Eddy Pinas
San pesa ini Kaneri
(fosi boskopu)

Gi Ronald
ini Amsterdam

Baka di yu seni aksi mi fu ondrosuku a fini fu san ben pasa someni tenti yari na un baka nanga Jusu ini Kaneri, mi suku ala san mi ben kan feni fu a tori disi.

Leki fa yu sabi, Kaneri na wan owru, fergiti pranasi. Fu di yu no ben man bedoi mi na sortu kriki a ben didon, mi no ben abi furu fu bigin wroko, meki mi ben abi fu go diki a tori disi ini tra pranasi fu a Parakontren.

Mi taki tori nanga furu bigisma, ma furu yepi mi no feni ini a bigin. Son leisi te a nen Kaneri ben fadon wantron den ben tapu den srefi leki wan inginoto. Ma mi no ben lasi ati. A so mi go feni

wan bigiman ini a pranasi Koetiri di, leki fa a taki, rutu komoto fu Kaneri, ala di noiti a ben libi de.

Oom Herman mi sa kari en, bika a no wani en nen kari. Oom Herman ferteri mi san a ben sabi fu a dei di Jusu gwe. Noiti a misi mofo fu taki, a dei di Jusu dede. En ben de a fosi sma di taki fu Loi, a ontidagu fu Jusu. A ben kan memre en srefi, taki Kaneri ben didon na a sei-bere fu Lapokriki, wan smara anu fu Paraliba, a oposei fu Kropina. Den ben kari en so fu di a ben lai logologo te.......... Wan sonde mi kisi oom Herman so fara fu tyari mi nanga boto go suku a pranasi. En, oom Herman, ooktu no ben sabi a soifri kriki. Baka furu suku un go feni wan bun owru broko pranasi sei wan pikin kriki, lai nanga bagasi. Den oso broko fadon. Soso den wanwan pisi di ben tenapu ete ben e sori taki fosi sma ben e libi de. Efu mi fiti fiti ala sani di mi ben sabi keba kon a wan, dan mi denki taki mi feni Kaneri.

A fasi fa a pranasi ben wroko e kruderi nanga a di pe Jusu ben e libi. Ini mi prakseri mi ben e si a pranasi na en libi-yuru baka. Jusu ben de, Sana, Koene, Meester, Fefe.......... Te mi moksi san mi si, san mi yere ini tori nanga san oom Herman ben kan memre en srefi kon na wan, mi kan seti a tori so:

Kaneri ben de wan pikin pranasi leki fa furu trawan ben de a pisiten dati na ini Para. Te yu

ben luku den sma fu Kaneri, yu ben e si wan sani di ben de fu si ini den tra pranasi tu: Jonkuman nanga yonguwentje no ben de. Fu di den no ben wani libi moro fu tranga gronwroko den ben froisi go libi na foto. Den di ben abi pikin libi den gi den mama. So meki Kaneri ben abi soso bigisma nanga pikin krioro. Alasma ben abi en famiribuku pe en nen skrifi, ma den nen disi ben e teki ini anu soso na spisrutu okasi leki: dopu, trow nanga so moro fara. Ini aladei-libi srefi den ben abi tra nen. So srefi taki te i ben kari wan sma na en sondenen a no ben e drai luku yu, bika a no gwenti a nen dati. Fu eksempre i ben abi Salosa, di sondenen ben de Heloise Frederika Praal. Cornelis Gerardus Walder, den ben e kari Koene. Meester, den ben e kari Johannes Potter, fu di en ben de a kodowan di ben sabi leisi nanga skrifi pikinso, a ben tan wantu yari na foto na wan misi. Di a ben weri fu du ala den doti wroko fu misi, a begi en bigisma fu tyari en go na pranasi baka. Meester ben e leisi ala brifi gi den sma. Kaneri no ben abi skoro ma meester ben e yep-yepi den krioro nanga san a sabi. A ben e leri den libikoni tu. A ben taki: ‘Liever een vokel in de and dan tien in de lukt.’

