die Phariseewen ka hoor dat, sellie ha seg: Deese no driev die Dievlen yt, anders, als door Beelzebul, die opperste van die Dievlen. 25.Maer dietit Jesus ha weet sender Gedagten, hem ha seg na sender: elk Rik die kom oneenig mit sie selv, kom wust; en elk Stad of Hus, die kom oneenig mit sie self, no kan bestaen. 26.En als Satan driev Satan yt, hem mut wees oneenig mit sie selv; husoo dan sie Rik kan bestaen? 27.En als mie driev die Dievlen yt door Beelzebul, door wie jender Kinders driev sender yt? daerom sellie sal wees jender Regters. 28.Maer als mie driev die Dievlen yt door die Geest van Godt, dan die Rik van Godt ja ka kom na jender. 29.Of husoo een Volk kan loop na binne die Hus van een Sterk, en neem wej sie Husraed van hem, als hem no bind die Sterk eerst? en asteran neem wej sie Husraed? 30.Hem, die no bin mit mie, bin tegen mie, en hem, die no vergaeder mit mie, sprej. 31.Daerom mi seg na jender: al Sonde en Laster sal wordt

vergeven na die Mensen; maer Laster tegen die heilig Geest no sal wordt vergeven na die Mensen. 32.En hem, die spreek een gut tegen die Mens sie Soon, dat sal wordt vergeven na hem; maer hem, die spreek tegen die heilig Geest, hem no sal krieg Vergeving hiesoo in deese Weereld, ook niet in die tukomende. 33.Lastaen die Boom wees gued, en die Vrygt sal wees gued ookal, of lastaen die Boom wees verrot, en die Vrygt sal wees verrot ookal; diemaek ju ken die Boom na die Vrygt. 34.Jellie Adder Kinders! husoo jellie kan praet gued, soolang jellie bin qwaed; want die Mond praet van wat die Hart bin vol van. 35.Een gued Mens bring voort fraej gut van die fraeje Skat van sie Hart; en een qwaeje Mens bring voort qwaed gut van sie quaeje Skat. 36.Maer mie seg na jender, dat die Mensen sal gief Rekenskap na die Dag van die Oordeel voor elk onnyt Woord, sellie ka praet. 37.Want yt ju Woord ju sal kom regtveerdig, en yt ju Woord ju sal kom verdumt. 38.Soo Som van die Skrift-geleerden en Phariseewen ha antwoordt, en ha seg: Meester, ons wil gern kik een Teeken van ju. 39.Maer hem ha antwoordt, en ha seg na sender: deese qwaeje en hueragtig Geslagt suek Teeken; en niet een Teeken sal giev na hem, als die Teeken van die Propheet Jonas. 40.Want glik als Jonas ha wees drie Dagen mit drie Nagt na binne die Biek van die Walvis; soo die Mens sie Soon ookal sal wees drie Dagen mit drie Nagts na binnen die Aerde. 41.Die Volk van Ninive sal hoppo mit deese Geslagt na die Oordeel, en sal verdum die; diemaek sellie ka bekeer door die Predikasje van Jonas: en kik: hiesoo bin meer als Jonas. 42.Die Kooningin van die Syd sal hoppo mit deese Geslagt na die Oordeel, en sal verdum die; diemaek hem ka kom van die Einde van die Aerde for hoor die Wiesheid van Salomon; en kik, meer als Salomon bin hiesoo. 43.Als die onrein Geest ka vaer yt die Mens, dan hem wandel door dor Plaesen, suek Ryst, en no vind die. 44.Dan hem seg; mie wil keer weeran na binne na mie Hus, van waer mie ka loop yt; en als hem kom, hem vindt

die leeg, ka veeg, en ka versier. 45.Soo hem loop heen, en neem seven ander Geesten mit sie, die bin meer slem als hem selv, en als sellie kom daer na binne, sellie woon daesoo; en die kom meer erg asteran mit die selve Mens, als die ha wees teevoorn: soo die sal loop ookal mit deese qwaeje Geslagt. 46.V). Maer dietit hem ha praet na die Volk nogal, kik sie Muder en sie Bruders ha staen na bytten, en ha suek for praet mit hem. 47.Soo een ha seg na hem: kik ju Muder en ju Bruders staen na bytten, en ha suek for praet mit ju. 48.Maer hem ha antwoordt, en ha seg na hem, die ha ka seg dat na hem: wie bin mie Muder? wie bin mie Bruders? 49.En hem ha strek sie Hand yt over sie Disciplen, en ha seg; kik mie Muder, en mie Bruders! 50.Want die due die wil van mie Vaeder, die bin na binne die Hemel, hem bin mie Bruder, en Sister, en Muder.

Die 13. Capittel.

I.) Jesus praet door Gliknissen, van die Saejer, 1-23. II). van die Onkryd, 24-30 en 36-43. van een Moster Saed, 31-32. van een Sierdeeg, 33-35. III.) van een Skat, 44. van een kostlig Peerl, 45-46. van een Net, 47-52. IV). wordt veragt na Nazareth 53-58.

Maer na die selve Dag Jesus ha loop yt die Hus, en ha set sie neer na die See. 2.En veel Volk ha vergaeder na hem, soo dat hem ha loop na binne een Skip, en ha sit; en die Volk almael ha staen na die Seekant. 3.En hem ha praet gu na sender door Gliknissen, en ha seg: een Saejer ha loop yt for saej. 4.En dietit hem ha saey som ha val na die Pad; en die Voglen ha kom, en ha jeet die op. 5.Maer som ha val na steenagtig Land, die no ha hab mussie Grond; en die ha gruej gu gaw, diemaek die no ha hab diep Grond. 6.Maer dietit die Son ka hoppo, die ha skruej wej; en diemaek die no ha hab Wortel, die ha droog wej. 7.Maer som ha val tyssen die Doornen; en die Doornen ha gruej op, en ha tjook die, dat die ha doot.

