Het Burgherlick Leven
Beschreuen deur Simon Stevin.

1ste hooftstick: Vande bepalinghe des+ burgherlick levens.

De ghemeenten om bevrijt te sijn voor allen anstoot haerder nabueren/ ende der vreemde volcken/ hebben hun stercke plaetsen ghemaect/ diese int ghemeen Burghen hieten/ ghelijcker noch veel van dien den naem behouden/ als Middelburch/ Oudenburch/ Straetsburch/ ende meer ander. De inghesetens dier burghen noemden sy Burghers/ ghelijcmen de ingheboornen van Haerlem/ Haerlemmers heet. Dese Burghers/ om vreedsamelick met malcander te connen leven/ hebben seker rechten/ wetten/ insettinghen/ keuren/ oude ghebruycken/ ende int ghemeen gheseyt/ reghelen/ daer sy na leven. De selve sijn driederhande/ te weten *Steetsche/ Natuerlicke/ ende Goddelicke. Steetsche *bepaeltmen die tot onderhout van Steden / of menschelicke versamelinghen/ na den eysch der plaetsen/ persoonen ende tijden veroirdent worden. Natuerlicke noemtmen/ die overal eeuwelick blyven/ ende yeder duer ghemeene wetenschap/

ende ingheboren gheneghentheyt bekent sijn. Goddelicke reghelen heetmen die de Goddelicke saken angaen/ als oirdeninge der Godsdiensten/ ende dies anclevende/ welckmen anders gemeenelick deur een uytheems woort Religie noemt. De bovenschreven wetten ende ghemeene reghelen also de Staet der Burgherie daer uyt haer form crijcht/ worden *Burgherlicheyt gheheeten. Ende die hem inde selve so draecht/ datter in dit leven/ de gemeentens grootste ruste ende welvaren uyt volght/ een *Burgherlick +persoon. Ende sulcke rechte oeffeninghe/ een Burgherlick leven/ van twelcke wy voorghenomen hebben de volghende beschryvinghe te doen.