Fo yuru bakadina a de te a boskopu disi e bigin. A son ben bigin suku en sribi-presi keba. Tjepantji ben e prei dyompofutu tapu pankuku-wiwiri, rowti ben e singi a dei go na kebapisi. Te na loktu fu wan mira-udu wan doifi-aka ben

e srapu en nangra tapu en frei. Ini a pranasi wan switi smeri fu brabakotofisi ben e fungu en srefi mindri den oso, wan mata ben e fon. Umasma ben e wroko, krioro ben e prei. Leki fa a gwenti ben de - te bakadina - den man fu a pranasi ben sidon a wan ini a kampu fu sisa Ana die den ben e kari Sana. Sana oso ben de a libakanti, krosbei fu a owru lampe. A oso ben de wan fu den moro owru wan; Sana granpapa ben meki en. Dati ben de fu si so na a fasi fa a meki. A ben sidon tapu walabapostu di ben hei dri futu; dan a ben tapu nanga singri. Den planga, di ben sa nanga anu, ben krabu so furu nanga owru, dati den spikriede ben e sutu leki butsweri kon a doro. Apisten fu Sana granpapa otopasi no ben e go a foto. Wan heri dei den ben abi fu pari boto go na foto fu bai den wanwan sani di pranasi sma abi fanowdu. So meki Ba Hendri, Sana papa, di ben de wan koni man, hari wan gadri gi a oso, dan a bigin wan pikin wenkri: Bakaten a meki a kampu disi di a fasi na a oso-skin. Sensi a pisiten dati a kampu tron a komakandrapresi fu den man. A drape kerki ben e hori tu, te Pater ben fisiti Kaneri.

Sondro fu miti mofo, den uma no ben e go sidon de, so den man ben abi den eigi kontren tu. A bakadina dati den sidon ini a kampu so du... No wan sma no ben e taki, ma yoisti a tantiri fu den ben e ferteri morofuru leki wan tori ben kan du. Kostan nanga Ba Koene ben sidon a wan

fokanti tafra e tyityi den pipa, wan batra dran nanga tu stongrasi ben de a den mindri. Ba Fefe ben sidon a wan sei tapu wan kisi, en finga ben e trubu ini en barba di ben weti so fan. Oom Dorfoe, Meester, Tjali, Oom Broertje nanga den trawan ben sidon de. Den prakseri ben de tranga nofo fu man steiser a tabakasmoko nanga a smeri fu dran. Pa Dorfoe, a moro granwan, krabu en neki fu broko a span. Di no wan sma beweigi a taki: ‘Fefe.’

‘Ja mi Omu.’ Fefe drai en ede sondro fu puru en finga ini en barba.

‘Fe mi boi, sani dangra yu.’ Fefe bigin skoifiskoifi tapu en presi.

‘Nono Papa, a no taki so.’ Pa Dorfoe pingi en ai, watyi Fefe leki a ben wani wegi en. A no ben de tapu en fesi fu si san a ben e prakseri, ma Fefe no ben firi switi. Kakalaka ben e koiri ini en brudu. A teki en pipa dan a hari en so paw. A ben tiri baka ini a kampu, so meki i ben kan yere a paleta-tiki fu Sana di ben e wroko in a kukru. Na lampe-bilosei a sten fu wan kodya ben e komoto. Tra sei wan mata ben e piki. A gersi den ben e bari boskopu gi den srefi ini wan eigi tongo, a mata nanga a kodya. Kostan naki wan mofo dran, dan a hari en anu pesa tapu en mofo.

‘Un mus' du wan sani’, a taki.

‘San so’, meester aksi. Kostan luku en so ferwondru.

‘We Meester, taigi mi wan sani, un sa man sidon

pi e luku fa Jusu ee.....e.....’ A tapu en mofo leki a ben e frede fu taki go moro fara. ‘San un sa man du Kostan, san.’ Meester opo tenapu, a fringi en ai go tapu a kriki, a bigin waka-waka ini a kampu, drai-drai leki wan sonfowru.

‘A no alasani yu sa man ankra nanga wortu. Wan alen di e fadon i no sa man drai go na loktu baka. San un kan du na wakti e luku lontu, kande wan dei...’ A tapu en mofo di a si dati den trawan no ben e bribi ini a dei dati.