8.Maer som ha val na gued Land, en ha draeg Vrygt, som honderd voud, maer som sestig voud, maer som dertig voud. 9.Die hab Oor for hoor, hem hoor! 10.En die Disciplen ha loop na hem, en ha seg na hem: watmaek ju praet na sender door Gliknissen? 11.Maer hem ha antwoordt, en ha seg na sender: Voordie-maek die ka giev na jender for verstaen die Geheimnissen van die Hemelrik, maer die no ka giev na sender. 12.Want wie hab, sellie sal giev na hem, dat hem sal hab over mussie; maer die no hab, van hem sellie sal neem wej, wat hem hab. 13.Daerom mie praet na sender door Gliknissen; want sellie no kik mit open Oogen, en no hoor mit open Ooren; diemaek sellie no verstaen die. 14.En die Prophesie van Jesaias kom volkom na sender, die seg; jellie sal hoor mit jender Ooren en no sal verstaen die, en jellie sal kik mit open Oogen, en no sal bemerk die. 15.Want die Hart van deese Volk ka verstok, en sender Ooren no ka hoor wel, en sender Oogen slymer; dat sellie no sal kik mit sender Oogen, en no sal hoor mit sender Ooren, en verstaen mit die Hart, en bekeer sender, dat mie ha mut help sender. 16.Maer saelig jender Oogen bin, dat sender kik; en jender Ooren, dat sender hoor. 17.Want waerwaer mie seg na jender, dat veele Propheeten en Regtveerdigen ha begeer for kik, wat jellie kik, en no ka kik die; en for hoor, wat jellie hoor, en no ka hoor die. 18.Soo hoor nu die Gliknis van die Saejer; 19.Als een Volk hoor die Woord van die Rik, en no verstaen die, dan die Boose kom, en neem die wej, wat ka saej na binne sie Hart; Deese bin die, die ka saej na die Pad. 20.Maer die, die ka saej na Steen-Land, bin die, die hoor die Woord, en neem die an anstonds mit Vreegde: 21.Dog hem no hab Wortel na binne sie, en bin Wankelbar; en als Druefnis en Vervolging kom voor die wille van die Woord, dan hem erger sie selv anstonds. 22.Maer die, die ka saej tussen die Doornen, bin die, die hoor die Woord; en deese Weereld sie Sorg, en Bedrieg van Riekdom tjook die Woord, en die no draeg Vrygt. 23.Maer die, die ka saej

na binne gued Land, bin die hoor die Woord, en verstaen die, en draeg Vrygt ookal, en som draeg honderd voud, maer som sestig voud, maer som dertig voud. 24.II). Hem ha leg sender een ander Gliknis voor, en ha seg: Die Hemelrik bin glik een Mens, die ka saej gued Saed na binne sie Akker. 25.Maer dietit die Volk ha slaep, sie Vieand ha kom, en ha saej Onkryd tyssen die Koorn, en ka loop wej. 26.Maer dietit nu die Koorn ha gruej op, en ha draeg Vrygt, sellie ha vind die Onkryd ookal. 27.Soo die Knegten ha kom na die Hus-Vaeder, en ha seg na hem: Meester, ju no ka saej gued Saed na binne ju Akker? van waer die Onkryd ka kom? 28.Maer hem ha seg na sender: die Vieand ka due die. Soo die Knegten ha seg na hem: ju wil dan, dat ons sal loop, en trek die yt? 29.Maer hem ha seg: neen; dat jellie no sal trek yt die Koorn ookal, dietit jellie trek die Onkryd. 30.Lastaen sender ruej malkander, tee na die Krop-Tid: en na die Krop-Tid mie sal seg na die Maejers: gaer eerst die Onkryd, en bind die na Bossies, dat ons kan verbrand die; maer die Koorn jellie gaer na binne mie Koorn-Hus. 31.Hem ha seg een ander Gliknis voor sender, en ha seg: die Hemelrik bin glik een Moster-Saed, die een Mens ha neem, en ha saej die na sie Akker: 32.Die bin die kleinste van al Saed; maer als die gruej op, die bin die grootste van die Muskryd, en die kom een Boom, dat die Voglen van die Hemel kom, en maek Nest tyssen die Takkies van die. 33.Hem na seg een ander Gliknis na sender: die Hemelrik bin glik een Sierdeeg, die een Vrow ha neem, en ha mengel die na drie Skepels Meel, tee die ka kom sier almael. 34.Almael dat Jesus ka seg na die Volk door Gliknissen; en sonder Gliknissen hem no ha praet niet een gut na sender; 35.Dat die ha sal kom vervylt, wat ka seg door die Propheet, die seg: mie wil open mie Mond door Gliknissen, mie wil seg die Geheimnis van die Begin van die Weereld. 36.Soo Jesus ha lastaen die Volk loop, en ha kom na binne die Hus; en sie Disciplen ha kom na hem en ha seg: Verklaer ons die Gliknis van die Onkryd na binne die Akker. 37.Maer hem ha antwoordt,

en ha seg na sender: die Mens sie Soon bin hem, die ha saej die gued Saed. 38.Maer die Weereld bin die Akker; maer die Kinders van die Rik bin die gued Saed; maer die Kinders van die Boose bin die Onkryd; 39.Maer die Dievel bin die Vieand, die ka saej sender; maer die Einde van die Weereld bin die Krop-Tid; maer die Englen bin die Maejers. 40.Daerom, glik als Volk trek yt die Onkryd, en verbrand die mit Vier; soo die sal loop tu ookal na die Einde van deese Weereld: 41.Die Mens sie Soon sal stier sie Englen yt, en sellie sal gaer yt sie Rik almael Ergernissen, en sender, die due Onregt. 42.En sellie sal gooj sender na binne die Vier Oven; daer sal wees Kries en Kneersing van Tand. 43.Dan die Regtveerdigen sal skin als die Soon na binne die Rik van sender Vaeder. Die hab Oor for hoor, hem hoor. 44.III.) Weeran die Hemelrik bin glik een Skat, die ka verberg na binne een Akker; die een Mens ka vind, en ka verberg die, en ka loop van Blieskap, en ka verkoop al wat hem ha hab, en ka koop die Akker. 45.Weeran die Hemelrik bin glik een Koopman, die ha suek gueje Peerlen: 46.En dietit hem ka vind een kostlig Peerl, hem ha loop heen, en ha verkoop al wat hem ha hab, en ha koop die. 47.Weeran die Hemelrik bin glik een Net, die ka gooj na binne die See, en vang van almael Sort. 48.Als die bin vol, sellie hael die op na die See-Kant, en sit, en suek yt die gueje malkander na een vat, maer sellie gooj die qwaeje wej. 49.Soo die sal loop ookal na die Einde van die Weereld: die Englen sal loop yt, en skei die qwaeje van die regtveerdigen; 50.En sal gooj sender na die Vier Oven; daer sal wees Kries, en Kneersing van Tand. 51.Jesus seg na sender; jellie ka verstaen die almael? sellie seg na hem: ja, Heere. 52.Maer hem ha seg na sender: daerom elk Skriftgeleerd, die ka leer na die Hemelrik, bin glik een Hus-Vaeder, die bring yt sie Skat nyw en oud gut. 53.IV.) En die ka gebeer, dietit Jesus ka eindig deese Gliknissen, hem ha loop van daer. 54.En hem ha kom na sie Vaederland, en ha leer sender na sender Skool; soo dat sellie ka wonder gu, en ha seg: van

waer deese hab die Wiesheid en Kragt? 55.Hem no bin die Timmerman sie Soon? sie Muder no hiet Maria? en sie Bruders Jacob en Joses, en Simon en Judas? 56.En sie Sisters almael no bin bie ons? van waer almael dat kom na hem? 57.En sellie ha erger sender na hem; maer Jesus ha seg na sender: een Propheet no bin minder waerdig, als na sie eigen Vaederland, en na sie eigen Hus. 58.En hem no ha due veel Teekens daer, voor die wille van sender Ongeloof.

