[p. 13]
Trefossa
wan troe poewema...
wan troe poewema na wan skreki-sani.
wan troe poewema na wan stré te f' dede.
wan troe poewema na wan tra kondre,
pe joe kan go
te joe psa dede fosi.
wan troe poewema na den wortoe d' e tan abra
te ala trawan n' in joe libi wasi gwe;
wan koko soso,
ma wan di kan sproiti
njoen libi.
lon na mi abra dan,
Aroesoebanja foe grontapoe.
kande wandé, wandé
mofo foe mi sa broko opo
foe taki gi onowsroewan toe wortoe
di, te den gro, sa trowe lepi stari,
di mi de soekoe now.
bro
no pori mi prakseri nojaso
no kari mi foe loekoe no wan pe,
tide mi ati troesoe mi foe go
te na wan tiri kriki, farawe.
no tak na lon mi wani lon gowe
foe di mi frede stré èn kré nomo,
ma kondre b'bari lontoe mi so te,
san mi moe doe? mi broedoe wani bro.
[p. 14]
na kriki-sé dren kondie mi sa si,
pe ala sani moro swit lek dja
èn skreki-tori no sa trobi mi.
te m'drai kon baka sonten mi sa tron
wan pkinso moro betre libisma,
di sabi lafoe, sabi tja fonfon.
sranan
broedoe f' afo
ben dopoe joe doti.
joe santi ben soigi,
ben dringi den dropoe,
Sranan,
te kramnari f'afo
ben boro.
na joe gron wi moe gro.
fajalobi,
a dinamit d' e opo joe prodo so nja,
moe koti en faja,
moe bron na wi broedoe;
dan bromki sa monjo na wi libi
foe njan na bigi frijari,
di Sranan nanga wi de froewakti,
so langa.
wan enkri gado-momenti....
wan enkri gado-momenti, nomoro,
e poko na wi mindri.
ma en meti span
lek te hondro jari
sinta na wan.
[p. 15]
Sisi, mi m'ma,
agen mi moe kari joe nen.
kibri mi!
mi na wan peri
di soetoe kon dja.
eloe foe mi!
ef mi no doro
foe boro
boeba foe ten.
Kopenhagen
san dja na mofo se?
eh-eh!
Watramama na joe sidon
na ston?
Watramama mi sabi joe,
troe-troe.
Watramama,
keba-a-a...
joe gowtoe kan-kan, pe
a de?
mi goedoe-goedoe taig mi dan,
mi w'wan.
Watramama j' e waki mi
so pi-i-i...
ènhè, mi sab p' aj tan:
Sranan!
