Van Brabant die excellente cronike

[fol. 21v]

Dat .xx. capitel. Vanden heyligen martelaren sinte Rombout, ende ooc van sinte Lybrecht des grauen sone Ado

JNden voorseyden tide van sinte Gommaer so leefde een eedel man in Brabant geheten Ado die een graefscap regeerde, hebbende ooc een edel huysvrouwe beyde leuende kerstelijc ende duechdelic in cuysschen huwelijken state, gelijc Abraham ende Sara, nochtan sonder vrucht te hebben Totten welcken ter herbergen quam die heylige sinte Rombout een conincx sone van Scotlant na dat hi te Rome geweest hadde ende sijn eertsbisdom dat hy besadt den paus Stephanus die tweeste ouer ghegeuen hadde Die bi sijnre pauslijcker benedijngen die plaetse begaefde, daer sinte Romboult sijn woninge maken soude So quam hi te Mechelen in Brabant om tvolck in duechden te leeren ende den wech der ewiger salichet te wijsen Als de voorseide Ado desen man gods sach so node hi hem ter herbergen so dat sinte Rombout tot sijnen huyse ghinc.

Op een tijt gebenedide dese man godes sinte Rombout dese twee man ende wijf, ende verlicht mitten geest der prophetien so gheloofde hi hem vruchtbaerheyt ende hi geloofde hem dat hi tkint soude heffen ende voorseyde des kints name. Van welcke woorden si verscrict waren ende nochtan geloofden sijt ende na haer geloue gesciede hem, ende de grauinne die bracht ter werelt eenen sone, die sinte Rombout gepresenteert wert, dien hy doopte ende noomdet Lytbertus Welc kint op wassende ende mitten anderen kinderen spelende opten oeuer vander Dielen tot Mechelen so viel hi int watere ende verdranck. Terstont so waren die ouders ende al tvolc met droefheit beuangen ende men sochte tkint int watere mer men constet niet vinden So wert sinte Rombout clagelijc gebootscapt die oec seer droeuich quam totten oeuer daer dit kint verdroncken was Hi trooste die ouders ende hi sprac drie of vierwerf sijn ghebet tot gode Ende dat kint Lytbertus quam geuloten opt water ia sonder eenige vuchticheyt des waters, twelc een groot ende wonderlic mirakel was. Ende die ouders seer verblijt sijnde dancten gode almachtich, ende gauen dit kint den heyligen vrient gods sinte Rombouts om te leeren ende te regeren in allen duechdeliken wercken. Welck kint hi so informeerde ter eeren gods also dat hi ten lesten martelaer sterf. want in dier tijt dat die ongelouige Denen haer tyrantscap deden beghinnende vander zee tot Colen toe

[fol. 22r]

al verderuende ende verbranden al datse vonden, so was dese Lytbertus geuloden in Haspegouwe tot Sintruyen daer si hem voor sint Truyen outaer doden ende maecten hem gods martelaer.

Jck keer weder tot sinte Rombout die vanden graue gecregen hadde een stuck broocks ofte lants te Mechelen daer hi een capelle gemaect had, te weten, twelck noch sinte Rombouts capelle is daer hi gode nacht ende dach diende met sine broederen die hi daer vergadert hadde So waren dair .ij. bose menschen die sinte Romboult te wercken gaf ende meynden dat hi veel gelts ghehadt hadde So wachten si hem als hi ghinc lesende sijn ghebet ende quetseden hem dootlic in sijn hooft, om dwelc te bedecken soe worpen si sijn heylich lichaem int water. Ende so ghebuerdet dat enige visschers bi nacht sijnde onledich opt selue water, werden daer siende een hemelsche licht Om twelc si veruaert sijnde gingen totten graue Ado ende gauent hem te kennen. Ado dat verstaende ghinc met hem opt water ende wert ooc dat hemelsche licht siende Ende wtwerpende een net so vischte hi dat lichaem van sinte Romboult ende tract met sijnre hulpen te lande. Ende met groter weerdicheit bracht hijt ter plaetsen, daer hijt costelijc begroef, te weten in die voorseyde capelle, niet sonder schone miraculen die god daer liet geschien door die verdiente des heyligen martelaers.

Veel ander schone miraculen heeft daer na god laten gheschien door die verdienten van sinte Romboult also dat die legende int lange bewijst