Van Brabant die excellente cronike

Dat .v. capitel. Van sinte Goedelen harer suster die rust te Bruessel.

ALs die salige vrouwe Amelberghe beurucht was dragende in hair lichaem dat salich kint sinte Goedele, ende beswaert sijnde midts den arbeyt die nakende was so sach si in haren slape den engel gods bi haer staen toesprekende aldus Die hemelsche coninc heeft mi beuolen di te seggen Getrouwelic hebstu ontfangen, salichlic sulstu baren du clare moeder eender eerwaerdiger dochter, die van ioncx op aen hangen sal den godlijcken dienst daer si in volherden sal ende ontfangen die palme des eewigen leuens. Wt welke troostelicke woorden sinte amelberge seer verblijt was Ende als si moeder was geworden van desen kinde so ontboot si haer lieue nichte sinte Gheertruyt om dit kint te heffen vander vonten. Twelc sinte Gheertruyt geerne dede ende wert also haer geestelike moeder. Ende daer nae soe nam sijse te hare waert ende op voedese in haer clooster te Nyuele in heylige zeden ende godlicke leeringen. Ende so begonste dit kint sijn herte op te heffen tot hemelschen dinghen, aertsche versmadedende. Si was suuer ende reyn van herten ende van lichame, minlic tot allen menschen ende verciert mit alderhande duechden. Als dan sinte Gheertruyt tot christum gereyst was so keerde dese maget Goedele weder tot hair ouders huis, dair si metten wercken bewees tgheen dat si van haer nichte gheleert hadt. Seer vierich was si in hair gebet, ende dicwil badt si gode met tranen ende beweghinge des herten, dat al tgeen dat si peysde oft dede den godlicken aenschijne ontfanclic ware Dit benide die bose vijant, want op eenre nachte als si ghinc met een lanteerne tot sinte Saluatoers kercke te Moersele die twee milen verre stont van haer woninge om te beden want si beminde seer die plaetse, so dede die duuel de keerse wt om haren wech te beletten Mer sinte Goedele badt gode ynnichlijck ende dat licht wert weder barnende.

In haren wtersten als die doot nakende was so ontfinck si dat werdige sacrament. Ende op den achsten dach van Loumaent sterf salichlic, dies dat volck seer droeuich was Eerst wert si begrauen te Ham, Maer want daer dagelicx teykenen geuielen aen haer graf, so wert dat volc bider disposicien

[fol. 9v]

goods verwect om haer te verheffen ende tot eenre eerliker stede te brengen. Ende als dat volck met processien dat lichaem meenden te dragen totter stat van Nyuele bider heyligher maghet sinte Gheertruyt so en conden sise met niet gherueren vander steden So werden ander goeden menschen denckende of si yet begheerde te rusten bi haer nichte sinte Aldegonde te Maubuyge oft sinte Woutruyt die rust te Bergen in Henegouwe. Mer het was al verloren arbeyt die si daer toe deden, want si en condense niet gherueren. Ende als si niet en wisten wat gods wille was so was daer een out vader die van sinte Goedelen tijde geleeft hadde ende seyde aldus Mi dunct datse die stede harer rusten vercoren heeft in de kercke sinte Saluators te moersele daer si in haer leuen haren geest gestadichlic gode offerde Ende so werden si wt dees oude vaders rade die fyertere op heffende ende lichtelic draghende met processien ende met sanghe ende inden wech gheschieden schone miraculen Als dat heilich lichame inder kercken te Moersele was gheset, so liet god gescien een alten groten teeken tot haren loue ende eeren, want op den dach dat sinte Goedele verscheyden was soe werdt aen haer graf te Ham wassende een boom ende die werdt des ander dages na haer translatie te Moersel geuonden staende wassende voor die kerck dore in deerde gewortelt als oft hi daer van beghin ghewassen waer ende inden winter was hi so groene als inden somer. Na lange iaren so wert dat heylich lichaem van sinte Goedele gebracht te Bruessele in sinte Gorijcx kercke Daer na bi rade van graue Lambrecht so wertse vanden bisscop ende clergien mit groter eeren ghedragen tot sinte Michiels kercke inder selue stadt Te weten int Jaer .M.xlvij. ende daer rust si noch.