Die 14. Capittel.

I.) Herodes denk, dat Johannes, wie sie kop hem ka lastaen kap af, ka staen op van die Dooje, 1-12. II.) Jesus spies 5000 Mans, 13-21. III.) loop na bobo die See, die Petrus due ookal, 22-34. IV.) genees, 35-36.

Na die selve Tid Herodes, die Viervorst, ha hoor die Woord van Jesus. 2.En hem ha seg na sie Knegten: deese bin Johannes die Dooper; hem ka staen op van die Dooje, daerom hem due soo Werk. 3.Want Herodes ha ka vang Johannes, ha ka bind hem, en ha ka gooj hem na binne die Gevangnis, voor die wille van Herodias, die Vrow van sie Bruder Philippus. 4.Want Johannes ha seg na hem: die no bin regt, dat ju hab hem. 5.En hem ha wil gern maek hem doot, maer hem ha bang die Volk, diemaek sellie ha how Johannes voor een Propheet. 6.Maer dietit Herodes ha how sie Geboorte-Dag, die Dogter van Herodias ha dans voor sender; en die ha behaeg Herodes gu. 7.Daerom hem ha beloov hem mit een Eed, for giev na hem, wat hem ha sal begeer. 8.En soo lang sie Muder ha ka onderrigt hem tee voorn, hem ha seg: giev hie na mie na binne een Skittel die Kop van Johannes die Dooper. 9.En die Kooning ha kom bedruevt, dog soo lang hem ha ka sweer, en voor die wille van sender, die ha sit mit hem na Tafel, hem ha belast for giev die na hem. 10.En hem ha stier, en ha lastaen kap af Johannes sie Kop na binne die Gevangnis. 11.En sellie ha bring sie

Kop na binne een Skittel, en ha giev die na die Mejsje; en hem ha bring die na sie Muder. 12.Soo sie Disciplen ha kom, ha neem die Likam, en ha begraev die, en sellie ha kom, en ha seg dat na Jesus. 13.II.) Dietit Jesus ka hoor dat, hem ha loop wej van daesoo mit een Skip na een Wusteine alleen; en dietit die Volk ka hoor dat, sellie ha volg hem na vut yt die Steden. 14.En Jesus ha loop yt, en ha kik al die Volk, en die ha jammer hem gu voor sender, en hem ha genees die Sieken van sender. 15.Na avondtit sie Disciplen ha kom na hem, en ha seg: deese bin een Wusteine, en Donker kom; lastaen die Volk loop van ju, dat sellie kan loop na die Dorpen, en koop jeet. 16.Maer Jesus ha seg na sender: die no bin noodig, dat sellie loop heen: jellie giev na sender for jeet. 17.Maer sellie ha seg na hem: ons no hab meer hiesoo, als veif Brooden, en twee Vissen. 18.Maer hem ha seg: bring sender hiesoo na mie. 19.En hem ha seg na die Volk, for sit neer na bobo die Gras, en ha neem die veif Brooden, en die twee Vissen, ha kik op na die Hemel, ha dank, en ha brek sender, en ha giev die Brooden na die Disciplen, maer die Disciplen ha giev sender na die Volk. 20.En sellie almael ha jeet, en ha kreeg sender Bekomst; en sellie ha neem op die gut, die ka bliev over, twaelf Makutten vol. 21.Nu die ha ka jeet, ha wees bie veif dysend Man, sonder Vrowen en Kinders. 22.III.) En anstonds Jesus ha forceer sie Disciplen for loop na binne die Skip, for vaer over voor hem na die ander Sie, tee hem ha ka stier die Volk wej. 23.En dietit hem ha ka stier die Volk wej, hem ha klem na bobo een Berg, hem alleen, for bid. En na Avond hem alleen ha wees daesoo. 24.Maer die Skip, ha wees alreets na middel van die See, en ha wees na Gevaer voor die groot Baeren; want die Wind ha wees tegen. 25.Maer na die vierde Nagt-wagt Jesus ha kom na sender, en hem ha loop na bobo die See. 26.En dietit die Disciplen ha kik hem loop na bobo die See, sellie ha kom bang, en ha seg; die bin een Spook; en sellie ha skreew van Bangheid. 27.Maer Jesus ha spreek mit sender anstonds, en ha seg: hab gueje Mud; da mie die bin, no wees bang.

28.Maer Petrus ha antwoordt hem, en ha seg: Heere! als ju die bin, soo seg na mie dan, for kom na ju na bobo die water. 29.Maer hem ha seg: kom! en Petrus ha stap yt van die Skip, en ha loop na bobo die water for kom na Jesus. 30.Maer dietit hem ha kik een groot Wind, hem ha kom bang, en dietit hem ha begin for sink, hem ha ruep, en ha seg: Heere, help mie! 31.Maer Jesus ha strek sie Hand yt anstonds en ha vas hem, en ha seg na hem: O, ju kleingloovig! watmaek ju ha twieffel. 32.En dietit sellie ka loop na binne die Skip, die Wind ha kom stil. 33.Maer sellie, die ha wees na binne die Skip, ha kom, en ha val neer voor hem, en ha seg: ju bin waerwaer Godt sie Soon. 34.En sellie ha vaer over, en ha kom na die Land van Genezareth. 35.IV.) En dietit die Volk van daesoo ha ken hem, sellie ha stier yt na die geheel Land rontom, en ha bring almael die Sieken na hem. 36.En sellie ha bid hem, dat sellie ha mut ruer alleen na die Soom van sie Kleed; en sellie almael, die ha ruer die an, ka kom gesond.