A wan pisiten keba di Jusu no ben e sidon nanga den moro. Te a kemoto na gron, a ben e go na oso, nyan, dan a koiri nanga Loi, en dagu, go na a keba fu a pranasi. Bigin bigin den ben denki taki wan pikin mandi ben de. Den no ben man ferstan fu san ede Jusu ben e libi den go sidon en wawan na a krikikanti. Bakatan den taki Jusu law. Fuka fu en granpapa di ben kiri wan papasneki ini en gron, ben de na en tapu. Iya, a so Fefe ben si! Fefe ben de a sabiman fu Kaneri, Feifi winti ben e bari na en koko. Zus Dodo, a wefi fu Jusu, firi tu taki wan sani kenki ini en masra, ala di a no ben sabi san. Son leisi a ben kisi wan frede firi, Jusu ben tan wan sortu fasi. Wan mofoneti en nanga Jusu ben sidon a sei-oso tapu wan bangi. A muntyen-tyi ben e fufuru ai luku den mindri den taki fu a manyabon. Jusu ben gwe baka ini wan dipi prakseri, en fesi ben luku leki a ben e dren. Di

a bigin taki a ben gersi leki wan tra sma go libi ini en borsu.

‘Foe san ede den todo e singi? Kande na odi den e bari Anana. Luku den fayaworon. Dusun-dusun fayaworon di e dansi nanga leti frambo. Mi wani tron wan fayaworon. Mi wani dansi tu nanga faya ini mi anu.’ Dodo no piki, bika a sabi tak Jusu no ben e taki nanga en. Bun safri Jusu ben e taki, leki a ben wani tesi den wortu wan fu wan. Di a winti tyari den laaste wortu go moksi nanga a nyungu-nyungu fu marpataki, Loi opo, a drai lontu dan a tan tenapu fesi Jusu. A prani en futu steifi a gron, opo en ede, dan a ba-ri. So a poti en nen ondro den wortu fu en basi. A kanti didon na Jusu futusei baka. Jusu hari en anu pasa tapu Loi ede. A taki moro safri dis' leisi: ‘Loi, wan dei mi sa gwe. Kande mi sa tron winti... safri neti-winti. Kande mi sa tron wan winti, bari na krioro-koko.’ Wan groskin teki Dodo fu en ede te na en gronfutu. A so a ben abi fu luku fa Jusu e kenki sondro fu man du wan sani. A pisiten dati Jusu ben tapu nyan meti keba. Wan dei a ben taigi Dodo taki a no sa nyan meti moro.

‘A meti na wan pisi fu mi srefi. A so Anana seti en keba.’ Jusu meki a sani te Dodo no ben man tyari en moro. A teki a tori disi taki nanga den bigiman. Fefe teki futudoti fu Jusu, a seti wan luku, dan a si fuka.......Aya!

Wan neti a teki a dikati fu opo a tori nanga

Jusu. A ben wani saka go teki a siki, ma Jusu la-fu. A yere a kriki ini a lafu, winti di ben wai mindri tyenpeiri, smeri fu lepi awara, kumbusiri, watramaka tokotoko... a gwe!

A so den ben sidon a bakadina dati ini a kampu nanga a sabi disi fu san ben pasa. Sana sutu en ede kemoto na ini a kukru.

‘Jusu no kon ete?’

‘Nono mi sisa’, wan fu den piki. Sana meki so: ‘Hmmmm’, dan a hari go ini en kukru baka. ‘A tan lati tide.’ Oom Broertje sabi taki a taki wan sani di den trawan sabi tu. Jusu ben lusu mamanten fruku nanga en boto. Loi ben tenapu na ede leki wan kulaman. Baka di a boto ben lusu fosi den tra dagu ini a pranasi ben bigin prei. ‘Kande a sutu wan meti.’ Disi ben de a sten fu Tjali. Pa Dorfoe piki: ‘We Tjali. Na yu wawan no sabi taki Jusu no e onti moro?’ Ala di den e taki den no sabi taki Jusu ben de na pasi e kon keba.

