Hyer navolghet hoe ende in wat manieren ic mijn ghehat hebbe in die stadt van Veneetgien, om mijn selven te besteden tot Japha te zeilen ende mijn voersyen hebbe vant gheen mijn van node soude moghen wesen tusschen weghen ende soe voortdan, als ghi horen sult int vervolch.

Ghij sult weeten nae de mael ic mijn besteet hadde, twellick gheschyeden den lesten dach in mey Soe coft ick voorts van als dat mijn op die reyse van noede soude moghen weesen Ende ic rade sulcks een yghelike sulcks oeck te doen, waerom, want ghij en soutes om gheen ghelt moghen crighen tuschen weghen, als v sulcks gebraeck Daer om soe dede ic in manieren naghescreven. Item Inden eersten soe coft ick een paer linde kousen, wambays ende een paer lichte schuen. Nota Twee brillen roodt wijns van de lichtste ende vanden besten, mits oock een brille mit waters vorsch ende guet. Item Ic lyet oock backen drie marscellen an broot misschuyt Ende omtrent .xxv. zauzijnskijns mit oeck Acht gueder tonghen ende een paer gueder hammen ende omtrent .xij. pont parmezaense case ende .xij. pont boteren, die ic lyet verzouten op die

hollantsche maniere in enen schonen nyuwen poth. Nota. Een kist behooft een yghelick daer hij sijn dinghen in sluyt, want elcke hant daer, is soe guet als een mishaeck Ende ghij voersyet v mede van een bulth die ghij op dese kiste lecht daer ghij des tsnachs op slaept, slapellakens, dekens daertoe Ende isset dat ghij dit ter huyer crijghen coont van die trosluyden, dat is v den beste coop ende verde het syenste Nota. V is oeck mede van noode swycker, candy, nootenmiskathen ende oly van olyff. Ende oock mede een tobbekijn, bij syeckte ende suchte v secrete daer op te doen bij nachte, bij daghe, alst v van noode sal sijn; deser ghelijken veel meer, twellick v wel gheseyt sel werden. Item Aenghaende het contrackt mitten patroon, hanghet al veel ende behooft v wijseliken hyer inne te draghen. Ic rade een yghelijken, als dat hij niet en toeft oppet leste om v hooft te copen, want ghemeenlijken geven die na comelinghe meer dan die voor heen in die weer sijn, alsoe ic ghesyen hebbe. Dit jaer mit ons, was het hooft ghelt doorghaens .xlij. ducaten, die som oock meer. Die een helft betaelt ghij terstont rede, als ghij an genomen wert Ende die anderhelft betaelt ghij in die haven van Japha waneer dat ancker wt gheworpen wort Ende isset bij alsoe, dat ghij sterft eer ghij oppet heilige lant coomt Soe behoort die patroon die een helft vant verdinckde hooft ghelt toe Ende isset dat die patroon dat ghehele hooftghelt ontfangen heeft, alst wel gheboert Soe moet die patroon die een helft vant hooft ghelt wederom restitueren Mer soe wye dattet heilige landt betreedt, al waert oeck dat hij van stonden an sturff ende niet te iherusalem en quame, soude nochtans schuldich wesen sijn ghehele hooftghelt te betalen. Nota. Dese manieren ende meer ander vasticheyden, duet die patroon den peregrijnen bij sekere brieven die bezeghelt werden bijden hertooch van veneetgien, twellick

van groten noode is, wijsheyt cloeckheyt ende voorsichticheyt den peregrijnen. Een yghelick die meester te wesen ende elcks sijn hooft te willen volghen, en mach hyer niet sijn Mer eendrachteliken te kyesen drie ofte vier verstandelen, om t contrackt wijseliken int generael voer alle peregrijnen te maken Want sonder twijfel hyer leyt veel machts an.