Op onser liever vrouwen hemelvaertsdach, hoe ende in wat manieren voer ons misse ghesonghen wort int dal van Josephat.

Alst nv geworden was onser liever vrouwen hemelvaertsdach Soe sijn wij allegader verghadert geweest voer den tempel des heiligen graevs, aldaer onse devotie gedaen hebbende, sijn wij voorts gegaen mit malkanderen procederende tot pylatus huus toe in alre manieren als voerscreven, dieselfde straten alsoe godt sijn cruus gedraghen heeft Ende ascenderende voorts van pylatus huus voorts tot porta starquilinia ter plaetsen buyten an die stadt van iherusalem aldaer sinte Steven prothomartyr gesteent is geweest, aldaer onse devotie gedaen hebbende sijn wij voorts gegaen doer dat suete dall van Josephat ende gecomen totten tempel van maria goods moeder gebenedijt inden welken wij clommen mit .xl. trappen inder aerden seer dyep ende vysenteerden dat heilige graft van maria goods moeder gebenedijt, alsoet huyden haren feestdach was memorie ende jaergetijt, dat sij van deser plaetsen mit zyel ende mit lijff ten hemel ghevaren is Soe werden ons oppet selfde heilige graft van maria, een schone heerlike singhende misse ghedaen, Concorderende mit onser liever vrouwen hemelvaerts dach ende was aldus luydende Gaudeamus omnes in domino dies festum celebrantes in honore marie virginis de cuius assumptione gaudent angeli etc. Ende daer werden veel missen gelesen van onse priesteren. Item Het wert ons gheseit dattet niet veel den peregrijnen gheboert en was, desen dach alsoedanighen stacie

te houden oppet heilige graft van maria goodes moeder gebenedijt, mar godt haddet alsoe ghevoecht. wij souden dese tijt te bethleem hebben gheweest, mer hoe wij dat an leyden, en consten daer niet geraken, alsoe dat lant vol arabianen was Ende datter oeck twee vanden arabianen mit palen doert lijff gheslaghen waren tot iherusalem, alsoe dat wij groot vervollich leden van dit woeste vollick, Want doen wij versochten den berch van olyveten, souden wij anders vredelick rijden, soe must die patroon hoer gheven .x. ducaten Ende wij musten gheven elcks .ij. marcketten souden wij comen in lazarus graft. Item .ij. marketten vant inghaen des tempels der glorioser maghet marie gebenedijt ende twee marketten vant inghaen des tempels opten berch van olyveten, daer onse gesontmaker christus gebenedijt ten hemel is gevaren, alsoe dat ic wel segghen mach, als dat wij dat jaer van wonder wel gheraeckt hadden, want wij van allen kanten wel gheschat ende gheschoren worden, ende noch meer gheschat ende gheschoren souden hebben (gheweest), hadden wij gheen cloock wijs patroen ghehadt, als men hyer wt mercken mach Dat soe waneer wij inden tempel des heiligen graevs waren ende den tijt genaeckten dat die turcken daer ons wederomme soude wtlaten Soe wilden sij hebben van ons patroon bovent contrackt .xvj. gouden ducaten, Want sulcks noyt ghesyen en was soe en wilde ons patroon dat eerste inbreck niet maken ende seyde teghens die heren van iherusalem, als dat hijs niet schuldich en was ende en soudes niet gheven, alsoe dattet ghesyen was, dat wij noch langhe in den tempel blijven souden Ende die turcken brachten ons huenderen eyeren druven et cetera te coop, twellick sij ons staken doer dat veynsterkijn des kerrick doors ende veel van onsen bruederen coften ende aten, want sij seer flau waren, also ic mede wel ghevoelde Ende als sij saghen dat onse pa-

troon niet gheven en woude, soe lyeten sij ons noch wt in manieren voerscreven Ende deser ghelijken noch veel meer tribulatien die ic mitter tijt verclaren sal Mer godt wilde sonder twijfel van ons gheeert hebben sijn ghebenedide moeders hemelvaert ter selfder stede ende plaetse daert geschyet is, daer wij godt of danckten ende loofden. Item Als wij nv onse devotie gedaen hadden inden tempel des heiligen graevs van maria goods moeder ghebenedijt, daert seer banghe ende groot gherufte van vollicke was, menigherley seckten van menschen die daer oock sacrificie deden Soe sijn wij mitte kurtsten weder omme wt desen tempel gheclommen ende voerts doer dit suete dal van Josephat gheghaen, visenterende somighe heilighe plaetsen, te weten dat hoofkijn mit sijn circunstancien ende van daen wederomme ghekeert tot die torrente van cedron, voorts over die hoel ofte brugghe, alsoe voorts nae onse logijs ende maeckten desen noene guet tscyer vant gheen dat godt verleende.