Die 15. Capittel.

I.) Jesus leer, wat die bin, die maek die Mens onrein, en bestraev die Hyklarie en blindheid van die Phariseewen, 1-20. II.) versuek en verhoor die Cananeis Vrow, 21-28. III.) genees veele, en spies 4000 Man, 29-39.

Na die Tid die Skriftgeleerden en Phariseewen van Jerusalem ka kom na Jesus, en ha seg: 2.Watmaek ju Disciplen brek die Instelling van die Ouden? want sellie no was sender Handen, dietit sellie jeet Brood. 3.Maer hem ha antwoord, en ha seg na sender: watmaek jellie brek die Geboden van Godt voor jender Instelling sie wil? 4.Want Godt ka belast: ju sal eer ju Vaeder en ju Muder; maer die vluek Vaeder en Muder sal sterv die Dood. 5.Maer jellie leer: wie seg na sie Vaeder of Muder (als mie offer die, die bin meer nyt) hem due wel. 6.Dat maek, dat niemand meer eer sie Vaeder en sie

Muder: en soo jellie maek Godt sie Gebod niemendal voorjender Instelling sie wil. 7.Jellie Hyklars! Jesaias ka propheteer wel van jender, en ha seg: 8.Deese Volk kom diestebie mie mit sender Mond, en eer mie mit sender Lippen; maer sender Hart bin ver van mie. 9.Maer sellie dien mie voor soosoo, diemaek sellie leer Leering die bin Mens Geboden alleen: 10.En hem ha ruep die Volk na sie, en ha seg na sender; hoor tu, en verstaen die! 11.Wat loop na binne door die Mond, no maek die Mens onrein, maer wat loop yt door die Mond, die maek die Mens onrein. 12.Soo sie Disciplen ha loop na hem, en ha seg na hem; ju weet ookal dat die Phariseewen ka erger sender, dietit sellie ka hoor die Woord? 13.Maer hem ha antwoordt, en ha seg: almael Planten, die mie hemels Vaeder no ka plant, sal ruej yt. 14.Lastaen sellie loop: sellie bin blind, en Leidsmans van Blinden; Nu als een blind lej die ander, sellie altwee sal val na binne die Graf. 15.Soo Simon Petrus ha antwoordt, en ha seg na hem; verklaer ons deese Gliknis. 16.En Jesus ha seg na sender: jellie ook bin onverstandig nogal? 17.Jellie no verstaen nogal, dat al wat loop na binne door die Mond, loop na die Biek, en wordt ytgegoojt door die natierlig Gang? 18.Maer wat loop yt door die Mond, kom yt van die Hart, en die maek die Mens onrein. 19.Want yt die Hart kom qwaeje Gedagten, Moord, Huer, Overspel, Dieverie, vals Getiegnis, Lastering. 20.Dat bin die, die maek die Mens onrein; maar for jeet sonder was Hand, no maek die Mens onrein. 21.II.) En Jesus ha loop yt van daesoo en ha loop wej na die Land van Tyrus en Sidon. 22.En kik een Cananeis Vrow ha kom yt van die selve Land, ha ruep, en ha seg na hem: Ach Heere, David Soon, jammer mie! die Dievel plaeg mie Dogter over. 23.Maer hem no ha antwoordt die Vrow niet een Woord. Soo sie Disciplen ha loop na hem, ha bid hem, en ha seg: stier die Vrow wej, want hem ruep aster ons. 24.Maer hem ha antwoordt, en ha seg: mie no ka stier yt, als alleen na die verlooren Skaepen van Israel sie Hus. 25.Maer die Vrow ha kom,

ha bid hem an, en ha seg: Heere, help mie! 26.Maer hem ha antwoordt, en ha seg: die no staen fraej, for neem die Brood van die Kinders, en gooj die na die klein Honden. 27.Maer die Vrow ha seg: ja, Heere! klein Honden jeet dog die Krymmels, die val van die Tafel van sender Meester. 28.Soo Jesus ha antwoordt, en ha seg na hem: O, Vrow, ju Gloof bin groot; die geskiedt na ju, soo als ju wil! en sie Dogter ha kom gesond van die selve yer. 29.III.) En Jesus ha loop voort van daesoo, en ha kom na die See van Galilea; en hem ha klem na bobo een Berg, en ha sit daesoo. 30.En veel Volk ha kom na hem, die ha bring mit sender Lammen, Blinden, Stommen, en Kreeplen, en veele ander; en sellie ha leg sender voor die Vutten van Jesus, en hem ha genees sender: 31.Soo dat die Volk ha wonder, dietit sellie ha kik, dat die Stommen ha spreek, die Kreeplen ha ka genees, die Lammen ha loop, en die Blinden ha kik; en sellie ha pries die Godt van Israel. 32.Maer Jesus ha ruep sie Disciplen na sie, en ha seg: mie jammer die Volk, diemaek sellie ka bliev nu drie Dagen na mie, en sellie no hab niet een gut for jeet; en mie no wil lastaen sender loop wej van mie sonder jeet, dat sellie no sal versmagt na die Pad. 33.En sie Disciplen ha seg na hem: van waesoo ons sal krieg soo mussie Brood na binne die Wusteine; dat ons kan versaedig soo veel Volk? 34.En Jesus ha seg na sender: huveel Brooden jellie hab? maer sellie ha seg: seven, en weinig klein Vissen. 35.En hem ha seg na die Volk for sit neer na bobo die Aerde. 36.En hem ha neem die seven Brooden en die Vissen, ha dank, ha brek sender, en ha giev sender na sie Disciplen, maer die Disciplen ha giev sender na die Volk. 37.En sellie almael ha jeet, en ha krieg sender Bekomst; en sellie ha neem op seven Makutten vol van die Brokkies; die ka bliev over, 38.Maer sellie, die ha ka jeet, ha wees vier dysend Mans, sonder die Vrowen en Kinders. 39.En aster hem ha ka lastaen die Volk loop wej, hem ha loop na binne een Skip, en ha kom na die Land van Magdala.

Die 16. Capittel.

I.) Jesus bestraev die Phariseewen, die ha suek Teekens, 1-4. waerskow voor die Sierdeeg van sender, 5-12. II.) Petrus beken, dat Jesus bin die Soon van Godt, 13-20. III) Jesus spreek van sie Leiden, bestraev Petrus, 21-23. IV.) spreek van selv-verlooking, en van sie Tukomst, 24-28.

