DE DRUCKER TOT DEN LESER.
Aenghesien dat wy (Beminde Leser) int drucken van desen Byencorf,
ghevolght hebben den eersten Byencorf, die sonder Register ghedruckt is
gheweest, soo hebben wy goet ende grootelijck van nooden bevonden, een Register
oft Tafel daer by te voeghen, op dat de Leser alle dinghen, daer toe sijn
begheerte strecket, sonder groote moeyte ende arbeydt (als met der handt
aengheleydet) soude moghen soecken ende vinden. Ende op dat sulcx te
gherievelijcker soude moghen gheschieden, zijn op de canten deses Boecx eenighe
annotatien ende handekens ghestelt, daer het Register op aenwijst, latende den
text ende des auteurs werck ongheroert. Alleenlijck, dat tot meerder
vermakinghe des Lesers, eenighenotable redenen, somwijlen met een ander letter,
somwijlen op een nieu reghel ghestelt zijn, op hope dat wy der ghemeynte
Christi eenighen dienst daer aen souden moghen doen, biddende den eenvoudighen
Leser, dat hy desen onsen arbeyt (daer inne wy gheene costen ghespaert hebben)
int goede wille aennemen, ende niet doen als de sommighe, die selve niet weten
oft willen yet goets aenlegghen, ende evenwel niet laten en connen, den
goetwillighen altijdts te berispen. Want wy hebben ghedaen t'ghene dat wy
ghekunt, ende niet t'ghene dat wy gheerne ghewilt hadden. Indien daer eenighe
fauten mochten wesen, wiltse corrigeren, ende de autheur ontschuldigen. Vaert
wel.
vorige
