H.F. de Ziel, Ala poewema foe Trefossa

Ala poewema foe Trefossa

auteur: H.F. de Ziel

editeur: Jan Voorhoeve

bron: Trefossa, Ala poewema foe Trefossa (samenstelling Jan Voorhoeve). Bureau Volkslectuur, Paramaribo 1977

verantwoording

inhoudsopgave

doorzoek de hele tekst

downloads

DBNL vignet



[p. 43]
II Trokiaant. gi Masra J.G.A. Koenders
[p. 44]
1. opo nakiaant. mi at e aswa doengroe nanga dé. na baka alasani moro poti. èn ibri joer e poes go n' in wan stré, foe opo naki go na wan tra doti.
[p. 45]
2. wan troe poewemaaant. wan troe poewema na wan skreki-sani. wan troe poewema na wan stré te f' dede. wan troe poewema na wan tra kondre, pe joe kan go te joe psa dede fosi. wan troe poewema na den wortoe d' e tan abra te ala trawan n' in joe libi wasi gwe; wan koko soso, ma wan di kan sproiti njoen libi. lon na mi abra dan, Aroesoebanja foe grontapoe. kande wandé, wandé mofo foe mi sa broko opo foe taki gi onowsroewan toe wortoe di, te den gro, sa trowe lepi stari, di mi de soekoe now.
[p. 46]
3. santaaant. a pis papira disi, d' e wakti nanga pasensi foe tjari den marki foe mi jeje, a santa, a santa lek Gado fesi. te tingga srefi, begi foe mi no man tingga moro f' go meri Gado memre, no wan sma sa sab na sari f' dati, no wan. no wan sma sa sab mi sari, te na krin papira disi sa wakti f' soso foe di m' no doekroen fara nofo fo foeroe mi pen nanga na braka foe mi dipi broedoe.
[p. 47]
4. broaant. no pori mi prakseri nojaso, no kari mi foe loekoe no wan pe, tide mi ati troesoe mi foe go te na wan tiri kriki, farawe. no tak na lon mi wani lon gowe foe di mi frede stré èn kré nomo, ma kondre b'bari lontoe mi so te, san mi moe doe? mi broedoe wani bro. na kriki-sé dren kondre mi sa si, pe ala sani moro swit lek dja èn skreki-tori no sa trobi mi. te m' drai kon baka sonten mi sa tron wan pkinso moro betre libisma, di sabi lafoe, sabi tja fonfon.
[p. 48]
5. m' ben sab wan singi...aant. m' ben sab wan singi, di m' ben de wan boi, wan nofi-nofi boi, di no b' e go na skoro. na tap hen bowtoe ba-m'ma b' e dodoi mi nanga hen, te doengroe f' net b' e doro. now mi de dja; dodoi-ten t' a tra sjoro, den fré gwe; foerfoer sani di ben moi; m' ben sab a singi, ma m' no sab hen moro, èn a n' e kon, o kori, o boboi. mi las a singi, ma m' no las a switi foe fosi, te m' b' e jere ba-m'ma sten: te now ete sontron m' e firi hen. den pkin san dis e tan; san libi iti trowe na sé of smés panja na gron: d' e fas na j' in lek gowtoe na lonton.
[p. 49]
6. wai!aant. d' e opo den srefi gi son, den groen wiwiri, te angri foe gro priti boeba foe siri. na mi? piki... piki! apinti, na mi? san de loefroe so, san wiki? korsoe, korsoe de seki mi, foe di na bita powa foe mi borsoe wani loesoe kon. wai! san keti na peti sa broko toeka krin leti.
[p. 50]
7. gronmamaaant. mi a no mi solanga mi broedoe foe joe a n' e troeboe na ini den doesoen tité foe mi skin. mi a no mi solanga mi loetoe n' e saka, n' e soetoe, mi gronmama, te na joe ati. mi a no mi solanga m' no krari foe kibri, foe tjari joe gersi na ini mi djodjo. mi a no mi solanga j' n' e bari f' prisir ofoe pen na ini mi sten.
[p. 51]
8. pkin préaant. dronman no weri - toeloen-toen-toen, toeloen-toen-toen - dronman joe meri, joe meri mi kra, mi n' a keba. dronman no weri - toeloen-toen-toen, toeloen-toen-toen - dronman joe meri, joe meri mi kra, mi n' a keba. dronman no weri - toeloen-toen-toen, toeloen-toen-toen - mi dronman no weri, no kenki speri, ef joe keba mi sa fika. dronma-a-an...!
[p. 52]
9. Srananaant. broedoe f' afo ben dopoe joe doti. joe santi ben soigi, ben dringi den dropoe, Sranan, te kramnari f' afo ben boro. na joe gron wi moe gro. fajalobi, a dinamit d' e opo joe prodo so nja, moe koti hen faja, moe bron na wi broedoe; dan bromki sa monjo na wi libi foe njan na bigi frijari, di Sranan nanga wi de froewakti, so langa.
[p. 53]