En die Phariseeuwen en Saduceewen ha kom, ha versuek hem, en ha begeer, dat hem ha wil wies sender een Teeken van die Hemel. 2.Maer hem ha antwoordt, en ha seg na sender: na Avond jellie seg: die kom een mooje Dag; diemaek die Hemel bin rood; 3.En na vruvrue jellie seg: een Storm sal kom van Dag; diemaek die Hemel bin donker rood. Jellie Hyklars! jellie kan oordeel die Manier van die Hemel, jellie no kan oordeel die Teekens van die Tid ookal? 4.Deese qwaeje en hueragtig Geslagt suek Teekens; en hem no sal krieg ander Teeken, als die Teeken van die Propheet Jonas. En hem halastaen sender, en ha loop wej van daesoo. 5.En dietit sie Disciplen ha ka vaer over na die ander Sie, sellie ha ka vergeet for neem Brood mit. 6.Maer Jesus ha seg na sender: pas op, en neem jender in agt voor die Sierdeeg van die Phariseewen en Saduceewen. 7.Soo sellie ha denk bie sender selv, en ha seg: die sal wees, dat ons no ka neem geen Brood mit. 8.Maer dietit Jesus ka weet dat, hem ha seg na sender; jellie kleingloovigen! watmaek jellie bin verleegen, voor dat jellie no ka neem Brood mit? 9.Jellie no verstaen nogal? Jellie no denk op ookal die veif Brooden tyssen die veif Dysend, en huveel Makutten jellie ka neem op die Tid? 10.Ook niet na die seven Brooden tyssen die vier Dysend, en huveel Makutten jellie ka neem op die Tid? 11.Husoo jellie no verstaen dan, dat mie no spreek na jender van Brood, dietit mie seg, dat jellie sal neem jender in agt voor die Sierdeeg van die Phariseewen en Saduceeuwen? 12.Soo sellie ha verstaen, dat hem no ha seg, dat sellie ha sal neem jender in agt voor

die Sierdeeg van die Brood, maer voor die Leer van die Phariseewen en Saduceewen. 13.II.) Maer dietit Jesus ka kom na die Landdeel van Cesarea Philippi, hem ha vraeg sie Disciplen, en ha seg; wie die Volk seg, dat die Mens sie Soon bin? 14.Maer sellie ha seg: som seg, dat ju bin Johannes, die Dooper, maer ander, dat ju bin Elias, maer ander, dat ju bin Jeremias, onoso een van die Propheeten. 15.Hem seg na sender: wie jellie seg dan, dat mie bin? 16.Soo Simon Petrus ha antwoordt, en ha seg: ju bin Christus, die Soon van die levendig Godt. 17.En Jesus ha antwoordt, en ha seg na hem: ju bin saelig, Simon Jonas Soon, die maek Vleis en Blud no ka openbaer die na ju, maer mie Vaeder na binne die Hemel. 18.Maer mie seg na ju ookal, dat ju bin Petrus; en na bobo deese Klip mie wil bow mie Gemeinte, en die Porten van die Hel no sal krieg magt over die. 19.En mie wil giev na ju die Sleetelen van die Hemelrik; al wat ju bind na die Aerde, sal wees gebonden na binne die Hemel ookal, en al wat ju los na die Aerde, sal wees gelost na die Hemel ookal. 20.Soo hem ha verbiedt sie Disciplen, dat sellie no sal ha seg na niet een Volk, dat hem bin Jesus die Christus. 21.III.) Van die Tid af Jesus ha begin for openbaer na sie Disciplen, dat hem mut loop na Jerusalem, en lie gu van die Oudste en Hoog Priesters, en Skriftgeleerden, en for wordt gedoot, en staen op weeran na die derde Dag. 22.En Petrus ha neem hem na sie, en ha bestraev hem, en ha seg: Heere, spaer ju selv; dat no gebeer ju levendag! 23.Maer Jesus ha draej sie om, en ha seg na Petrus: loop wej van mie, Satan! ju bin een Ergernis voor mie! want ju no meen, wat bin godtlig, maer wat bin menslig. 24.IV.) Soo Jesus ha seg na sie Disciplen: als Imand wil volg mie, hem mut verlooken sie selv, en neem op die Krus, en volg mie. 25.Want, die suek for salveer sie Leven, sal verloor die; maer die verloor sie Leven voor mie wil, sal vind die. 26.Wat die kan help een Mens, als hem wind die heel Weereld, en lie Skaede na sie Siel? of wat een Mens kan giev, dat hem kan los sie Siel weeran? 27.Want die sal gebeer, dat die Mens sie Soon sal kom na

die Heerligheid van sie Vaeder mit sie Englen; en dan hem sal betael elk een nae sie Werk. 28.Waerwaer mie seg na jender: som staen hiesoo, die no sal smaek die Dood, eer sellie kik die Mens sie Soon kom na binne sie Rik.

Die 17. Capittel.

I.) Christus kom verklaert na bobo die Berg, 1-9. spreek van Elias, 10-13. II.) genees die Maen-Siek, 14-21. III.) seeg vooryt van sie Leiden. 22-23. IV.) betael Skat, 24-27.

En sees Dagen asteran Jesus ha neem Petrus en Jacobus, en sie. Bruder Johannes na sie, en ha lej sender besonders na bobo een hoog Berg. 2.En hem ha kom verklaert voor sender, en sie Angesigt ha skien als die Son, en sie Kleer ha kom soo wit als die Ligt. 3.En kik, sellie ha kik Moses en Elias, die ha spreek mit hem. 4.En Petrus ha antwoordt en ha seg na Jesus: Heere, die bin fraej voor ons for wees hiesoo; als ju wil, ons sal maek drie Tenten hiesoo, een voor ju, en een voor Moses, en een voor Elias. 5.Dietit hem ha praet nogal, kik, een klar Wolk ha kom over sender: en kik, een Stem na die Wolk ha seg: Deese bin mie lieve Soon, na die mie hab een Welbehaegen; hoor hem. 6.Dietit die Disciplen ha hoor die, sellie ha val ha sender Angesigt, en ha vrees gu. 7.Maer Jesus ha kom na sender, ha ruer sender an, en ha seg: hoppo, en no wees bang. 8.En diedit sellie ha hoppo sender Oogen, sellie no ha kik niemand, als Jesus alleen. 9.En dietit sellie ha loop na molee van die Berg, Jesus ha belast sender, en ha seg: jellie no mut seg die Gesigt na niet een Volk, eer die Mens sie Soon ka staen op van die Dood. 10.En sie Disciplen ha vraeg hem, en ha seg: watmaek die Skriftgeleerden seg dan, dat Elias mut kom eerst? 11.Maer Jesus ha antwoordt, en ha seg na sender: seeker, Elias sal kom eerst, en maek almael te regt. 12.Maer mie seg na jender: Elias ka kom alreets, en sellie no ka weet hem, maer sellie

