Cap. 17.
¶ Hoe dat tantswere toecomt3).

Dits van ongemaken van tanden die sweren. dat comt ondertiden bider magen scout4) ende onderwilen vanden herssenen. of van hitten of van couden. van hem beiden comende bi druppingen. dewelke comen storttende na lanx+ den zenewen die siin vaste an die tanden. vanden welken hem comen die beseflijcheiden. ¶ Ende comt dese zeerheide van humoren dalende van den hoofde. so es die sweringe scarp ende stekende met steecten. ende met hitten int ansichte. ende luttel swillen. Ende comet vanden hoofde van couden humoren. so es die sweringe mindre+ met sweringen vanden hoofde ende met bleecheiden vanden ansichte. ende luttel swillingen. ¶ Ende comt

die sweringe vander magen ende dat bi vervulten ende van hitten so sweren die tanden zere met droochten ende met scarpheiden in die kele. ende dorst met bitterheiden in den mont. ende dat doen die coleren die haer principale humoren sijn. ¶ Ende comtse van vercoutheiden vander magen so comt hem dicken suerheit uter magen ende vele spekels. Ende alsi vanden herssenen comen. dan geduret si bi wilen .10. uren. of onderwilen alden dach sonder vergaen. Ende comtse van der magen. so en geduert +die zeerheit maer .1. ure of onderwilen .2. ende dan so stelpse. Ende onderwilen so comtse weder.