Nv wil ic ons ghaen verclaren menigherley vreemdicheiden die ic ghesyen hebbe binnen den tijt die ic daer lach in Veneetgien.

Gevaren doer die stat van veneetgien vespereyen mit eenre barcke, mit ons hebbende wijn ende cost etc. guet tcyer gemaeckt ende gecomen buyten die stadt van veneetgien tot een dorp ghehyeten muranen Aldaer die ghlazen seer vreemdt om syen ghebacken worden Ende leyt muranen verscheyden van veneetgien in manieren als woorkum verscheyden leyt van gorcum. Nota, Muranen is een schone, plazante plaetse wel vercyert mit twee schone plazante kercken. Item Bijsonder soe ghinghe wij in enen schonen plazanten hoff, daer wij alle tijtelike werreltlike genoochten an saghen diemen versyeren of te bedencken (mach) Ende alsmen ons seyde, isset aldaer die maniere dat alle die willen, moghen comen tot desen hoff bancketeren triumpheren, beghinnende van des manendaechs in die pinxter heilige daghen off tot tswoendaechs toe exclusive. Item

In desen voerscreven hoff, saghen wij menygherley verscheyden manieren van spelen, elcks sijn plaetse mitten sijnen ghenoechte bedrivende. Nota. Int incomen van desen hoff werden wij gheleyet bij een becken, daer wij in speelden mit taerlinghen, dit spel ghinck seer vreemdt te werck ende men muchter prijsen winnen die opeliken aldaer teghenswoordich hinghen, als te weten fluweel damast zijde ende ander costelickheit. Mer wat wij speelden ofte bijsetten, dat waren wij qwyt, verlorent al. Item Voorts soe ghinghen wij, daer men opt stick schoot mit die cloot mer wat wij oeck schoten warent qwyt. Nota. Voorts wandelende doer dit wellustighe hoff quamen wij ter plaetsen daer maechden ende jonghelinghen saten en bancketeerden mit alreley snaerspel trommelen ende bommen ende deser ghelijcke vleyschelickheiden ghebruykende Ende saghen voorts menigherley dansen Een yghelick sijn avontuer in enen hooke exercerende Alsoe dat die een partij den anderen niet en muchte syen dan elcks sijn ghenoocht Soe vul gheboomten ende welruykende cruyden was desen hoff, vul hoken ende vul winckelen Alsoe dat ickse wel hyeten mach vrou venis hoff, want ic noyt dier ghelijken en ghesach.