ka due mit hem, wat sellie ha wil; soo die Mens sie Soon sal lie van sender ookal. 13.Soo die Disciplen ha verstaen, dat hem ha ka seg na sender van Johannes die Dooper. 14.II.) En dietit sellie ka kom na die Volk, een Mens ha kom na hem, en ha val neer voor sie Vutten, en ha seg: 15.Heere, hab Jammer na mie Soon, diemaek hem bin Maen siek, en lie gu Pien; want hem val dikwils na binne die Vier, en dikwils na binne die Water. 16.En mie ha bring hem na ju Disciplen, en sellie no ha kan genees hem. 17.Maer Jesus ha antwoordt, en ha seg: O ju ongloovig en verkeerd Geslagt! hu lang mie sal wees mit jender? hu lang mie sal verdraeg jender? bring hem hiesoo na mie. 18.En Jesus ha dreig die Dievel, en hem ha vaer yt van hem; en die Jong ka kom gesond van die selve yer. 19.Soo die Disciplen ha kom na hem alleen, en ha seg: watmaek ons no ha kan driev hem yt? 20.Maer Jesus ha seg na sender: voor die wille van jender Ongloof; want waerwaer mie seg na jender: als jellie hab een Gloof als een Moster-Saed, jellie sal kan seg na die Berg hiesoo: hoppo van hiesoo na daesoo, soo die sal hoppo; en niet een gut sal wees onmooglig voor jender. 21.Maer deese Sort no vaer yt als door Gebed en Vasten. 22.III.) Nu dietit sellie ha kom weeran na Galilea, Jesus ha seg na sender: sellie sal leever die Mens sie Soon na die Handen van die Mensen: 23.En sellie sal maek hem doot, en hem sal staen op weeran na die derde Dag; en sellie ha kom gu bedruevt. 24.IV.) Maer dietit sellie ha kom na Capernaum, sellie, die ontfang die Skat, ha kom na Petrus, en ha seg: jender Meester no bin gewent for betael Skat? 25.Hem ha seg: ja. En dietit hem ka kom na binne die Hus, Jesus ha kom hem voor, en ha seg: wat ju denk, Simon? van wie die Kooningen na Aerde neem Skat? van die Kinders, of van die Vreemden? 26.Soo Petrus ha seg na hem: van die Vreemden. Jesus ha seg na hem: dan die Kinders bin vrie immers. 27.Maer, dat ons no sal erger sender, soo loop na die See, en gooj een Huk yt, en die eerste Vis, die kom op, neem die; en als ju open sie Mond, ju sal vind een Stater; neem die, en giev die na sender voor mie en ju.

Die 18. Capittel.

I.) Jesus leer sie Disciplen for mej Hoogmudigheid en Ergernis, 1-10, ka kom for salveer, 11-14. II.) praet van bruderlig Bestraffing, for bind en los, 15-18. van vereenigt Gebed, 19-20. III.) van Vergeving, 21-22. die hem verklaer mit die Gliknis van die groot Debitor, 23-35.

Na die selve Tid die Disciplen ha loop na Jesus, en ha seg: da wie bin die grootste na binne die Hemelrik? 2.En Jesus ha ruep een Kind na sie, en ha set die na die Middel van sender. 3.En ha seg: waerwaer mie seg na jender: als jellie no bekeer, en kom als een Kind, jellie no sal kom na binne die Hemelrik levendag. 4.Daerom, hem, die verneder sie selv als deese Kind, bin die grootste na binne die Hemelrik. 5.En die ontfang soo een Kind na mie Naem, ontfang mie. 6.Maer hem, die erger een van deese kleinste, die gloov na mie, die ha wees beeter voor hem, dat een Mola-Steen ha ka hang ront sie Keel, en hem ha ka versiep na die diepste Plek van die See. 7.Wee die Weereld voor Ergernissen! want Ergernissen mut kom; dog wee die Mens, door wie die Ergernis kom! 8.Maer als ju Hand, of ju Vut erger ju, kap sender af, en gooj sender wej van ju. Die bin beeter voor ju, dat ju loop lam of Kreepel na binne die Leven, als dat ju hab twee Handen, en twee Vutten, en wordt gegoojt na binne die eewig Vier. 9.En als ju Oog erger ju, trek die yt, en gooj die wej van ju. Die bin beeter voor ju, dat ju loop mit een Oog na binne die Leven, als dat ju hab twee Oogen, en wordt gegoojt na die helse Vier. 10.Pas op, dat jellie no veragt een van deese kleine; want mie seg na jender: sender Englen na binne die Hemel kik altit die Angesigt van mie Vaeder na binne die Hemel. 11.Want die Mens sie Soon ka kom for maek saelig, wat ka verloor. 12.Wat jellie denk? als een

Mens ha hab honderd Skaepen, en een van sender ha verdwael, hem no lastaen die negen en negentig, en loop na bobo die Bergen, en suek die, die ka verdwael? 13.En als die gebeer, dat hem vind die, waerwaer mie seg na jender: hem bin meer blie over die, als over die negen en negentig, die no ha verdwael. 14.Soo ookal, die no bin die wil van jender Vaeder na binne die Hemel, dat een van deese kleintjes sal verloor. 15.II.) Maer als ju Bruder sondig tegen ju, loop heen, en bestraev hem tyssen hem en ju alleen; als hem hoor ju, ju ka wind ju Bruder. 16.Maer als hem no hoor ju, soo neem een oft twee mit ju nogal; dat almael Saek sal bestaen na die Mond van twee of drie Getiegens. 17.Maer als hem no hoor sender, soo seg dat na die Gemeinte; maer als hem no hoor die Gemeinte, soo how hem als een Heiden en Tollenar. 18.Waerwaer mie seg na jender: al wat jellie bind op die Aerde, sal ka bind na binne die Hemel ookal; en al wat jellie los op die Aerde, sal ka los na binne die Hemel ookal. 19.Verder mie seg na jender, dat als twee van jender accordeer op die Aerde, voor wat gut die bin ookal, dat sellie wil bid voor, die sal gebeer sender van mie Vaeder na binne die Hemel. 20.Diemaek, waer twee of drie ka kom malkander in mie Naem, daer mie sal wees na middel van sender. 21.III.) Soo Petrus ha kom na hem, en ha seg: Heere, hu veel mael mie sal vergeev mie Bruder, die sondig tegen mie? da gnug seven mael? 22.Jesus ha seg na hem: mie no seg ju seven mael, maer seventig mael seven mael. 23.Daerom die Hemelrik bin glik een Kooning, die ha wil how Reekenskap mit sie Knegten. 24.En dietit hem ha ka begin for reeken, een ha kom voor hem, die ha skylt tien dysend Pond. 25.Maer soo lang hem no ha hab een gut for betael mit, die Heer ha belast for verkoop hem, en sie Vrow en Kinders, en al wat hem ha hab for betael sie Skyld. 26.Daerom die Knegt ha val neer, ha bid hem an, en ha seg: Heere hab Gedyld mit mie, en mie wil betael ju almael. 27.Soo die Heer van die selve Knegt ha jammer hem gu, en ha lastaen hem los, en ha maek hem vrie van die Skyld ookal.

