(II, 33)

(111v) [D]us zijnde up tupperste vanden beerghe, zo sietmen bescheedelic vele diverssche plecken, inden eersten twee beerghen zeer hooghe, ligghende over de Jordane in Arabia Deserta, den eenen ghenaemt Phogor oft Phasga,302 ende den anderen gheheeten Hermon, beede inde provincie van Moab gheleghen,303 ter welker Balaam ontboden was omme de kinderen van Ysrael te vermalendidene, doen de ezelinne daer hij up sat jeghens hem sprac om dat hijse slouch, mids dat zij niet voort en wilde, zegghende: ‘Waer omme slaet ghij mij, ziet ghij niet den inghel met eenen blooten zweerde staen inden wech jeghens ons?’ ende Balaam zijne ooghen ontdoende, sach den inghel, veranderende zijne maledictie in bene-

dictie, profeterende de gheboorte Ons Heeren, zegghende: ‘Orietur stella ex Jacop’, zomen daer af breeder bescreven vindt int bouc van Numeri int xxiiii^e capittele. Item men seit daer dat tusschen den voorseyden tween beerghen ghebuerde, dat Elyas de prophete upghevoert wart in eenen viereghen waghen vander eerden toot den eerdschen paradijse, daer304 hij ghijnc al wandelende ende coutende met Elizeus, ter welker plecken hij liet vallen zijnen mantel daer hij de Jordane mede (112r) ghedeelt hadde ende droochs voets daer duere ghegaen waren, zo van desen breedere ghescreven staet ten vierden boucke der Coninghen int tweeste capittele. Item bij deser voorseyder plecken zo waest dat Maria Egiptiaca hare groote penitencie dede, ende daer zoe ontfijnc theleghe sacrament vanden abdt Zosijmas, ende naer haer doot wart daer begraven vanden zelven abdt mids hulpen van eenen wilden leeu, de welke deerde up scraefde ende maecte een graf omme dat heleghe lichame in te legghene, zo de legende vander zelver Maria breeder verclaert.305 Item onttrent den voorseyden plaetsen zo leit eene contreye, ghenaemt Sierie Sabal;306 daer bij plach in ouden tijden zomen daer seit eene stede te stane, ghenaemt Raba,307 daer David sant Uriam, zijnen ghetrauwen rudder, bij Joab, zijnen capitain, omme vooren inde bataille ghestelt te werdene ende versleghen te zijne, ten fijne dat hij te bat zijnen wille hebben zoude van Bersabeen, huusvrauwe des selfs Uriams, zo dat ooc ghebuerde, alzo men van al desen wel bescreven vint ten bibele.308 Dese voorseyde plaetse wart naerderhand ghenaemt bijden kerstenen princen die dland van beloften besaten, naercommers van Godefroit van Buljon, Le Peyere du Desert;309 daer bij wart een steerc casteel ghemaect bijden zelven princen, tsteercste dat in al dien lande gheleghen was ende dat meest den heydenen quaets dede van diere zijden, ghenaemt Le Teret oft Trech.310 Item men toocht ooc vander zelver Quarantanen een groot gheberchte (112v) bijder Dooder Zee gheleghen, in dwelke staet een hol, ghenaemt Speloncka Moabitarum; daer ghebuerdet dat, naer dat de vijf steden versoncken waren ende Lots wijf verandert in eenen soutsteen, Loth droncken zijnde besliep zijne twee dochteren, zo dat vander oudster commen es tvolc van Moab, ende vander joncster tvolc van Amon, zo dat breeder staet in Genesis int xix^e capitele.