Fo yuru bakadina a ben de. Pankuku- nanga sarasarawiwiri ben e gro tapu a kriki. A mindri-sei wan smara botopasi ben tan opo. Safri, bun safri wan kruyara ben e grati pesa tapu a brenki lenti fu a blaka watra di ben e sori moro blaka ini a sombra fu den bontaki di ben anga abra. Nanga wan sortu lespeki a pari ben e hari ini a watra. A gersi den ben e freiri, a pari nanga a watra. Fisi ben e prei, den no ben frede. Na a tere fu a boto wan man ben sidon. A pari ben

didon ini en anu leki wan pisi fu en srefi. A no ben weri tapuseikrosi. En skin no ben bigi, ma te a hari a pari, wan switi prei fu tetei ben e kon fu si ondro en buba di ben abi a kroru fu wan lepi sterapra.

Jusu ben abi feifi tenti yari. En skin nanga fesi no ben e sori so owru, ma suma ben sa luku ini en ai, a bakadina dati tapu Lapokriki, ben sa si ai di owru hondru yari - ai di ben de alaten! Na edesei fu a boto Loi ben tenapu. En ai ben e waka tapu a kriki nanga den bon a seisei. Noti a ben e misi. Loi no ben de wan moi dagu. Son presi a wiwiri ben fadon kemoto na en skin, so meki wan lo owru mankerimarki ben de fu si. Afu fu en wan yesi ben lasi ini wan feti nanga wan tigrikati. Maka nanga busi-meti-nangra marki en so wan fasi dati alasma ben kisi lespeki gi a owru ontidagu disi, di ben abi dekati pesa.

Loi, en masra nanga a boto ben gersi wan skin. Wan skin di ben meki mati nanga na watra. Nanga lespeki a skin ben e grati pesa tapu a watra. A watra ben e loblobi en ondrobere wan switi sortu fasi. Wan-wan leisi pankukuwiwiri ben e kon ini a prei. Den wan-wan pisi son di ben e pesa mindri den wiwiri ben e dansi wan prisiri dansi tapu a kriki. A pisiten Jusu pesa a laaste boktu bifo Kaneri, a hari a pari kemoto ini a watra, dan a dwars en tapu en bowtu. A boto ben e grati go doro. Nanga wan dren-fesi a luku lontu. Wan safri winti ben e yando ini den bon-

wiwiri, di ben e konkru. Pikinfowru ben e trotyi a moi fu a bakadina. Jusu firi wan sani ini en gorogoro. A sori leki a ben e sari fu go na a pranasi pe en oso de. A sten fu Loi kari en kon baka. Loi ben abi a gwenti fu opo en sten te den pesa a boktu. Kaneri musu sabi dati den e doro. A hapo en srefi leki wan gado na a boto-ede. Ini a pranasi wan soktu hari pesa mindri wantu weti barba. Ala barba ben sori go a libasei. Den dagu ini a pranasi kowru. Den srefi ben abi lespeki gi a owru feti-basi, Loi. A boto hari go nanga bere tapu a lampe. Loi dyompo kemoto, kren go a syoro, dan a tan tenapu wakti en masra. Sondro hasti Jusu saka tai en boto dan a teki waka. Di a pesa a kampu a knoru wan odi. A ben waka doro ma Pa Dorfoe no ben lobi so, a taki: ‘Jusu, san y'e mek' san' so?’ Jusu drai luku en. Wan smara lafu koiri pesa tapu en fesi, dan a waka doro. Di a waka gwe a kampu ben tiri. Wan afu yuru a baka a waka na a krikikanti go na oposei, Loi na en fesi. Di den doro wan bon di panya en rutu hei tapu doti, a tan tenapu, drai luku lontu leki a ben wan sabi ef en nanga Loi wawan ben drape. Di a firi satisfaksi a go sidon tapu wan rutu. Loi kanti sidon na en futu. Ala span ben komoto tapu en fesi, di a ben luku a kriki nanga a dyompo-dyompo fu den fisi. A tan sidon wan heri pisiten, dan a waka go na a watrakanti. Safri en sten ben e pesa a mindri en mofobuba. Efu den fowru no ben tapu singi yu no ben sa

man yere san a ben e taki. A nati en anu nanga krikiwatra dan a figi en fesi.