28.Soo die selve Knegt ha loop yt, en ha vind een van sie Mede-Knegten, die ha skylt hem honderd Penningen; en hem ha vas hem na sie Keel, en ha seg: betael mie wat ju hab mie Skyld. 29.Soo sie Mede-Knegt ha val neer voor sie Vutten, en ha bid hem, en ha seg: hab Gedyld mit mie, mie wil betael ju die almael. 30.Maer hem no ha wil; maer ha loop heen, en ha gooj hem na binne die Gevangnis, tee hem ka betael hem die Skyld. 31.Maer dietit sie Mede-Knegten ha ka kik dat, sellie ha kom gu bedruevt; en sellie ha kom, en ha seg na sender Heer al wat ka gebeer. 32.Soo Sie Heer ha ruep hem, en ha seg na hem: ju booze Knegt, mie ka vergeev ju al ju Skyld, voordiemaek ju ka bid mie. 33.Ju no sal ha jammer ju Mede-Knegt ookal, soo als mie ka jammer ju? 34.En sie Heer ha kom toornig, en ha giev hem over na sender, die pienig, tee hem ha betael almael die Skyld na hem. 35.Soo mie hemelse Vaeder sal due mit jender ookal, als jellie no vergeev van jender geheel Hart, elk een sie Bruder sie Skyld.

Die 19. Capittel.

I.) Jesus genees, 1. 2. spreek van Skejing tyssen Egt Volk, en van Hiewlik, 3-15. II.) belast die Jongman for seg af sie Riekdom, 16-22. praet van die Rieken, 23-26. III.) troost sender, die seg af wat voor sie Skyld, 27-30.

En die ka gebeer, dietit Jesus ha ka maek een einde van deese Woorden, hem ha loop wej van Galilea, en ha kom na die Landdeel van Judea na die ander Sie van Jordan. 2.En veel Volk ha volg hem; en hem ha genees sender daesoo. 3.Soo die Phariseewen ha kom na hem, ha versuek hem, en ha seg na hem: die bin regt ookal, dat een Man skej van sie Vrow voor eenig gut? 4.Maer hem ha antwoordt, en ha seg na sender: Jellie no ka lees, dat hem, die ka maek die Mens na die Begin, ka maek die soo, dat een Man en een Vrow ha sal wees?

5.En ha seg: daerom een Mens sal verlaet sie Vader en sie Muder, en sal bliev na sie Vrow; en sellie twee sal wees een Vleis. 6.Soo sellie nu no bin twee, maer een Vleis. Wat nu Godt ka vueg malkander, die Mens no sal skej. 7.Soo sellie ha seg: watmaek Moses ka belast, for giev een skej Brief, en skej van hem? 8.Hem ha seg na sender: Moses ka permitteer jender for skej van jender Vrowen, om die wille van die Hardigheid van jender Harten; maer die no ha wees soo van die Begin. 9.Maer mie seg na jender: die skej van sie Vrow, onoso die mut wees voor Huer Skyld, en trow een ander, hem huer; en die, die trow mit die Vrow, die ka skej, hem huer ookal. 10.Soo sie Disciplen ha seg na hem: als die bin soo van een Man mit sie Vrow, dan die no bin gued for trow. 11.Maer hem ha seg na sender: almael Volk no vat die Woord, maer sellie na die die ka giev. 12.Want die hab som, ka snie, sellie bin gebooren soo van sender Muder Lif; en die hab som, ka snie, sellie ka snie van die Menschen; en die hab som, ka snie, sellie ka snie sender selv voor die wille van die Hemelrik: die kan for verstaen die, sellie verstaen die! 13.So sellie ha bring klein Kinders na hem, dat hem ha sal leg sie Handen na bobo sender, en bid; maer die Disciplen ha bestraev sender. 14.Maer Jesus ha seg: lastaen die klein Kinders mit Vreede, en no hinder sender for kom na mie; want die Hemelrik bin van sender. 15.En hem ha leg sie Handen na bobo sender, en ha loop wej van daesoo. 16.II.) En kik een ha kom na hem, en ha seg: gueje Meester, wat gut mie sal due, dat mie kan hab die eewig Leven? 17.Maer Jezus ha seg na hem: watmaek ju seg mie gueje? niet een bin gued, als Godt alleen; maer als ju wil loop na binne die Leven, how die Geboden. 18.Soo hem ha seg na Jesus: welke? En Jesus ha seg: deese: ju no sal maek doot; ju no sal steel; ju nu sal giev vals Getiegnis. 19.Eer ju Vaeder en ju Muder; en ju sal hab ju Naeste lief, als ju selv. 20.Soo die Jongman ha seg na hem: almael dat mie ka how van mie Kindheid af: wat mie mankeer nogal? 21.Jesus ha seg na hem:

