Cap. 3.
¶ Dits hoe datme(n) die sweringen i(n) die ore(n) curere(n) sal3).

Dits van sweren in die oren ende hoe mense cureren sal. Ierst merct of die ore es bestopt. ende eist .1.

swere. dan legter op dit plaester aldus. ¶ Nemt versce vigen entie stampt ende tarwenbloeme. ende rosiin sonder steen van elken even +vele. ende doeter toe .1. deel zeems +ende botren. dat niet te dunne en si no te dicke. Ende dit legt optie ore heeter dan laeu. dits goet. ¶ Noch nemt vette figen ende rosiin sonder stene. swinen smout. ende zeem hiermet doet als u vorleert es met den andere plaestren. ¶ Ende alse die swere tebroken es ende daer etter uut loopt. so mac dese salve aldus. Nemt .1. luttel smouts van glase. ende noch vele zeems ende

+dat vergadert tere zalven. ende smeerter met .1. wieke gemaect van stoppen of van linen cledren. ende stecse in die ore. dese zalve suvert ende heilt ende droget. ¶ Noch bernt esscen hout [metten eenen hende int vier C] entie wacheit diere tenden uut loopt. die houdt ende bestadet in .1. glasiin viole. dit verdrijft die zeerheit van den oren.