Cap. 4.
¶ Van swillinge(n) vand(er) tongen2).

+Die swillinge of die sweringe die op de tonge comen entie van heeten humoren siin. die mogedi hennen bider hitten ende bider rootheiden. Ende die mogedi genesen met bloetlatene ter hooftadren. ende bi venteusen te stelne onder den kin. metten welken gi doet uuttrecken vele bloets. Ende bi ziedingen van frute3) ende met+ dwaningen. ¶ Siedinge van frute. Nemt mirabolani citrini. vanden vlesche .1. ½ .Ʒ. dese siedet met rouwen case weye. ende dat drinke nuchtren tere toge. dit sal purgieren die colere bi den fundamente. Ende daerna so dwaet dicken gargariserende al den mont

met desen watere dat men hier+ af sal maken [ende dat laeu des daghes .ij. warf ofte .iij. warf C]. Nemt lentilgen. balaustiën. scorssen van prumen gernaten. gallen. rosen. sumac. dese doet zieden in die .2. deel waters ende terdendeel aysiins hier met so gargarisere. ¶ Ende doet dit pulver cleven dicke ant palas vanden mont. ¶ Nemt rode rosebladere. sandalen wit ende root balausten [ana partes equales C] ende .1. luttel canfers. dit so duwet met enen lepele ant palas vanden mont. Ende dit selve hulpt alse+ die huuf es verlanget bi heten humoren. ¶ Ende hierna so nemt dit pulver metten welken gi wrijft vaste+ an den mont binnen. Nemt spodium. rode roseblade. sumac. coriandren droge gepelde lentilgen. semen porceleine. van elken even vele ende .1. luttel canfers. dit pulvert in .1. motaliin mortier wel cleine. ende doet als u vorleert es. Ende

daerna so dwaet den mont met rose watere ende met aysine geminct1) [ana partes equales C]. ¶ Eist dat si comen van couden humoren. so purgiert ten iersten den mont met pillen van cochiën. ende daerna so wrijft den mont binnen met zeme ende met ater mente. ende dwaten oec dicken daer met. Ende dwaet oec den mont met oximelle. ende houdet daerna in den mont met mirabolanen van kebulen ende piretrum. met elken even vele te gadere gedaen