10. x x xaant. te den srenger mi poeroe na den prakseri - den pembadoti-wan - mi sa graboe den noko foe den oso, mi sa kwinsi den toren na mi borsoe, mi sa it wan ai na joe, star na firmamenti, di ben sori pasi na den koniman. star foe den koniman, gi mi wan presi na joe baka, séri nanga mi na den légi loktoe. na den wèrder winti mi sa hori mi srefi na den faja-prin foe joe. mi no sa fadon, bikasi mi wani go, mi wani go te pe te joe sa tan tiri na bigin-bigin, pe Boen didon, nanga soso skin.
[p. 54]
11. a joeroe dis...aant. a joeroe dis e bradi so soe-oe-oen... bigin, kroboi, hé nanga dipi, kroektoe-, letsé e dans-dansi gwe lek te - na sabana - son e bron. te joe w'wan tan, joe w'wan so kodo, a libi weti, weti lek wan dow. mi anoe frekti mi kindi, ede boigi. - marawinti, marawinti! - doisr' e teki mi. mi m'ma, mi m'ma! san sa kon so djonsro-djonsro? jepi joe boi...
[p. 55]
12. wan enkri gado-momentie...aant. wan enkri gado-momenti, nomoro, e poko na wi mindri. ma hen meti span lek te hondro jari sinta na wan. Sisi, mi m'ma, agen mi moe kari joe nen. kibri mi! mi na wan péri di soetoe kon dja. eloe foe mi! ef mi no doro foe boro boeba foe ten.
[p. 56]
13. Kalfariaaant. Masra, joe ati no moe bron te m' sa aksi f' a doe kon tak mi totro na katibo ben kan doro so wan ten, ... so wan pen! na Gorgata joe manpikin foeroe hen marki. a ben sabi ala warti, ala wini foe hen dini. a ben sab tak joe b' e arki, tak wan tata b' e si hen pina. Masra, joe ati no moe bron, ma sortoe sabi mi totro ben abi?
[p. 57]
14. netiaant. wan krara koti, ne pis-pis gowtoe, den fadon fadon na doengroe gron. wan krara koti, ne pipit gowtoe, den lai na loktoe so te. d' e brenki-brenki, d' e spenki-spenki, d' e pingi-pingi den ai. m' e opo m' ede, mi at e firi wan fin prisiri foe troe. wan krara koti, ne doesoen stari fadon na djari, den lolo gwe.
[p. 58]
15. Kopenhagenaant. san dja na mofo se? eh-eh! Watramama na joe sidon na ston? Watramama mi sabi joe, troe-troe. Watramama, tjeba-a-a... joe gowtoe kan-kan, pe a de? mi goedoe-goedoe taig mi dan, mi w'wan. Watramama j' e waki mi so pi-i-i... ènhè, mi sab p' aj tan: Sranan!
[p. 59]
16. servusaant. bos mi adjosi tide weti wenke, safri m' sa kari joe nen. wi no sa ferteri - soso prakseri, fa wi ben soengoe na droengoe foe dren. lobi ben trobi, ben troeboe wi jeje. koensoe foe joe kan tori wi pré, wi switi kor-kori, te pokoe f' wi ati b'e moksi tron wan. lobi ben trobi, ben troeboe wi jeje. libi ben pori wi pré, wi switi kor-kori, te pokoe f' wi ati b'e moksi tron wan. figi joe ai. wenter sa wai, kroroe sa opo na doesoen knopo. bos mi adjosi tide weti wenke, safri m' sa kari joe nen...
[p. 60]
17. lènteaant. tide na wan presenti. heri skin na tongo f' tesi weti skoema prisiri. kopro beki, tide kemopo na kopro beki. groen, wanwan groen, dja nanga jana wanwan groen. waka kon, prodo wenke, dogla wenke, wan bos anga wan brasa: weti skoema soela prisiri. fa tide e mek mi wiri!
[p. 61]
18. mi go - m' e konaant. te dréten winti sa troki na Mawnidan: - krioro fa? m' sa piki: - dja mi de, - bangi foe ba-m' ma seti keba: - ertintin... ertintin... te dréten winti sa troki na kankantri: - krioro fa? m' sa piki: - dja mi de, - Eifeltoren hé pasa, - m' a n' a jorka, an'a jorka... te dréten winti sa troki na Moi-bon foe Bose: - krioro fa? m' sa piki: - dja mi de, - s'sa Mina, ptata boen, - ma bojo foe joe kir-kiri...
[p. 62]
mi go - m' e kon, sowtwatra bradi. tak wan mofo, ala mi mati, tak wan mofo. m' go, m' e kon...
[p. 63]
19. bodaaant. son mi son mi égi-égi son, joe fes e poeroe soso mamanten. san jongoe moro mamanten? san krakti moro mamanten? son mi son mi égi-égi son, kanti joe wagi na Sranan mofo-doro. mamanten moe fesa na foto, moe wowojo na watra, moe bogo-bogo na boesi. son mi son mi égi-égi son, wi na prapi, krabasi, ten-ten. foeroe wi nanga mamanten.

Ala poewema foe Trefossa

Ala poewema foe Trefossa

II Trokiaant. gi Masra J.G.A. Koenders

II
Trokiaant.
gi Masra J.G.A. Koenders