‘Mi e pot mi begi tap blakawatra di kemoto na bergi fu hopo go miti Anana. Mi e seti mi begi tapu kowru blakawatra, tiriman fu doti.’ A hopo en srefi. A bari leki en borsu ben sa priti: ‘Tek' mi ini yu blo...... Tek mi ini yu blo! Mi wani lowe nanga yu. Mi wani de yu!’ A watra grati gwe nanga a begi leki wan nyunyu-pikin ini en anu. Smeri foe busibromki ben hari leki wan sribikrosi na en tapu; busifowru fergiti fu froiti. Now Jusu waka te en futu miti a watralin. Ala fisi dukrun. En ai ben fasi tapu a kriki. Loi ben tan didon na en presi aladi a ben e watyi Jusu. Wan lala grofu sten komoto ini Jusu bere. ‘Kumbatitei fu Kaneri. San-ede yu fesi e beifi now di mi wan brasa yu? Yere fa dyendyesi e srapu en nefi tap winti. Aboma set en tya-tyari. No dyonko moro. Dribi pankukuwiwiri di e tap yu fesi.’ A watra seki. Loi hopo tenapu. A bilosei a kodya ben taki wan tori di a no ben e ferstan. En ai ben spikri tap Jusu. Moro a ben e luku, moro Jusu ben e gro. Wan bon a ben e si, wan bergi. A bari di a bergi kanti fadon. Loi lon go na watrakanti fu suku Jusu ma a no feni en. A bari wan leisi, dan a hari nanga en bakafutu na gron.

Di neti tapu den sma no si Jusu kon na oso, den ati ben de na dyompo. Mamanten fruku den bigin suku en. Dei langa den suku. Den ben sabi

taki Jusu no ben kan go fara, bika Loi ben tan ala den dei didon na wan presi ondro a bigibon. Nyanyan a no ben wani. A no ben e gi no wan sma okasi fu kon krosbei fu en. Den naki dron, trowe watra a gron, kari someni winti, ma lespeki gi na konfo, Jusu ben tan gwe.

Kaneri ben de na sari. Moro furu fu den sma ben prakseri dati Jusu dede, aladi no wan ben e taki en. Trawan ben e taki dati a no dede ma a tron wan tra sani, kande a go ini Loi. Sonwan taki dati Jusu frei gwe.

Di baka wan wiki den no feni Jusu noso en dede skin ete, den gi abra. Den umasma puru den lowkrosi kon a doro. Wan man no gi abra en dati ben de Fefe. Ala bigisma, den uma tu, ben de ini a kampu di Fefe dyompo opo. A naki en futu na gron. ‘Tide un sa si suma na man.’ A waka go na en oso. Baka wan syatu pisiten a kon a doro baka, en anu nanga en fesi ben abi weti fu pemba. Heri Kaneri ben e luku di a teki pasi go na oposei, leki fa Jusu ben gwenti du. Fefe, man srefi, sutu en bradi borsu go a fesi. ‘Sani o pesa.’ Alasma ben e denki: ‘Tide na tide.’

Di Fefe doro ondro a bon a si Loi didon pi a sei wan bigi rutu. A ben didon leki wan ston popki. Fefe no ben sabi efu Loi ben si en bika a no ben e meki no wan beweigi. Fefe waka doro. A pisiten a doro ondro a bon, Loi gromu. Fefe tan tenapu watyi Loi. En skin ben gunya, ma a teki dekati naki ete wan futu. Loi gromu

moro tranga. Aladi Fefe kindi ben firi so lebe-lebe a naki ete wan futu. Den wiwiri opo tenapu leki dyindyamaka na Loi skin. A hari en mofo-buba opo. Srapu weti tifi ben e luku Fefe. Fefe bari: ‘San so’, a kari ala en nyumanen, dan a naki wan futu baka. Loi dyompo opo, dan a bari leki wan bun bigi busmeti. A presi seki. Drei wiwiri fadon komoto na a bon pe ondro den ben de. Loi ai kon gersi tu bigi grun faya. Fefe skreki, a hari go nanga baka. San a ben e si no ben de wan dagu moro; a no ben de Loi! A ben de wan hogri, takru sani..... wan frede sani. Fefe tapu denki. En skin gro kowru, a drai safri go na oso. Leki wan dede-dede a waka pesa ini a pranasi. Den sma si dati sani miti en, den no aksi noti. Na oposei a sten fu Loi ben e kemoto. A ben de wan sari sten. Wan dipi sari a ben e panya abra Lapokriki. A winti hori en blo wan syatu pisiten, di Loi kanti nanga sei.