als ju wil wees volkom, soo loop heen, en verkoop al, wat ju hab, en giev die na die Povers; dan ju sal hab een Skat na binne die Hemel; en kom, en volg mie. 22.Maer dietit die Jongman ha ka hoor dat, hem ha loop wej bedrueft; diemaek hem ha hab mussie gut. 23.En Jesus ha seg na sie Disciplen: waerwaer mie seg na jender: een Riek sal pas kom na binne die Hemelrik. 24.En verder mie seg na jender; die bin meer ligt, dat een Kameel loop door die Oog van een Naeld, als dat een Riek kom na binne die Rik van Godt. 25.Dietit sie Disciplen ha hoor dat, sellie ha verskrik gu, en ha seg: Ej! wie kan kom saelig dan? 26.Maer Jesus ha kik na sender, en ha seg na sender, die bin onmooglig na die Mensen, maer almael gut bin mooglik na Godt. 27.III.) Soo Petrus ha antwoordt, en ha seg na hem: kik ons ka verlaet almael gut, en ka volg ju; wat ons sal hab voor dat? 28.Maer Jesus ha seg na sender: waerwaer mie seg na jender dat jellie, die ka volg mie na die wedergeboorte dietit die Mens sie Soon sal sit na die Stul van sie Heerligheid, jellie ookal sal sit na twaelf Stulen, en oordeel die twaelf Stammen van Israel. 29.En elk een, die ka verlaet Hus, of Bruders, of Sisters, of Vaeder, of Muder, of Vrow, of Kinders, of Akker voor mie Naem wil, hem sal ontfang die honderd voud weeran, en erv die eeuwig Leven. 30.Maer veele, die bin die eerste, sal kom die leste, en die leste die eerste.

Die 20. Capittel.

I.) Jesus spreek van die Werkmans na binne die Wienberg, 1-16. II.) van sie Leiden, 17-19. III.) Hem bestraev die Soons van Zebedeus, en vermaen tot Ootmudigheid, 20-28. IV.) genees twee Blinden bie Jericho, 29-34.

Die Hemelrik bin glik een Husvaeder, die ka loop yt gu vrue for hier Werk-Volk na binne sie Wienberg. 2.En dietit hem ka accordeer mit sender voor een Penning na die Dag, hem ha stier sender na die Wienberg.

3.En hem ha loop yt na die derde yer, en ha kik ander staen leeg na die Markt. 4.En ha seg na sender: jellie loop ookal na die Wienberg, en mie sal giev na jender, wat bin regt; en sellie ha loop heen. 5.Weeran hem ha loop yt na die sesde en negende yer, en ha due eeven soo. 6.Maer na die elfde yer hem ha loop yt, en ha vind ander staen leeg, en ha seg na sender: watmaek jellie staen leeg hiesoo die heel Dag? 7.Sellie ha seg na hem: voordiemaek niet een Volk ha hier ons. Hem ha seg na sender: jellie ookal loop na die Wienberg, en jellie sal krieg, wat bin regt. 8.Nu dietit Avond ha kom, die Meester van die Wienberg ha seg na sie Cassier: ruep die Werkvolk, en betael sender die Hier, en begin van die leste tee na die eerste. 9.Soo sellie ha kom, die ha ka hier na die elfde yer, en elk een ha krieg sie Penning. 10.Maer dietit die eerste ha kom, sellie ha denk, dat sellie ha sal krieg meer; en sellie ook ha krieg elk een sie Penning. 11.En dietit sellie ha ka krieg die, sellie ha knor tegen die Husvaeder, en ha seg: 12.Deese leste ha werk een yer maer, en ju ka maek sender glik mit ons, die ka draeg die Last en die Hitte van die heel Dag. 13.Maer hem ha antwoordt, en ha seg na een van sender: mie Vriend! mie no due ju Onregt: ju no ka accordeer mit mie voor een Penning? 14.Neem wat bin van ju, en loop wej. Maer mie wil giev na deese leste, glik als na ju. 15.Of mie no hab Magt for due mit mie gut, wat mie wil? of ju kik sier daerom, dat mie bin guedaerdig? 16.Soo die leste sal kom die eerste, en die eerste sal kom die leste; want veele bin geruepen, maer weinig bin verkooren. 17.II.) En Jesus ha loop op na Jerusalem, en ha neem die twaelf Disciplen alleen na die Pad, en ha seg na sender: 18.Kik ons loop op na Jerusalem, en die Mens sie Soon sal wordt geleevert na die Hoog-Priesters en Skrift-geleerden: en sellie sal veroordeel hem na die Dood; 19.En sal leever hem over na die Heidens, for bespot, geesel en krusig; en na die derde Dag hem sal staen op weeran. 20.III.) Soo die Muder van Zebedeus sie Kinders ha kom

na hem mit sie twee Soons, ha val neer voor hem, en ha bid wat van hem. 21.Maer Jesus ha seg na hem; wat ju wil? Hem ha seg na hem: lastaen deese mie twee Soons sit na binne ju Rik, die een na ju regter Hand, die ander na ju slinker Hand. 22.Maer Jesus ha antwoordt, en ha seg: Jellie no weet, wat gut jellie bid; jellie kan drink die Beeker mie sal drink, en jellie kan lastaen doop jender mit die Doop, die mie sal wordt gedoopt mit? sellie seg na hem: ons kan. 23.En hem ha seg na sender: jellie sal wel drink mie Beeker, en jellie sal wordt gedoopt mit die Doop, mit die mie sal wordt gedoopt; maer for sit na mie regter, en slinker Hand, no staen na mie for giev na niet een; maer die sal giev na sender, die ka berej van mie Vaeder. 24.En dietit die Tien ha ka hoor dat, sellie ha kom qwaet na die twee Bruders. 25.Maer Jesus ha ruep sender na sie, en ha seg: jellie weet, dat die Weerelds Vorsten regeer over sender, en die Over-Heeren gebryk Magt over sender. 26.Maer soo die no sal wees tyssen jender; maer als een van jender wil wees meer magtig, hem sal wees jender Dienar; 27.En die wil wees die voornaemste, sal wees jender Dienar: 28.Glik als die Mens sie Soon no ka kom, for lastaen dien sie, maer for dien, en for giev sie Leven for een Verlossing van veele. 29.IV.) En dietit sellie ha loop yt van Jericho, veel Volk ha volg hem. 30.En kik twee Blinden ha sit na die Pad, en dietit sellie ha ka hoor, dat Jesus ha passeer, sellie ha ruep, en ha seg: ak Heere, David sie Soon, hab Jammer na ons! 31.Maer die Volk ha bestraev sender, dat sellie ha sal swieg; maer sellie ha ruep meer, en ha seg: ak Heere, David sie Soon, hab Jammer over ons! 32.En Jesus ha staen stil, en ha ruep sender, en ha seg: wat jellie wil, dat mie sal due na jender? 33.Sellie ha seg na hem: Heere! dat ons Oogen sal open. 34.En Jesus ha jammer sender gu, en ha ruer na sender Oogen. En anstonds sender Oogen ha open for kik weeran, en sellie ha volg hem.